Pagsabut sa Bunyag

Ni Marissa Widdison

Mga Magasin sa Simbahan

Kinsa ang mobunyag nako?

Ang mobunyag kanimo kinahanglang naghupot sa priesthood—ang gahum sa paglihok sa ngalan sa Dios. Sa dihang buot ni Jesus nga magpabunyag, Siya miduol kang Juan Bautista, kinsa naghupot sa priesthood (tan-awa sa Mateo 3:13).

Ang tawo nga mobunyag nimo mokuha og pagtugot sa inyong bishop o presidente sa branch.

Kinahanglan ba kong iunlod sa tubig aron mabunyagan?

Si Jesus nabunyagan pinaagi sa pagpaunlod, buot pasabut giunlod Siya sa tubig ug dayon gipabarug (tan-awa sa Mateo 3:16). Kini ang paagi nga kamo mabunyagan. Ang pagpabunyag ining paagiha nagpahinumdom kanato nga biyaan nato ang atong karaang kinabuhi ug magsugod og bag-ong kinabuhi nga ipahinungod sa pagserbisyo sa Dios ug sa Iyang mga anak.

Unsa ang mga saad nga akong himoon kon magpabunyag ko?

Kon kamo bunyagan, kamo naghimo og pakigsaad, o saad sa usag usa, uban sa Langitnong Amahan. Kamo nagsaad Kaniya nga kamo mobuhat og piho nga mga butang,ug Siya nagsaad sa pagpanalangin kaninyo. Kini nga pakigsaad gihulagway diha sa mga pag-ampo sa sakrament nga iampo matag Dominggo (tan-awa sa D&P 20:77–79). Kamo nagsaad:

Sa paghinumdom ni Jesukristo.
Sa pagsunod sa Iyang mga sugo.
Sa pagdala sa ngalan ni Kristo, kini nagpasabut nga unahon ninyo sa inyong kinabuhi ang Iyang buhat ug sundon ang Iyang gusto imbis ang gusto sa kalibutan.

Kon inyong tumanon kini nga saad, ang Langitnong Amahan nagsaad nga ang Espiritu Santo maanaa kaninyo ug ang inyong sala mapasaylo.

Unsa ang Espiritu Santo?

Ang gasa sa Espiritu Santo mao ang usa sa labing bililhong gasa sa Langitnong Amahan. Ang inyong bunyag dili makompleto hangtud hatagan kamo og panalangin sa pagdawat sa Espiritu Santo niadtong mga lalaki nga naghupot sa Melchizedek Priesthood (tan-awa sa Juan 3:5).

Ang Espiritu Santo sakop sa Dios nga Kapangulohan. Siya nagpamatuod sa Langitnong Amahan ug ni Jesukristo ug nagtabang nato nga masayud unsa ang tinuod. Siya nagtabang nato nga malig-on sa espirituhanong paagi. Siya magpasidaan kanato sa kakuyaw. Siya nagtabang kanato nga makat-on. Ang Espiritu Santo makatabang kanato nga mobati sa gugma sa Dios.

Kon kamo makumpirmahan isip miyembro sa Simbahan, ang Espiritu Santo maanaa kanunay ninyo kon kamo mopili sa matarung.

Nganong otso anyos man gyud ko aron mabunyagan?

Ang Ginoo nagtudlo nga ang mga bata dili mabunyagan hangtud dili sila igong makasabut sa kalainan tali sa eksakto ug sayop, diin mabasa sa kasulatan nga otso anyos (tan-awa sa Moroni 8:11–12; D&P 29:46–47; 68:27).