Ang Misyon ug Pagpangalagad ni Jesukristo
Gikan sa pakigpulong sa debosyonal niadtong Agosto 18, 1998, sa Brigham Young University. Alang sa kompleto nga teksto sa Iningles, adto sa speeches.byu.edu.
Ang labing maayo nga ebidensya sa atong pagsimba ni Jesus mao ang pagsunod Kaniya.
Isip usa sa “talagsaon nga mga saksi sa ngalan ni Kristo sa tibuok kalibutan” (D&P 107:23), nagtuo ko nga makaserbisyo ko og maayo kon motudlo ug mopamatuod ko Kaniya. Sa pagsugod, pangutan-on ta mo sama sa Iyang gipangutana ngadto sa mga Pariseo: “Unsa may inyong paghunahuna mahitungod kang Kristo? Kang kinsa man siyang anak?” (Mateo 22:42).
Kanunay ko maghunahuna niining mga pangutanaha samtang makighimamat ko sa mga lider sa gobyerno ug sa ubang relihiyon. Ang pipila miila nga “Si Jesus bantugang magtutudlo.” Ang uban miingon, “Siya propeta.” Ang uban yanong wala gyud kaila Niya. Dili kita matingala pag-ayo. Total, pipila lang ang nasayud sa kamatuoran sa gipahiuli nga ebanghelyo. Ang mga miyembro sa Ang Simbahan ni Jesukristo sa mga Santos sa Ulahing mga Adlaw gamay lang nga minoridad sa tanang miangkon nga Kristiyano.
Ang atong kahimtang karon napanan-awan ni Nephi mga siglo nang milabay:
“Ug nahinabo nga ako nakakita sa simbahan sa Kordero sa Dios, ug ang iyang gidaghanon diyutay ra … ; bisan pa niana, ako nakakita nga ang simbahan sa Kordero, kinsa mao ang mga Santos sa Dios, diha usab sa ibabaw sa tibuok yuta; ug ang ilang mga kamandoan diha sa ibabaw sa yuta gamay ra. …
“Ug nahinabo nga ako, si Nephi, nakakita sa gahum sa Kordero sa Dios, nga kini mikunsad diha sa mga Santos sa simbahan sa Kordero, ug diha sa mga katawhan sa pakigsaad sa Ginoo, kinsa nagkatibulaag diha sa ibabaw sa tibuok yuta; ug sila gisangkapan sa katarung ug uban sa gahum sa Dios sa dako nga himaya” (1 Nephi 14:12, 14).
Kana nga katarung, gahum, ug himaya—sa tinuoray, tanan natong mga panalangin—nagagikan sa atong kahibalo, pagkamasulundon, ug pasalamat ug gugma alang sa Ginoong Jesukristo.
Atol sa Iyang mubong panahon dinhi sa mortalidad, ang Manluluwas nakatuman sa duha ka labing mahinungdanong tumong. Ang usa mao ang Iyang “buhat ug ang [Iyang] himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39). Ang ikaduha yano Niyang gipahayag: “Kay usa ka panig-ingnan akong gihatag kaninyo, aron nga kamo usab kinahanglan magabuhat sama sa akong gibuhat kaninyo” (Juan 13:15).
Ang una niyang tumong nga atong nasayran mao ang Pag-ula. Kini ang Iyang halangdong misyon sa mortalidad. Sa katawhan sa karaang Amerika, ang nabanhaw nga Manluluwas mipahayag sa Iyang misyon:
“Ako mianhi dinhi sa kalibutan aron sa pagbuhat sa kabubut-on sa akong Amahan, tungod kay ang akong Amahan mipadala kanako.
“Ug ang akong Amahan mipadala kanako nga Ako unta ituboy nganha sa krus; ug human niana nga Ako matuboy diha sa krus, nga Ako unta makadala sa tanan nga mga tawo ngari kanako” (3 Nephi 27:13–14).
