Diha sa Dalan
Diin Maorganisar ang Simbahan
Uban namo sa pagsuhid sa importanting dapit sa kasaysayan sa Simbahan!
Kon si Maggie ug si Lily E. gustong makakita kon diin unang naorganisar ang Simbahan, dili na kinahanglang mangita sila sa layo. Anaa kini tupad sa chapel sa Fayette, New York, diin sila magsimba kada Dominggo!
Ang Simbahan wala maorganisar sa usa ka building sa simbahan, apang sa usa ka balay nga troso. Si Propeta Joseph Smith nagpuyo uban sa pamilyang Whitmer niadtong 1829. Ang orihinal nga balay wala na karon, apan kining log cabin anaa sa samang lugar.
Ang building sa simbahan ni Maggie ug Lily adunay visitor’s center nga nagpakita sa panimalay sa Whitmer ug sa espesyal nga mga butang nga nahitabo dinhi.
1. Nahuman ni Joseph Smith ang paghubad sa Basahon ni Mormon dinhi.
2. Sa gawas, dili layo sa balay, tulo ka tawo nakakita ni anghel Moroni ug sa bulawan nga mga palid. Gitawag sila og ang Tulo ka mga Saksi tungod kay nakasaksi sila, o nakakita, sa mga palid. Makita ninyo ang ilang mga pagpamatuod sa atubangan sa Basahon ni Mormon.
3. Niadtong Abril 6, 1830, mga 60 ka tawo ang mianha sa usa ka espesyal nga miting. Opisyal nga giorganisar ni Joseph Smith ang Simbahan, ug ang sakrament gipanalanginan ug gipaambit. Mao kini ang unang sakrament miting!
4. Pagkahuman sa miting, ang mga ginikanan ni Joseph Smith ug pipila ka laing mga tawo gibunyagan sa gawas.
Gilitratohan ni Brent Walton; mga paghulagway ni Robert T. Barrett © IRI; Organisasyon sa Simbahan, ni Robert T. Barrett, dili mahimong pakopyahan