Mga Pangutana ug mga Tubag
“Unsaon nako sa pagpasabut sa akong higala ngano ang pagsupak sa balaod sa kaputli dili maayo nga ideya?”
Ang Langitnong Amahan gusto nga kita magmalipayon ug takus sa Iyang Espiritu, mao nga gihatagan kita Niya og mga sugo sa pagtabang nato sa pagbantay sa atong mga hunahuna, pulong, ug aksyon nga dili molapas sa angayng mga utlanan. Ang balaod sa kaputli makatabang sa gahum sa paglalang nga anaa lamang sulod sa mga sa kaminyoon. Usa ka rason nga Siya misugo nga ang gahum sa paglalang himoon lamang tali sa bana ug asawa tungod kay “ang mga anak adunay katungod nga matawo sulod sa talikala sa kaminyoon.”1
Mahimo mong mopakigbahin og kopya sa Alang sa Kalig-on sa Kabatan-onan sa inyong higala. Naghatag kini og daghang mga rason nganong maayo ang pagsunod sa balaod sa kaputli: “Kon putli kamo, inyong giandam ang inyong kaugalingon sa paghimo ug pagtuman sa sagrado nga mga pakigsaad diha sa templo. Inyong giandam ang inyong kaugalingon sa pagtukod og lig-on nga kaminyoon ug sa pagdala og mga anak nganhi sa kalibutan isip kabahin sa mahangturon ug mahigugmaong pamilya. Inyong gipanalipdan ang inyong kaugalingon sa espirituhanon ug emosyonal nga kadaot nga moabut gikan sa pagpakiglambigit og lain gawas sa kaminyoon. Gipanalipdan usab ninyo ang inyong kaugalingon gikan sa makadaot nga mga sakit. Ang pagpabilin nga putli makatabang ninyo nga masaligon ug malipayon ug makapalambo sa inyong abilidad sa paghimo og maayong mga desisyon karon ug sa umaabut.”2
Ang Templo
Ang atong Langitnong Amahan adunay balaan nga katuyoan alang natong tanan, ug kana nga katuyoan matuman diha sa templo. Kinahanglang takus kita nga mosulod sa templo aron ang atong mga pamilya mabugkos sa kahangturan. Magpuyo kita uban sa atong Langitnong Amahan pag-usab, ug labing importante makabaton kita og walay katapusan nga kalipay, nga dili maangkon sa dili takus.
Alofa M., edad 18, Samoa
Kaminyoon ug Pamilya
Giawhag kita nga magmaputli aron takus kitang makasulod sa templo ug makatuman sa sagrado nga mga pakigsaad. Kon sundon nato ang balaod sa kaputli, makahimo ta og lig-on nga kaminyoon ug pamilya sa umaabut. Anaa kanunay si Satanas nga motintal nato, apan pinaagi sa pag-ampo, mga kasulatan, ug maayong mga higala, makabuntog kita niini.
Resty M., edad 16, Philippines
Negatibo nga mga Sangputanan
Adunay daghang negatibo nga mga sangputanan sa pagsupak sa balaod sa kaputli, apan dili tanan niini inyong makat-unan sa klase sa panglawas. Ang pagsupak sa balaod sa kaputli makaabug sa Espiritu sa inyong kinabuhi, makapasakit sa inyong minahal, ug mobati mo og dili maayo sa inyong kaugalingon. Mosugyot ko nga motan-aw sa Mormon Messages video nga gitawag og “Chastity: What Are the Limits?” [sa youth.lds.org sa English, Portuguese, ug Spanish].
Matthew T., edad 17, Utah, USA
Kaputli ug Pagtahud
Pinaagi sa pagsunod sa balaod sa kaputli, magpabilin kita nga putli sa panan-aw sa Dios, atong gitahud ang atong kaugalingon, ug gitabangan ang uban sa pagtahud usab nato. Kon mosunod kita sa balaod sa kaputli, atong gipakita nga kita mga anak sa Dios ug nga kita nagsunod og taas nga mga sumbanan. Atong likayan ang pagmahay. Samtang magsunod kita sa atong Langitnong Amahan, ilabi na mahitungod niini nga balaod, mas magmalipayon kita dinhi sa kalibutan ug sa kalibutan nga moabut.
Alyana G., edad 19, Philippines
Usa ka Sagrado nga Gasa
Kon ang gasa sa paglalang og kinabuhi sayon-sayunon lang, kining bililhon nga gasa gikan sa Dios matagad nga ordinaryo lang nga butang. Ang paghatag og gasa dili mabati nga magantihon kon ang tawo nga inyong gihatagan wala maghunahuna niini nga espesyal. Kinahanglang tagdon ang paglalang sa kinabuhi nga sagrado; kay kitang tanan mga templo sa Dios ug kinahanglang magpabilin nga limpyo ug putli sama sa templo.
Jaron Z., edad 15, Idaho, USA
Ang Espiritu uban Nato
Kon magpabilin kamong limpyo gikan sa sala, mas magmalipayon ug mapanalanginan kamo. Ang atong mga lawas sama sa mga templo, ug ang Langitnong Amahan “dili mopuyo sa dili balaan nga mga templo” (Alma 7:21). Mao nga kon magpabilin nga limpyo gikan sa sala, ang Espiritu mopuyo uban nato.
Maryann P., edad 14, Arkansas, USA
Importante nga mga Pangutana
Tubaga ang mga pangutana sa inyong mga higala pinaagi sa pagpangutana: “Unsa kaha kon ang inyong umaabut nga kapikas nagtan-aw ninyo karon?” Ang tanang mga tawo nga akong nadunggan nga nakasupak sa balaod sa kaputli nagbasol niini. “Unsa kaha kon ang inyong umaabut nga anak mangutana kon nakasupak ba kamo sa balaod sa kaputli?” Ang inyong mga higala kinahanglang makasabut unsa ka importante ang balaod sa kaputli karon, sa dili pa ang anak mangutana niana nga pangutana. Kinahanglan kamong limpyo ug putli aron magpuyo og malipayon, himsog nga kinabuhi nga wala makasupak sa sagrado nga balaod.
Robyn K., edad 13, Utah, USA
Hiyas ug Kaputli
Ang Ginoo nahimuot sa hiyas ug kaputli, ug ang tanan kinahanglang mahitabo sa eksakto nga panahon. Ang balaod sa kaputli usa ka sugo sa Ginoo. Ang pag-ampo ug pagpakig-uban sa Espiritu mao ang hingpit nga kombinasyon nga makahibalo nga ang pagkaputli usa ka panalangin.
Selene R., edad 18, Nicaragua
Diha sa Kaminyoon
Akong ipasabut sa akong higala nga ang pagsupak sa balaod sa kaputli dili maayo nga ideya tungod kay ang gahum sa paglalang og kinabuhi himoon lamang alang sa legal nga naminyo nga mga magtiayon. Kon makasupak kita sa balaod sa kaputli, mawala sa atong kinabuhi ang Espiritu Santo.
Augustina A., edad 15, Ghana