Sa pagpadayon sa Iyang wali, Iyang gipahayag ang Iyang ikaduhang tumong—mahimo natong ehemplo: “Kamo nasayud sa mga butang nga kamo kinahanglan gayud nga mobuhat … ; kay ang mga buhat nga kamo nakakita nga Ako mihimo kana kamo mobuhat usab” (3 Nephi 27:21).
Ang Iyang unang tumong, akong gihulagway isip Iyang misyon. Ang Iyang ikaduhang tumong, akong ihulagway isip Iyang pagpangalagad. Atong ribyuhon kining duha ka bahin sa Iyang kinabuhi—Iyang misyon ug Iyang pagpangalagad.
Ang Misyon ni Jesukristo—ang Pag-ula
Ang iyang misyon mao ang Pag-ula. Kana nga misyon para lang gyud sa Iyaha. Natawo sa usa ka mortal nga inahan ug imortal nga Amahan, Siya ra ang bugtong makahimo sa paghalad sa Iyang kinabuhi ug sa pagbawi niini pag-usab (tan-awa sa Juan 10:14–18). Ang mahimayaong sangputanan sa Iyang Pag-ula mahangturon. Iyang gikuha ang ikos sa kamatayon ug gitemporaryo ang kaguol diha sa lubnganan (tan-awa sa 1 Mga Taga-Corinto 15:54–55). Nasayran na ang Iyang responsibilid sa Pag-ula sa wala pa ang Paglalang ug Paglaglag. Wala lang ni gihimo alang sa pagkabanhaw ug imortalidad sa tanang katawhan, para usab ni nga mapasaylo sa atong mga sala—sumala sa mga kondisyon nga Iyang gi-establisar. Busa ang Iyang Pag-ula makapahimo kanato nga mahiusa usab Niya ug sa atong mahangturong pamilya. Kini nga panglantaw, atong gikonsiderar nga kinabuhing dayon—ang labing mahinungdanong gasa sa Dios ngadto sa tawo (tan-awa sa D&P 14:7).
Walay laing tawo makahimo sa Pag-ula. Walay laing tawo, bisan ang pinakadatu ug pinakagamhanan, ang makaluwas og usa ka kalag—bisan iya mismong kalag (tan-awa sa Mateo 19:24–26). Ug walay indibidwal ang gikinahanglan o gitugutan sa pagpaagas og dugo alang sa mahangturong kaluwasan sa laing tawo. Gihimo kini ni Jesus “sa makausa ra” (Mga Hebreohanon 10:10).
Bisan tuod ang Pag-ula nahitabo atol sa Bag-ong Tugon, ang mga panghitabo diha sa Daang Tugon kasagaran nagpahayag sa kaimportante niini. Sila si Adan ug Eva gisugo sa paghalad og mga sakripisyo isip “usa ka pagkasama sa sakripisyo sa Bugtong Anak sa Amahan” (Moises 5:7). Giunsa? Pinaagi sa pagpaagas og dugo. Gikan mismo sa ilang kasinatian ilang napamatud-an ang kasulatan nga “ang kinabuhi sa unod anaa sa dugo” (Levitico 17:11).
Ang mga doktor nasayud nga kon dili na moagi ang dugo ngadto sa usa sa organ sa lawas, may problema. Kon dili kaagi ang dugo sa paa, magkakanggrina. Kon dili kaagi ang dugo sa utok, ma-stroke. Kon dili kaagi ang dugo sa coronary artery, atakihon sa kasingkasing. Ug kon ang hemorrhage dili mapugngan, mahimong ikamatay.
Sila si Adan, Eva ug ang misunod nga mga henerasyon nasayud nga kon magpaagas sila og dugo sa hayop, mamatay kini. Para sa ilang ihalad nga sakripisyo, dili lang bisan unsa ni nga hayop. Kinahanglan kinamagulangang hayop ug walay ikasaway (tan-awa, pananglitan sa, Exodo 12:5). Kini nga mga panginahanglanon mga simbolo usab sa himoonong sakripisyo sa walay sala nga Kordero sa Dios.
