Pagtubo diha sa Tambok nga Yuta: Matinud-anong Kabatan-onan sa Uganda
Si Cindy Smith nagpuyo sa Uganda samtang ang iyang bana nagtrabaho didto, ug sila nagpuyo na karon sa Utah, USA.
Sa ilang pagdawat ug pagsunod sa ebanghelyo ni Jesukristo, ang kabatan-onan sa Uganda nakakita sa hugot nga pagtuo ug paglaum nga milambo sa ilang palibut.
Sa tunga-tunga sa East Africa, ang matahum nga nasud sa Uganda dunay nindot kaayo nga mga kabungturan sa mga tubo ug punoan sa saging—ug uban sa kabatan-onan nga andam sa pagdawat ug pagpuyo sa ebanghelyo ni Jesukristo.
Ang unang stake sa Uganda na-organisar niadtong 2010. Ang Simbahan kusog nga mitubo, nga dunay daghang mga batan-ong lalaki ug babaye sa kada ward ug branch.
Pagpakayab og Bandera, Ang Pagkaehemplo
Ang batan-ong mga babaye sa usa ka ward nadasig sa mga pagtulun-an ni Sister Elaine S. Dalton, Kinatibuk-ang Presidente sa Young Women, kabahin sa hiyas: “Karon mao ang panahon alang sa matag usa kanato sa pagtindog ug pagpakayab og usa ka bandera ngadto sa kalibutan magtawag sa pagbalik ngadto sa pagkahiyasnon.”1 Ang batan-ong mga babaye nagbaktas sa bungtod nga nag-umbaw sa lungsod ug mipatindog og bulawan nga mga bandera nga nagsimbolo sa ilang panumpa nga mahimong ehemplo sa hiyas. Silang tanan nanganta og “High on the Mountain Top” (Hymns, nu. 5).
Kining batan-ong mga babaye mipatindog sa ilang personal nga mga sumbanan sa pagkamatarung. Ang ilang pagkamasulundon nakapalig-on sa ilang mga pagpamatuod ug nakaimpluwensya sa uban. Miingon si Sister Dalton, “Kamo dili mopaubos sa gahum sa inyong matarung nga impluwensya.”2 ug sama sa bandera, ang ehemplo niining batan-ong mga babaye nagkayab sa tibuok kalibutan.
Sandra
Sama sa daghang batan-ong mga babaye sa Uganda, si Sandra maglakaw og sobra sa usa ka milya padulong sa simbahan, motabang sa paglimpyo sa meetinghouse sa matag Biyernes, ug matag sabado motambong og seminary. Sa semana, mobangon siya sa wala pay alas 5:00 sa buntag aron sa pagbasa sa mga libro sa eskwelahan, ug dayon molakaw padulong sa eskwelahan, mopauli pagka alas 6:00 sa gabii. Nakaundang siya sa pag-eskwela og usa ka tuig tungod sa kalisud sa kwarta apan iyang giatubang ang mga hagit uban sa positibo nga kinaiya. “Ang ebanghelyo nakatabang gayud nako nga magpabilin nga makanunayon ug dili matarug.”
Si Sandra mao lang ang miyembro sa ilang balay, apan ang iyang mga ginikanan nagsuporta niya sa iyang pagserbisyo sa Simbahan, sama sa pagtabang kon ang ward manglimpyo sa nataran sa usa ka lokal sagupanan. Nakakita ang iyang pamilya kon sa unsa nga paagi nga ang ebanghelyo nakatabang niya nga magmalig-on, bisan kon mag-atubang og wala masulbad nga mga problema. Namalandong sa tinubdan niana nga kalig-on, miingon si Sandra, “Kon moadto ko sa simbahan, akong gibati nga nagsul-ob sa hinagiban sa Dios” (tan-awa sa Mga Taga-Efeso 6:11–17).
Usa ka bag-o pa kaayo nga kinabig, si Susan, ganahan sa Simbahan. Sa una gikan sa South Sudan, ang iyang pamilya miikyas sa kalisud ug napanalanginan sa pagdawat sa mga misyonaryo sa Uganda. Isip usa ka refugee, nakakaplag siya og kalinaw ug proteksyon sa ebanghelyo. Sa mga Dominggo iyang dad-on ang iyang mga manghud ngadto sa simbahan, ingon man ang laing 10 ka mga bata nga dili mga miyembro sa Simbahan. Human sa wala damha nga kamatayon sa usa ka sakop sa pamilya, mibalik siya ngadto sa South Sudan, diin siya naghulat nga maestablisar ang Simbahan sa iyang dapit. Sila si Susan ug Sandra nag-atubang og mga hagit, apan misalig sila sa Dios ug nakatagamtam sa mga bunga sa pagsunod sa ebanghelyo ni Jesukristo (tan-awa sa Alma 32:6–8, 43).
