Tibuok Kalibutan nga Pagbansay sa Pagpangulo—Bag-ong Paagi
Sa umaabut nga mga bulan, ang mga miyembro sa Simbahan sa tibuok kalibutan moapil sa makadasig nga bag-ong paagi sa Tibuok Kalibutan nga Pagbansay sa Pagpangulo.
Dili sama sa nangaging mga miting sa pagbansay, ang Tibuok Kalibutan nga Pagbansay sa Pagpangulo karong tuiga dili isibya nga kausa lang alang sa mga lider sa ward ug stake. Hinoon, gibahin kini ngadto sa siyam ka mugbo nga mga bahin—sa DVD ug sa LDS.org—nga makapaawhag og diskusyon sa tanang mga lider, mga miyembro, ug mga pamilya niining umaabut nga tuig ug sa mosunod.
Ang focus sa pagbansay mao ang “Paglig-on sa Pamilya ug sa Simbahan pinaagi sa Priesthood.” Sa pagbansay, ang mga sakop sa Unang Kapangulohan ug sa Korum sa Napulog Duha ka mga Apostoles, uban sa laing mga General Authority ug kinatibuk-ang mga opisyal, mohatag og dinasig nga intruksyon sa:
-
Sa unsa nga paagi nga ang mga pamilya makakaplag og kalig-on ug kalinaw pinaagi sa gahum sa priesthood.
-
Unsaon sa pagtabang sa kada pamilya nga makasinati sa mga panalangin sa priesthood.
-
Sa unsa nga paagi nga kadtong naghupot sa mga yawe sa priesthood makapalig-on sa mga panimalay ug mga pamilya.
-
Unsaon sa pagpangalagad sa Kristohanong mga paagi.
-
Unsaon sa pagpadako sa mga anak diha sa kahayag ug kamatuoran
Ang tanang mga unit sa Simbahan makadawat og mga kopya sa DVD, ug ang mga ward ug stake council gihangyo sa pagtan-aw niining tanan. Magtinambagay dayon sila kon unsaon sa pagtabang ang mga miyembro sa ward ug stake nga makabenepisyo gikan niini nga instruksyon.
Sa mga miting ug sa mga klase, ang mga miyembro makatan-aw ug makahisgot sa indibidwal nga mga bahin sa DVD. Ang mga pamilya ug mga indibidwal makatan-aw sa mga bahin, uban sa dugang nga mga kapanguhaan aron sa pagpalambo sa ilang pagtuon, sa wwlt.lds.org.
Sa matag kahimtang, ang labing gamhanang bahin sa pagbansay mahitabo pagkahuman sa usa ka bahin ug ang diskusyon magsugod. Samtang ang mga lider, mga miyembro, ug mga pamilya mamalandong, mopaambit, ug mopamatuod sa unsay ilang nakat-unan ug gibati, ang Espiritu Santo modasig ug motudlo nila unsaon sa paggamit sa intruksyon sa ilang kaugalingong kahimtang. Pinaagi niini nga mga kasinatian, kining Tibuok Kalibutan nga Pagbansay sa Pagpangulo makatabang sa pagpalig-on sa mga pamilya ug sa Simbahan sa tibuok kalibutan.
Elder L. Tom Perry, Elder Donald L. Hallstrom, ug Bishop Dean M. Davies modumala sa panel discussion sa kaimportante sa paggamit sa mga yawe sa priesthood.
Nagtindog sa balay ni Mary Fielding Smith sa This Is the Place Heritage Park, sila Elder M. Russell Ballard, Linda K. Burton, Elder Ronald A. Rasband, Elaine S. Dalton, Rosemary M. Wixom, ug Bishop Gary E. Stevenson mohisgot sa mga panalangin nga adunay priesthood sa kada panimalay.