Sila si Adan ug Eva gimandoan: “Busa, ikaw mobuhat sa tanan nga imong buhaton diha sa ngalan sa Anak, ug ikaw maghinulsol ug motawag sa Dios diha sa ngalan sa Anak hangtud sa kahangturan” (Moises 5:8). Sukad adtong adlawa hangtud sa tunga-tunga sa kapanahonan, ang pagsakripisyo sa hayop nagpadayon nga usa ka matang ug simbolo sa mahitabong Pag-ula sa Anak sa Dios.
Sa dihang natuman na ang Pag-ula, kana nga dako ug katapusang sakripisyo mituman sa balaod ni Moises (tan-awa sa Alma 34:13–14) ug mitapos sa pagsakripisyo sa hayop, nga mitudlo nga “ang kinabuhi sa unod [anaa] sa dugo” (Levitico 17:11). Gipasabut ni Jesus kon sa unsang paagi ang mga elemento sa karaang sakripisyo wala na gikinahanglan tungod sa Pag-ula ug nabag-o sa simbolo nga paagi diha sa sakrament. Bantayi pag-usab ang mga paghisgut sa kinabuhi, unod, ug dugo:
“Busa si Jesus miingon kanila, Sa pagkatinuod, sa pagkatinuod, magaingon ako kaninyo, Gawas kon mokaon kamo sa unod sa Anak sa tawo, ug moinom sa iyang dugo, wala kamoy kinabuhi nga dayon.
“Siya nga mokaon sa akong unod ug moinom sa akong dugo may kinabuhi nga dayon, ug pagabanhawon ko siya sa kaulahian nga adlaw” (Juan 6:53–54).
Tungod sa Pag-ula ni Jesukristo, ang tanang katawhan—kutob sa buot—matubos. Ang Manluluwas misugod sa pagpaagas sa Iyang dugo para sa tanang katawhan dili sa krus apan sa Tanaman sa Getsemani. Didto Iyang gidala ang gibug-aton sa mga sala sa tanang natawo. Sa kabug-at niini, migawas ang dugo sa matag lungag sa Iyang panit (tan-awa sa D&P 19:18). Ang paghingutas sa Pag-ula natapos diha sa krus sa Kalbaryo.
Ang kaimportante sa Pag-ula gisumada ni Propeta Joseph Smith. Siya miingon, “Ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon mga sumpay lamang niini.”1
Uban niana nga katungod ug dakong pasalamat, nagtudlo ug nagpamatuod ko Kaniya.
Ang Pagpangalagad ni Jesukristo—ang Ehemplo
Ang ikaduhang mahangturong tumong sa Ginoo sa mortalidad mao ang magserbisyo isip ehemplo nato. Ang Iyang sulundon nga kinabuhi naglakip sa Iyang mortal nga pagpangalagad. Kini naglakip sa Iyang mga pagtulun-an, sambingay, ug wali. Kini naglakip sa Iyang mga milagro, mahigugmaong pagbati, ug pagkamainantuson ngadto sa mga katawhan (tan-awa sa 1 Nephi 19:9). Kini naglakip sa Iyang maloloy-ong paggamit sa awtoridad sa priesthood. Kini naglakip sa Iyang matarung nga kasuko dihang Iyang gipahingmaraut ang sala (tan-awa sa Mga Taga-Roma 8:3) ug dihang Iyang gipangbalintuwad ang mga lamesa sa tingpangilis og kwarta (tan-awa sa Mateo 21:12). Kini naglakip sa Iyang mga kasubo. Siya gibiay-biay, gilatigo, ug gisalikway sa Iyang kaugalingong mga katawhan (tan-awa sa Mosiah 15:5)—gani gibudhian sa usa ka disipulo ug gilimud sa lain (tan-awa sa Juan 18:2–3, 25–27).
