Nganong Nagkinahanglan Kita sa Basahon ni Mormon

Balaan nga Biblia, Ang Basahon ni Mormon

Paghulagway pinaagi ni Bryan Beach; video capture © 2001 IRI

Ang ubang mga tawo tingali mangutana ninyo nganong nagkinahanglan kita sa Basahon ni Mormon nga duna na man kitay Biblia. Gani, si Jesukristo mipamatuod nga mahitabo kini (tan-awa sa 2 Nephi 29:3). Adunay daghang mga rason ngano nga ang Basahon ni Mormon importante sa atong panahon (pananglit tan-awa sa 2 Nephi 29:7–11). Aniay pipila lang ka mga rason nganong importante kini.

Laing Saksi ni Jesukristo

Ang mga kasulatan nagpakita nato sa sumbanan sa paggamit og daghang mga saksi sa pag-establisar sa kamatuoran sa Simbahan ni Kristo. Ang Basahon ni Mormon nagdugang og ikaduhang saksi sa Biblia isip pagpamatuod ni Kristo. Si Elder Mark E.Petersen (1900–84) sa Korum sa Napulog Duha ka mga Apostoles sa makausa miingon, “Ang importanting rason nga kita aduna sa Basahon ni Mormon mao nga sa ba-ba sa duha o tulo ka mga saksi ang tanang mga butang maestablisar. (Tan-awa sa 2 Mga Taga- Cor. 13:1.) Kita adunay Biblia, kita usab adunay Basahon ni Mormon.Naglangkob kini sa duha ka tingog—duha ka libro sa kasulatan—gikan sa duha ka nagkalagyo nga karaang mga tawo, nagpamatuod sa pagkabalaan ni Ginoong Jesukristo.”¹ Si Presidente Ezra Taft Benson (1899–1994) midugang, “Kinahanglang dili kita makalimot nga ang Ginoo mismo mihatag sa Basahon ni Mormon isip Iyang importanting saksi.”²

Ang Kahingpitan sa Ebanghelyo

Nasayud kita nga ang “yano ug bililhon nga mga butang … gikuha gikan” sa Biblia (1 Nephi 13:40). Ang Basahon ni Mormon nagklaro sa doktrina ni Kristo ug nagdala pag-usab sa kahingpitan sa ebanghelyo dinhi sa yuta (tan-awa sa 1 Nephi 13:38–41). Pananglit, ang Basahon ni Mormon nagtabang nato sa pagkahibalo nga ang bunyag ipahigayon pinaagi sa pagpaunlod (tan-awa sa 3 Nephi 11:26) ug nga ang gagmay nga mga bata dili kinahanglang bunyagan (tan-awa sa Moroni 8:4–26).

Importante ngadto sa Gipahiuli nga Simbahan

Si Joseph Smith nagmatuod nga ang Basahon ni Mormon mao “ang sukaranan sa atong tinuohan.”³ Sukad nakahibalo ta niini, ingon og dili sulagma lang nga Ang Simbahan ni Jesukristo sa mga Santos sa Ulahing mga Adlaw na-organisar niadtong Abril 6, 1830, nga 11 ka adlaw human gisugdan pagbaligya ang Basahon ni Mormon niadtong Marso 26, 1830. Ang Simbahan wala maorganisar hangtud ang sukaranang kasulatan anaa na alang sa mga miyembro.

Usa ka Panalangin sa Atong mga Kinabuhi

Kabahin sa Basahon ni Mormon, mitudlo si Joseph Smith nga “ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”⁴ Kini adunay gahum sa pag-usab sa mga kinabuhi—lakip sa inyong kinabuhi ug niadtong inyong gihatagan sa Basahon ni Mormon. Si Presidente Henry B. Eyring, Unang magtatambag sa Unang Kapangulohan, mipamatuod, “Ang epekto sa Basahon ni Mormon sa inyong kinaiya, gahum ug kaisug nga mahimong saksi alang sa Dios sigurado. Ang doktrina ug ang maisugong mga ehemplo niana nga libro mobayaw, mogiya, ug moawhag ninyo. … Ang mainampoong pagtuon sa Basahon ni Mormon makapalig-on sa pagtuo diha sa Dios nga Amahan, sa Iyang Hinigugmang Anak, ug sa Iyang ebanghelyo. Makalig-on kini sa inyong pagtuo sa mga propeta sa Dios, karaan ug moderno. … Makapaduol kini kaninyo ngadto sa Dios kay sa bisan hain nga basahon. Makausab kini og kinabuhi alang sa maayo.”⁵

Mubo nga mga sulat

1. Mark E. Petersen, “Evidence of Things Not Seen,” Ensign, Mayo 1978, 63.

2. The Teachings of Ezra Taft Benson (1988), 204.

3. Joseph Smith, sa pasiuna sa Basahon ni Mormon.

4. Joseph Smith, sa pasiuna sa Basahon ni Mormon.

5. Henry B. Eyring, “Usa ka Saksi,” Liahona, Nob. 2011, 69–70.

Duha ka Saksi

Elder Tad R. Callister

“Ang Biblia usa ka saksi ni Jesukristo; ang Basahon ni Mormon lain nga saksi. Ngano nga ang ikaduhang saksi importante kaayo? Ang mosunod nga paghulagway makatabang: Pila ka tul-id nga linya ang inyong ma-drowing agi sa usa ka tuldok diha sa papel? Ang tubag walay katapusan. Sa makadiyot, ibutang ta nga ang usa ka tuldok nagrepresentar sa Biblia ug ang gatusan ka tul-id nga linya nga madrowing agi niana nga tuldok nagrepresentar sa lain-laing paghubad sa Biblia ug ang kada hubad nagrepresentar og laing simbahan.

“Unsay mahitabo, kon nianang piraso sa papel adunay ikaduha nga tuldok nga nagrepresentar sa Basahon ni Mormon? Pila man ka tul-id nga linya ang inyong madrowing tali niining duha ka mga tuldok: ang Biblia ug ang Basahon ni Mormon? Usa lang. Usa lang ka hubad sa mga doktrina ni Kristo ang makuha sa pagpamatuod niining duha ka mga saksi.

“Pabalik-balik nga ang Basahon ni Mormon maoy mokumpirma, moklaro, mohiusa nga saksi sa doktrina nga gitudlo sa Biblia.”

Elder Tad R. Callister sa Kapangulohan sa Seventy, “Ang Basahon ni Mormon—usa ka libro gikan sa Dios,” Liahona, Nob. 2011, 75.

Pag-apil sa Pag-istoryahanay

Sa tibuok Abril magtuon kamo mahitungod sa Apostasiya ug sa Pagpahiuli sa inyong mga korum sa priesthood ug sa mga klase sa Young Women ug Sunday School (kon ang inyong ward o branch adunay bag-o nga mga leksyon sa inyong pinulongan). Ang pagtungha sa Basahon ni Mormon usa ka importante nga bahin sa Pagpahiuli. Human makabasa niini nga artikulo, hunahunaa kon unsa ka lahi ang inyong kinabuhi tungod kay kamo adunay Basahon ni Mormon. Isulat ang inyong mga pagbati sa inyong journal ug hunahunaa ang pagpakigbahin niini ngadto sa uban pinaagi sa pagpamatuod sa inyong balay, sa simbahan, o sa sosyal nga media.

Mga Leksyon sa Dominggo

Ang Hilisgutan Niining Bulana: Ang Apostasiya ug ang Pagpahiuli