Pagsakripisyo aron Moserbisyo og Misyon
Ang batan-ong mga lalaki sa Uganda nagsugod sa pagdula og football sa mga bata pa, naggamit og maayo kaayo pagkalingin nga mga sanga para sa bola. Sukad pa sa iyang pagkabata, si Dennis adunay talento sa sport, ug ang iyang high school mihatag niya og scholarship sa pagdula alang sa ilang team. Human makakompleto sa high school, usa ka propesyonal nga team mitanyag niya og sweldo, libring balay ug pagkaon. Damgo kadto nga natinuod, apan nasayud si Dennis nga kini makababag sa iyang mga plano sa pagmisyon nianang tuiga.
Dennis
Ang tinguha ni Dennis unsay gusto sa iyang Langitnong Amahan nga iyang buhaton kusog kaayo nga dili gani siya gusto nga matintal nga magpabilin sa team kon ang panahon moabut na niya nga moserbisyo og misyon. Daghang mga tawo ang misaway sa iyang pagpili, apan si Dennis sigurado nga siya nakahimo og eksakto nga desisyon—alang sa iyang kaugalingon ug sa uban. “Ang akong duha ka mga manghud nga lalaki ug manghud nga babaye bag-o lang nabunyagan,” miingon siya. “Wala gyud ko magtuo nga ang akong igsoong babaye maminaw sa ebanghelyo. Sa dihang nakita ko nga ang Dios naghimog mga milagro sa akong pamilya, nakahatag kini nako og hayag nga paglaum sa akong umaabut.”
Sa ward ni Dennis ang batan-ong mga lalaki magtuon sa Isangyaw ang Akong Ebanghelyo kada semana. Nahimo silang team, nakigtambayayong sa full-time nga mga misyonaryo ug sa pagdala og mga higala diha sa mga miting sa Dominggo ug sa ubang mga kalihokan, lakip sa basketball ug football nga mga dula niana nga semana. Ang mga priest mibunyag sa mga higala ug ang uban mitabang sa pagtudlo uban sa mga misyonaryo. Sulod sa daghang mga tuig, kining team sa batan-ong mga lalaki nakapalig-on sa tibuok ward, ug upat nila lakip ni Dennis, nakadawat og tawag ngadto sa Kenya Nairobi Mission.
Ilang gisunod ang tambag ni Elder David A. Bednar sa Korum sa Napulog Duha ka mga Apostoles nga “mahimong mga misyonaryo bisan dugay pa ninyong isumiter ang inyong papeles sa misyon.”3 Ila kining gibuhat isip korum, ang team nga mas maayo pa kay sa bisan unsa.
Ang tanang upat ka mga misyonaryo mibuntog sa mga hagit aron makaserbisyo. Si Wilberforce mipasabut, “Hapit ako mawagtangi og paglaum sa pagmisyon [tungod sa galastuhan], apan nakabasa ko sa Mateo 6:19–20: ‘Ayaw kamo pagtigum og mga bahandi alang kaninyo dinhi sa yuta … hinonoa pagtigum kamog mga bahandi alang kaninyo didto sa langit.’ Mao nga uban sa kakugi ug pasalig, nakahimo ko sa pagtuman sa akong tumong sa pagserbisyo og full-time nga misyon. Ganahan ko nga magserbisyo og misyon. Walay laing mas maayo kay sa pagpangita pag-una sa gingharian sa langit.”
Paglaum alang sa Umaabut
Ang mga batan-on sa Uganda nagtabang sa pagtukod sa gingharian sa Dios dinhi, uban sa dakong paglaum alang sa umaabut. Bisan og wala pay templo sa East Africa, ang mga batan-on nagpaabut sa panahon nga sila mangaminyo didto sa layo nga templo. Usa ka kalihokan sa stake nag-focus sa pagpangandam sa pagsulod sa templo, ug sa pagtapos niini, usa ka sakop sa kapangulohan sa stake ang mipamatuod. “Ang Dios nahigugma kaninyo. Kamo ang umaabut sa Simbahan sa Uganda.” Kining matarung nga kabatan-onan aduna nay dako nga impluwensya.
Ang batan-ong mga lalaki ug babaye sa Uganda nagsakripisyo sa mga butang sa kalibutan alang sa mga panalangin nga molungtad sa kahangturan. Ilang gitanom ang liso sa hugot nga pagtuo ug nag-amuma niini (tan-awa sa Alma 32:33–37). Sama sa kahoy nga daghan og bunga (tan-awa sa Alma 32:42), ang kabatan-onan mipakigbahin sa kalipay sa ebanghelyo niining tambok nga yuta.
Sa ibabaw: Ang kabatan-onan nanambong og stake fireside.
Sa ibabaw: Si Susan (tunga), usa ka refugee sa Uganda, nakakaplag og kalinaw sa ebanghelyo ug midala sa iyang mga igsoon ug ubang mga bata ngadto sa simbahan.
Sa tunga: Ang batan-ong mga babaye niini nga ward nalingaw sa paghimo sa Personal nga Kauswagan.
Sa tuo: Gibiyaan ni Dennis ang iyang lugar sa propesyonal nga team sa football aron sa pagsangyaw sa ebanghelyo. Siya ug ang ubang batan-ong mga lalaki sa iyang korum sa mga priest nagsakripisyo ug mibuntog sa mga hagit sa pagsebrisyo og mga misyon.
Gilitratohan ni Cindy Smith