Bisan tuod talagsaon ang Iyang pagpangalagad, dili na kini bag-o Kaniya. Walay kinutuban ang gidaghanon sa mga tawo nga mahimong mosunod sa ehemplo ni Jesus. Susamang mga buhat ang gihimo sa Iyang mga propeta ug apostoles ug sa uban Niyang mga sulugoon. Daghan ang nag-antus sa pagpanggukod alang Kaniya (tan-awa sa Mateo 5:10; 3 Nephi 12:10). Sa atong panahon, nakaila kamo og mga kaigsoonan nga nanlimbasug—bisan pa sa grabeng kalisud—sa pagsunod sa ehemplo sa Ginoo.
Mao gyud ni ang angay. Kini Iyang paglaum alang kanato. Ang Ginoo mihangyo nato sa pagsunod sa Iyang ehemplo. Ang Iyang hangyo klaro kaayo:
-
“Unsa nga matang sa mga tawo kamo mahisama? … Gani sama nga Ako mao” (3 Nephi 27:27; tan-awa usab sa 3 Nephi 12:48).
-
“Sumunod kamo kanako, ug himoon ko kamong mga mangingisdag tawo” (Mateo 4:19).
-
“Kay usa ka panig-ingnan akong gihatag kaninyo, aron nga kamo usab kinahanglan magabuhat sama sa akong gibuhat kaninyo” (Juan 13:15; tan-awa usab sa Juan 14:6).
Kini ug ang ubang susamang mga kasulatan wala gisulat isip mga sugyot. Kini balaanong mga sugo! Kita kinahanglang mosunod sa Iyang ehemplo!
Aron mapasayon ang atong tinguha sa pagsunod Kaniya, makakonsider ta og lima ka aspeto as Iyang kinabuhi nga atong sundon.
Gugma
Kon mangutana ko kon unsa nga kinaiya sa Iyang kinabuhi ang inyong ilhon og una, siguro inyong itubag ang gugma. Kana maglakip sa Iyang kalooy, kamabination, gugmang putli, debosyon, pagpasaylo, kalooy, hustisya ug daghan pa. Si Jesus nahigugma sa Iyang Amahan ug Inahan (tan-awa sa Juan 19:25–27). Iyang gihigugma ang Iyang pamilya ug ang mga Santos (tan-awa sa Juan 13:1; 2 Mga Taga-Tesalonica 2:16). Iyang gihigugma ang makasasala apan gipanghimaraut ang sala (tan-awa sa Mateo 9:2; D&P 24:2). Ug Iyang gitudlo unsaon nato pagpakita sa atong gugma Kaniya. Siya miingon, “Kon nahigugma kamo kanako, inyong pagatumanon ang akong mga sugo” (Juan 14:15). Dayon, aron paghatag og gibug-aton nga ang Iyang gugma walay gipili, Siya midugang, “Kon tumanon ninyo ang akong mga sugo, magpabilin kamo sa akong gugma; maingon nga gituman ko ang mga sugo sa akong Amahan, ug nagapabilin ako diha sa Iyang gugma” (Juan 15:10; tan-awa usab sa D&P 95:12; 124:87).
Laing pagpahayag sa gugma sa atong Manluluwas mao ang Iyang pagserbisyo. Siya miserbisyo sa Iyang Amahan, ug sa mga tawo nga Iyang gikauban ug gikatrabaho. Niining duha ka paagi kita mosunod sa Iyang ehemplo. Kita moserbisyo sa Dios, “paglakaw sa tanang mga dalan niya, ug ang paghigugma kaniya” (Deuteronomio 10:12; tan-awa usab sa 11:13; Josue 22:5; D&P 20:31; 59:5). Ug kita mohigugma sa atong silingan pinaagi sa pagserbisyo kanila (tan-awa sa Mga Taga-Galacia 5:13; Mosiah 4:15–16). Sugdan nato sa atong pamilya. Ang gugma nga nagbugkos sa mga ginikanan sa ilang mga anak mamugna pinaagi sa pagserbisyo nila sa panahon nga hingpit pa silang magsalig. Sa kaulahian ang buotang mga anak may kahigayonan sa pagsukli nianang gugma kon sila moserbisyo sa ilang tigulang nga mga ginikanan.
