Pagkakaplag og Kalipay sa Kinabuhi
Karen Rockwood, Idaho, USA
Kausa nagbasa ko sa pakigpulong sa kinatibuk-ang komperensya ni Elder Richard G. Scott sa Korum sa Napulog Duha ka mga Apostoles. Bisan tuod nakadungog ug nakabasa nako niini, usa ka hugpong sa mga pulong ang nakakuha sa akong atensyon ug nagpabilin sa akong hunahuna.
Pipila ka oras ang milabay ang akong anak, kinsa nagpuyo sa usa ka apartment uban sa iyang mga higala, mibisita kanamo. Siya nakaserbisyo og full-time nga misyon ug nakatambong og pipila ka semester sa kolehiyo. Dili siya sigurado unsay iyang eskwelahan ug unsa nga trabaho iyang sudlan. Tungod kay nasagmuyo siya ug mibati nga ang pag-eskwela, sa karon, usik sa panahon ug kwarta, wala usa siya moeskwela ug mitrabaho og full time.
Siya miingon nako nga usa sa iyang mga higala misugyot nga moadto sila sa isla sa Bahamas o sa Caribbean, magtrabaho, ug maglingaw-lingaw sa pipila ka bulan. Naghinam-hinam akong anak niini nga ideya. Nakita dayon nako ang kamadanihon niana nga kasinatian nga walay kabalaka alang sa usa ka batan-ong lalaki.
Diha dayon, akong nahinumduman ang nindot nga mensahe ni Elder Scott. Gikuha nako ang Ensign ug gibasa ang mosunod sa akong anak: “Anaa kamo dinhi sa kalibutan alang sa balaanong katuyoan. Dili aron mahangturong malingaw o kanunayng mangita og kahayahay. Anaa kamo dinhi aron masulayan, pagprobar sa inyong kaugalingon aron madawat ninyo ang dugang panalangin Dios. Gikinahanglan ang pailub aron sa pagpugong” (“Finding Joy in Life,” Ensign, Mayo 1996, 25).
Walay gisulti, gikuha sa akong anak ang magasin, milakaw, ug gibasa ang tibuok pakigpulong. Sa wala madugay gisulti niya nga dili siya modayon sa paglingaw-lingaw sa isla.
Sa igong panahon misulod siya sa police academy, dalan nga naggiya kaniya nga makaila ang iyang umaabot nga asawa. Sila nagminyo sa Templo sa Mesa Arizona ug karon nagpadako og tulo ka talagsaong mga bata. Niadtong 2010 nahuman niya ang iyang bachelor’s degree ug sa tinuoray “nakakaplag og kalipay sa kinabuhi.”
Ang gusto sa akong anak nga maglingaw-lingaw mahimong maayo nga kasinatian; apan sa laing bahin, kini mahimong makadaut sa espiritwal. Matag higayon nga mamalandong ko ining kasinatian, ang Espiritu motandog sa akong kasingkasing.
Mapasalamaton ko sa mga pulong sa propeta ug nga nadasig ko sa paghinumdom sa pagkigpulong nga nakahatag nako og giya. Mapasalamaton sab ko nga ang akong anak naminaw sa mensahero sa Ginoo ug mitugot nga mainpluwensyahan sa Espiritu. Nasayud ko nga daghang panalangin ug malumong kalooy ang moabut kon kita maminaw ug mosunod sa mga pagtulun-an sa Manluluwas ug sa Iyang mga sulugoon.