Pagtubag sa Tawag sa Dugang nga mga Misyonaryo: Pagpalambo og Misyonaryong Panghunahuna diha sa Panimalay ug sa Simbahan
Si Bishop Victor Nogales sa Parque Chacabuco Ward, Buenos Aires Argentina Congreso Stake, naglingkod sa atubangan sa bulletin board nga napuno sa mga litrato sa 37 ka batan-ong mga lalaki ug mga babaye sa iyang ward. Kon dunay usa nila nga magmisyon, magbutang siya og mubo nga sulat duol sa litrato niini.
“Ang akong kabatan-onan madasig kaayo kon sila mosulod sa akong opisina ug makakita sa mga litrato ug mga mubo nga sulat,” miingon siya. “Nagdasig kini nila sa pagpangandam alang sa ilang kaugalingong mga misyon.”
Kini nga ward sa Buenos Aires mipabati sa espiritu sa misyonaryo nga buhat. Sa unang unom ka bulan sa 2012, 19 ka kabatan-onan—14 nila mga kinabig—mibiya sa ilang panimalay aron moserbisyo og full-time nga misyon sa walo ka mga nasud. Sobra sa 80 porsyento sa kabatan-onan ang mipasalig nga moserbisyo og mga misyon.
Karong bag-o ang mga lider sa Simbahan nanghangyo nga daghang mga batan-on ang moserbisyo og mga misyon.
Atol sa Abril 2005 nga kinatibuk-ang komperensya, human dayon gipagawas sa Simbahan ang Isangyaw ang Akong Ebanghelyo: Usa ka Giya sa Misyonaryo nga Pangalagad, si Elder M. Russell Ballard sa Korum sa Napulog Duha ka mga Apostoles mitambag sa mga pamilya ug mga lider sa pagpalambo og misyonaryo nga espiritu ug moandam og daghang batan-ong mga lalaki ug mga babaye sa pagserbisyo nga madungganon pinaagi sa pagtabang nila nga makasabut kinsa sila ug pinaagi sa pagtudlo sa doktrina kanila (tan-awa sa “Usa Pa,” Liahona, Mayo 2005, 69).
Si Presidente Thomas S. Monson mipahibalo atol sa Oktubre 2012 nga kinatibuk-ang komperensya nga ang edad sa misyonaryo paubsan nga nahimong laing pahinumdom nga ang Ginoo nagdali sa Iyang buhat.
Karon daghang mga pamilya ug mga lider sa Simbahan nagseryoso niini nga mensahe ug nag-establisar og nindot nga tradisyon sa misyonaryo nga pagserbisyo sa ilang mga dapit.
Pagtabang sa Kabatan-onan nga Makasabut Kinsa Sila
Sa pagtubag sa pangutana, “Giunsa man nimo sa pag-andam sa daghan kaayo nimong kabatan-onan nga andam nga magmisyon?” Si Bishop Nogales mitubag, “Sa dihang gitawag ko sa pagka-bishop, ang una nakong gitagad mao ang mga batan-on sa akong ward, ug akong giklaro sa ubang mga lider sa ward nga kinahanglang mahimo kaming kabahin sa ilang mga kinabuhi.”
Sama pananglit, ang tanang Chacabuco nga mga misyonaryo adunay mga calling sa ward sa wala pa sila molarga. Sa kasagaran ang bag-ong mga kinabig ug dili kaayo aktibo nga mga miyembro giimbitar sa pagserbisyo isip mga magtutudlo, nga nakatabang nila sa pagpangandam sa pagtudlo sa ebanghelyo.
Si Bishop Nogales usab nakigsabut sa kabatan-onan aron makaandam sa espirituhanong paagi alang sa misyon pinaagi sa pagpakuyog nila sa lokal nga mga full-time nga mga misyonaryo.
Samtang ang lokal nga mga lider ug mga miyembro sa Simbahan mipasalig sa ilang mga kaugalingon ngadto sa kabatan-onan sa ward, gigantihan sila nga nakakita nga mitubo pag-ayo ang diwa sa misyonaryo.
Pamilya nga Missionary-Minded [Misyonaryo og panghunahuna]
Si Garth ug Eloise Andrus sa Draper, Utah, USA, nakahibalo unsay gipasabut sa pamilya nga misyonaryo og panghunahuna. Sila dunay 17 ka mga apong lalaki nga nakaserbisyo og mga misyon, ug sila mismo nakaserbisyo og unom ka mga misyon.
Ang pagpalambo og diwa sa misyonaryo nga pagserbisyo sa inyong pamilya maoy butang nga magsugod gikan sa panahon nga ang mga bata gagmay pa, miingon si Brother Andrus.
Miuyon si Sister Andrus. “Dili ninyo pasagdan nga hilom lang nga paabuton ang pagserbisyo og misyon, apan sultihan ninyo ang inyong mga anak ug mga apo mahitungod niini nga dili na kini usa pa ka pangutana—sa imong pag-adto sa imong misyon, dili kon” miingon siya.