Mga Ordinansa
Ang ikaduhang aspeto sa sulundong kinabuhi sa Manluluwas mao ang Iyang paghatag og gibug-aton sa sagradong mga ordinansa. Atol sa Iyang mortal nga pagpangalagad Iyang gipakita ang importansya sa mga ordinansa sa kaluwasan. Siya gibunyagan ni Juan sa Suba sa Jordan. Gani si Juan nangutana, “Ngano?”
Si Jesus mipasabut, “Itugot lang kini karon, kay angay kanato ang pagbuhat niini aron sa pagtuman sa tibuok pagkamatarung” (Mateo 3:15; emphasis gidugang). Dili lang ang ordinansa mahinungdanon, ang ehemplo nga gipakita ni Jesus ug Juan mahinungdanon usab.
Sa wala madugay gipasiugda sa Ginoo ang ordinansa sa sakrament. Iyang gipasabut ang simbolo sa sakrament ug gipahigayon ang sagradong mga simbolo ngadto sa Iyang mga disipulo (tan-awa sa Mateo 26:26–28; Marcos 14:22–24; Lucas 24:30).
Ang atong Langitnong Amahan mitudlo usab kabahin sa mga ordinansa. Miingon Siya: “Ikaw kinahanglan pa matawo pag-usab ngadto sa gingharian sa langit, sa tubig, ug sa Espiritu, ug malimpyohan pinaagi sa dugo, gani sa dugo sa akong Bugtong Anak; nga ikaw mabalaan gikan sa tanan nga sala, ug motagamtan sa mga pulong sa kinabuhi nga dayon niini nga kalibutan, ug kinabuhi nga dayon sa kalibutan nga moabut, gani sa imortal nga himaya” (Moises 6:59).
Human sa mortal nga pagpangalagad sa Manluluwas, ang mas taas nga ordinansa para sa kahimayaan gipadayag (D&P 124:40–42). Siya mihatag ining mga ordinansa sa Iyang balaang mga templo. Sa atong panahon, ang paghugas, pagdihog, ug endowment [pagtuga] ihatag sa mga indibidwal nga hustong naandam (tan-awa sa D&P 105:12, 18, 33; 110:9; 124:39). Sa templo, ang indibidwal mabugkos sa iyang bana o asawa, ginikanan, ug kaliwatan (tan-awa sa D&P 132:19). Ang atong Agalon usa ka Dios sa balaod ug kahusay (tan-awa sa D&P 132:18). Ang Iyang pag-focus sa mga ordinansa usa ka gamhanang parte sa Iyang ehemplo kanato.
Pag-ampo
Ang ikatulong aspeto sa sulundon nga pangalagad sa Manluluwas mao ang pag-ampo. Si Jesus nag-ampo sa Iyang Amahan sa Langit ug nagtudlo nato unsaon sa pag-ampo. Kita mag-ampo sa Dios nga Mahangturong Amahan sa ngalan sa Iyang Anak, si Jesukristo, pinaagi sa gahum sa Espiritu Santo (tan-awa sa Mateo 6:9–13; 3 Nephi 13:9–13; Joseph Smith Translation, Matthew 6:9–15). Ganahan kaayo ko sa Pangaliya nga Pag-ampo sa Ginoo nga narekord sa Juan, kapitulo 17. Dinhi ang Anak bukas nga nakig-istorya sa Iyang Amahan alang sa Iyang mga disipulo, kinsa Iyang gimahal. Kini ang sundanan sa epektibo ug manggiloy-ong pag-ampo.
Kahibalo
Ang ikaupat nga aspeto sa ehemplo sa Manluluwas mao ang paggamit sa Iyang balaang kahibalo. Sama sa gihisgutan kaganina, daghang dili Kristiyano miila nga si Jesus usa ka bantugang magtutudlo. Sa tinuoray, Siya gyud. Apan unsay nakapalahi sa Iyang pagtulun-an? Siya ba hanas nga tigtudlo sa engineering, mathematics, o science? Isip Tiglalang niini ug sa ubang kalibutan (tan-awa sa Moises 1:33), siguradong makahimo gyud Siya. O, isip Tigsulat sa kasulatan, Siya maayong makatudlo unsaon sa pagsulat.
