Asa Ko Makakuha og Magasin Sama Niini?
Sharon Rather, Nevada, USA
Samtang nagbiyahe uban sa akong pamilya sa Nevada, USA, ngadto sa Alaska, USA, nakaistorya nako ang taas, gwapa, mahigalaong babaye sa atbang sa agianan.
Siya nangutana nako kon asa ko padulong, ug gitubag siya nga padulong mi sa Juneau, Alaska, sa pagbisita sa among anak ug iyang pamilya. Miingon siya nako nga gikan siya sa Las Vegas. Dayon, nahimong emosyonal, misulti siya nga moadto siya sa Juneau aron bisitahon iyang mga in-law aron mopahigayon og memorial service para sa iyang bana, nga iyang nakauban sulod sa 20 ka tuig. Bag-o lang siyang namatay tungod sa kanser.
Mitan-aw ko sa atbang ug naghunahuna kon unsa ko ka swerte nga nasayud sa plano sa kaluwasan ug nahimong temple worker sa Templo sa Las Vegas Nevada. Naghunahuna ko unsay akong mahimo sa paghupay kaniya.
Sa kalit lang, klaro kaayo, nakahinumdon ko sa kutlo ni Propeta Joseph Smith nga akong gihatag sa Relief Society. Dihang iyang giorganisar ang Relief Society, iyang naobserbahan nga ang mga sister “magdali-dali sa paghupay sa estranghero; mobu-bu nila og lana ug bino sa nasamdan nga kasingkasing sa naglisud; mopauga sila sa luha sa nailo ug himoon nga malipayon ang kasingkasing sa mga biyuda” (Mga Pagtulun-an sa mga Presidente sa Simbahan: Joseph Smith [2007], 547).
Mitan-aw ko pag-usab sa atbang. Nakita nako ang estranghero nga naglisud, biyuda nga nagsubo. Nakahinumdom ko nga nakabasa ko sa Hulyo 2011 nga Ensign sayo nianang buntag. Kini adunay makapadasig nga mga artikulo nga naghunahuna ko nga makadasig ug makahupay niya.
Nagmaisugon ko, giablihan ang artikulo diha sa magasin, ug mihangyo niya nga basahon kini. Gitan-aw nako siya pag-ayo ug natingala nga gibasa gyud niya ang tanang linya—sa matinguhaon nga paagi. Dihang nahuman siya, nagbasa siya og laing artikulo.
Klaro nga may nakatandog sa iyang kasingkasing. Iyang gigakos pag-ayo ang magasin sa iyang dughan ug gipahiran ang luha sa iyang mata.
“Asa ko makakuha og magasin sama niini?” nangutana siya. Giingnan nako siya nga iyaha nato. Dayon nagpadayon siya sa pagbasa.
Dihang miabut mi sa Juneau, iyang gigunitan akong kamot, mitutok sa akong mata, ug miingon, “Salamat.”
Nakakat-on ko og dakong leksyon gikan niadtong kasinatian. Kita napalibutan og mga estranghero nga nagsubo kinsa nanginahanglan og pulong sa pagdasig ug nanginahanglang masayud unsa atong nasayran isip mga Santos sa Ulahing mga Adlaw.