Ang pagtudlo sa kabatan-onan kinsa sila pinaagi sa pagpakita og ehemplo sa misyonaryo nga pagserbisyo importante usab. Si Brother ug Sister Andrus midawat sa ilang unang tawag niadtong 1980, sa pagbiya gyud sa ilang kinamanghurang anak nga lalaki sa misyon.
Usa ka apo nga lalaki ang misulat nila human makadawat og regalo nga ilang gipadala aron sa pagtabang niya sa pagpangandam alang sa iyang misyon. “Nagpasalamat siya namo [sa regalo], apan siya miingon, ‘Ang mas importante mao ang pagpasalamat kaninyo sa ehemplo nga inyong gipakita,’” miingon si Sister Andrus.
Pagtudlo sa Doktrina.
“Ang atong kabatan-onan adunay katungod sa pagdahum nga ang ilang mga ginikanan ug mga lider ug mga magtutudlo sa Simbahan mosiguro nga sila nasayud ug nakasabut sa ebanghelyo ni Jesukristo,” miingon si Elder Ballard. “Ang Espiritu Santo mokumpirmar sa kamatuoran diha sa ilang mga kasingkasing ug modagkot sa Kahayag ni Kristo sa ilang mga kalag. Ug dayon kamo adunay usa pa ka hingpit nga andam nga misyonaryo” (M. Russell Ballard, “Usa Pa,” 71).
Mga 6,000 ka milya (9,600 km) gikan sa Buenos Aires, ang rural Horseshoe Bend Branch duol sa Boise, Idaho, USA, nakakita usab og makapadasig nga pagsaka sa misyonaryo nga pagserbisyo sa dihang ang mga pamilya ug mga lider mipalambo sa ilang mga paningkamot sa pagtudlo sa ebanghelyo ngadto sa ilang kabatan-onan.
Gikan sa gamay nga branch sa 75 ka miyembro, siyam ka mga batan-on ang nagserbisyo og mga misyon.
Si Elder Russell M. Nelson sa Korum sa Napulog Duha ka mga Apostoles mipasabut sa mga rason sa pagserbisyo ug benepisyo sa pagserbisyo. “Ang tanang mga misyonaryo … nagserbisyo nga ang bugtong paglaum mao ang mas mapaayo ang kinabuhi sa ubang tawo,” siya miingon. “Ang desisyon sa pagserbisyo og misyon makahulma sa espiritwal nga kapaingnan sa misyonaryo, sa iyang kapikas, ug sa ilang kaliwatan nga moabut. Ang tinguha sa pagserbisyo mao ang natural nga resulta sa pagkakabig, pagkatakus, ug pagpangandam” (“Pangutan-a ang mga Misyonaryo! Makatabang Sila Kaninyo!” Liahona, Nob. 2012, 18).
Si Martin Walker, presidente sa Emmett Idaho Stake, miuyon. “Ang pagserbisyo og misyon makapabutang sa usa ka batan-on sa saktong dalan nga makaapekto sa mga henerasyon,” miingon siya. “Isip usa ka stake, gibuhat namo ang tanan sa pag-andam sa mga batan-on alang sa misyonaryo nga pagserbisyo.”
Kabahin niana nga pagpangandam naglakip sa pagtudlo sa kabatan-onan sa doktrina. Ang kabatan-onan sa Horseshoe Bend Branch makatambong sa sinemana nga klase sa pagpangandam sa misyonaryo nga gitudlo sa kanhi presidente sa misyon—pagbansay nga nakadugang sa pagbansay sa misyonaryo nga gihimo sa stake sa binulan nga miting sa pagpangandam sa misyonaryo ug sa tinuig nga Aaronic Priesthood Camp.
Si LaRene Adam—usa sa unom ka anak nila ni Brother ug Sister Andrus—nagserbisyo dungan sa iyang bana, nga si Jim, didto sa Copenhagen Denmark Mission gikan sa 2007 hangud 2009. Mipamatuod siya sa kaimportante sa pagtudlo sa mga bata sa ebanghelyo diha sa panimalay.
“Usa sa labing importanting mga butang nga inyong mahimo aron sa pagtabang nga malig-on ang pagpamatuod sa inyong mga anak sa misyonaryo nga buhat mao ang paghimo sa inyong family home evening ug pagtuon sa kasulatan isip pamilya,” miingon siya. “Kon hatagan ninyo sila nianang lig-on nga basehanan sa pagtuon sa ebanghelyo ug kahibalo sa ebanghelyo, mas makapangandam sila pag-ayo ug makahibalo og daghan mahitungod sa ebanghelyo.”
Si Bishop Victor Nogales nagbarug diha sa bulletin board nga nagpakita sa tanang kabatan-onan sa iyang ward, lakip niadtong nagserbisyo og mga misyon karon.
Litrato pinaagi sa maayong kabubut-on ni Paul L. Garvin