Ang nakalahi sa Iyang pagtulun-an labaw pa sa ubang magtutudlo mao nga Siya nagtudlo og mga kamatuoran nga may mahangturong importansya. Siya lamang ang makapadayag sa atong katuyoan sa kinabuhi. Pinaagi lang Kaniya nga atong masayran ang atong kinabuhi sa wala pa dinhi sa yuta ug ang atong potensyal sa sunod nga kinabuhi.
Kausa ang Gamhanan nga Magtutudlo miingon sa Iyang nagduha-duhang tigpaminaw nga sila may tulo ka saksi Kaniya:
-
Juan Bautista.
-
Ang mga nahimo ni Jesus.
-
Ang pulong sa Dios, ang Mahangturong Amahan (tan-awa sa Juan 5:33–37).
Dayon naghatag Siya sa ikaupat nga saksi: “Kamo nagasusi sa mga kasulatan; kay nagahunahuna man kamo nga pinaagi niini makakaplag kamo sa kinabuhing dayon: ngani kini mao nagapanghimatuod mahitungod kanako” (Juan 5:39).
Ang pulong nga hunahuna nianang hugpong sa mga pulong ingon og wala sa lugar. Apan mahinungdanon ni sa kahulugan nga gustong ipasabut sa Manluluwas. Siya nasayud nga daghan sa Iyang mga tigpaminaw naghunahuna gyud nga ang kinabuhing dayon anaa sa kasulatan. Apan nasayop sila. Ang kasulatan lang dili makahatag og kinabuhing dayon. Siyempre adunay gahum sa kasulatan, apan kana nga gahum gikan Mismo ni Jesus. Siya mao ang Pulong: Logos. Ang gahum sa kinabuhing dayon anaa Kaniya, kinsa “sa sinugdanan mao na ang Pulong, ug ang Pulong uban sa Dios, ug Dios ang pulong” (Juan 1:1; tan-awa usab sa 2 Nephi 31:20; 32:3). Dayon, tungod sa katig-a sa mga nagduhaduha Kaniya, Siya mibadlong kanila: “Dili kamo moari kanako aron unta makabaton kamog kinabuhi [nga dayon]” (Juan 5:40).
Ang Agalon makapasanap nato sa Iyang langitnong kahibalo, apan wala Niya gibuhat. Siya mitahud sa atong kabubut-on. Siya mitugot nato sa kalipay sa pagdiskobre. Siya nag-awhag nato sa paghinulsol sa atong kaugalingong mga sayop. Siya mitugot nato sa pagsinati sa kagawasan nga moabut gumikan sa atong kaandam sa pagsunod sa Iyang balaang balaod. Oo, ang paagi sa paggamit sa Iyang kahibalo naghatag kanato og ehemplo.
Paglahutay
Ang ikalima nga aspeto sa pagpangalangad sa Manluluwas mao ang Iyang pasalig sa paglahutay sa katapusan. Wala gyud Siya moundang sa Iyang buluhaton. Bisan tuod nakasinati Siya og pag-antus nga dili nato masabtan, walay Siya mohunong. Bisan pa sa grabeng mga pagsulay milahutay Siya sa Iyang buluhaton: sa pag-ula sa mga sala sa tanang katawhan. Ang iyang katapusang pulong samtang gilansang Siya sa krus mao ang, “Tapos na” (Juan 19:30).
Paggamit niini sa Atong Kinabuhi
Kining lima ka aspeto sa Iyang pangalagad magamit sa atong kinabuhi. Sigurado nga ang labing maayo nga ebidensya sa atong pagsimba ni Jesus mao ang pagsunod Kaniya.
Kon kita makaamgo kon si kinsa si Jesus ug unsa ang Iyang nabuhat alang kanato, kita makasabut sa pipila ka matang, sa rason sa una ug dako nga sugo: “Higumaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog” (Marcos 12:30). Buot ipasabut, ang tanan natong hunahunaon, buhaton ug isulti, kinahanglang tugub sa atong paghigugma Kaniya ug sa Iyang Amahan.
Pangutan-a inyong kaugalingon, “May gimahal ba kong labaw pa sa Ginoo?” Dayon ikompara ang inyong tubag niining mga sumbanan nga gihan-ay sa Ginoo:
-
“Ang mahigugma sa iyang amahan o inahan labaw pa kanako, dili takus kanako.”
-
“Ang mahigugma sa iyang anak nga lalaki o anak nga babaye nga labaw pa kanako, dili takus kanako” (Mateo 10:37).
Ang gugma alang sa pamilya ug mga higala, matalagsaon man kini, mas molawom kon nakaangkla sa gugma ni Jesukristo. Ang gugma sa ginikanan para sa anak mas makahuluganon dinhi ug sa sunod kinabuhi tungod Niya. Ang tanang relasyon sa gugma molambo diha Kaniya. Ang gugma sa atong Amahan sa Langit ug ni Jesukristo makahatag og lamdag, inspirasyon, ug kadasig sa paghigugma sa uban sa mas halangdong paagi.
Ang mga ordinansa makapa-focus sa pagserbisyo nga may mahangturong bili. Ang mga ginikanan mokonsiderar unsa nga ordinansa ang sunod nga gikinahanglan sa kada bata. Ang mga home teacher mohunahuna sa tukmang ordinansa nga sunod nga gikinahanglan sa kada pamilya nga ilang giserbisyohan.
Ang ehemplo sa Manluluwas sa pag-ampo nagpahinumdon nato nga ang personal nga pag-ampo, pag-ampo sa pamilya, ug mainampuong pagbuhat sa atong mga buluhaton sa Simbahan kinahanglang mahimong kabahin sa atong kinabuhi. Ang pagkasayud ug pagbuhat sa kabubut-on sa Amahan naghatag og talagsaong espirituhanong kalig-on ug pagsalig (tan-awa sa D&P 121:45). Diha sa kiliran sa Ginoo nga kita gustong maanaa.
Ang kahibalo “sa mga butang ingon nga sila gayud mao, ug sa mga butang ingon nga sila gayud mahimo unya” (Jacob 4:13) nagtugot kanato sa pagbuhat base sa tinuod nga mga baruganan ug doktrina. Kana nga kahibalo mopalambo sa atong batasan. Ang mga lihok nga resulta sa kahakog ug emosyon mailisan og mga lihok nga giniyahan sa rason ug katarung.
Ang pasalig nga molahutay sa katapusan nagpasabut nga dili kita magpa-release sa calling. Kini nagpasabut nga kita molahutay sa pagtinguha og angay nga tumong. Kini nagpasabut nga dili kita mawad-an og paglaum sa mga minahal nga nahisalaag. Ug kini nagpasabut nga kanunay natong imanggad ang mahangturong relasyon sa pamilya, bisan sa lisud nga mga panahon sa kasakit, kakulangan, o kamatayon.
Kinasingkasing kong nag-ampo nga ang makapausab nga impluwensya sa Ginoo makahimo og kalainan sa inyong kinabuhi. Ang Iyang misyon ug Iyang pagpangalagad makapanalangin kanato karon ug sa kahangturan.
Si Jesus Miadto sa Betania Pagka-Gabii, ni James Tissot
Babaye, Tan-awa ang Imong Anak (Stabat Mater), ni James Tissot © Brooklyn Museum, Brooklyn, New York; inset: detalye gikan sa Sa Tanaman sa Getsemani, ni Carl Heinrich Bloch
Ang Wali sa Bukid, ni James Tissot; inset: detalye gikan sa Si Kristo ug ang Adonahang Batan-ong Magmamando, ni Heinrich Hofmann, sa maayong kabubut-on sa C. Harrison Conroy Co.
Nahiusa ang Tanang Siyudad, ni James Tissot