100 te Ririki ibukin Bootakin te Utu n te Tairiki
N te namwakaina aei e a tia n riki bwa te tebubua te ririki man te tai are a kaungaiia iai membwa te Moan Beretitentii bwa a na kakaraoa bootakin te utu n te tairiki. Mwakoron te rongorongo ae i mwiina e roko man aia reta Moan Beretitentii ni kabwarabwara bootakin te utu n te tairiki. E otinako n Eberi 1915 ao ni boretiaki n te Improvement Era n Tuun 1915 (iteraniba 733–34). Kamanibuburan ao kanikinaean taekaia a tia ni kabouaki.
Anganano n te tamnei ibukin ana Raiburari Rongorongon te Ekaretia
Tarira ao Mwaanera aika kam tangiraki:
Ti reireiniia Aomata aika Itiaki bwa a na kawakina riki ana tua te Uea are e anga n tiekition 68 man te Doctrine ao Covenants:
“Ngkana iai natiia kaaro inanon Tion, e toka te bure iaon atuuia kaaro ngkana a aki reireiniia natiia bwa ana matata n tuan te rairannano, onimakin iroun Kristo Natin te Atua ae maiu, bwabetito, ao te bwaintituaraoi ae te Tamnei ae Raoiroi man te katoka baai ngkana e koro waniua te ririki, te bure e na toka iaon atuuia kaaro; …
Ao kaaro a riai n reireiniia natiia bwa a na tataro ao n nakonako ni karinerine imatan te Uea” [taraa D&C 68:25–28].
Natin Tion a na kawakina ni kabwanina riki ana tua te Uea are e a anganaki Iteraera ngkoa ao n taekinaki riki nakoia Aomata aika Itiaki:
“Ko na karinea tamam ma tinam: ba a aonga ni bati am bong i aon te aba ae E anganiko Iehova ae Atuam” [Te Otinako 20:12].
Kaotioti aikai e korakora maiuakinana irouia Aomata aika Itiaki, ao a kantaningaki kaaro ao tiina n te Ekaretia bwa tuua aikai a na reiakinaki ao ni maiuakinaki inanon te mweenga.
Ibukin ae ti reirei ao ti kaumaka waakinan “bootakin te utu n te tairiki” ni kabuta te Ekaretia, n te tai ike kaaro ma tiina a na botiia natiia mwaane ao ataeinaine irarikiia n te mweenga ao n reireiniia ana taeka te Uea. N te aro bwa a aonga n reiakina riki ae bwanin baika a kainnanoaki ao ni kantaningaki mairouia aia utu, n te tai naba anne bwa ngaia ma natiia a na kinai riki reirein ana euangkerio Iesu Kristo. Bootakin te utu aei e na kabotoaki iaon te tataro, kuna n taromauri, anene, katangitang, warekan booki aika tabu, atuun ana rongorongo te utu, ao kaetieti aika onoti iaon reirein te euangkerio ao kangaangan katein te maiu aei, n ai aron naba aia beku ao mwiokoaia ataei nakoia kaaro, te mweenga, te Ekaretia, bootaki, ao te botanaomata. Ibukiia ataei aika uarereke, kamatenano aika riai, anene, karaki ao takakaro a na kabwarabwaraki. Te kabuki ae bebete are e na bubura katauraoana n te mweenga e na kabutaki.
Te nakoraoi ao ae e nene e na totokoaki ma te karaurau, ao te utu ni kabane a na ira waakin te kamarurung.
Ikoikotaki aikai e na katamaroa te tai ibukin onimakinan te iwawaki imarenaia kaaro ao naati, imarenaia mwaanem ma tarim, n ai aron naba karekean te tai ibukin taeka ni kauring, reirei, ao taeka n reirei mairouia kaaro nakoia natii mwaane ao aine. E na katauraoi aia tai ataeinimwaane ao ataeinaine ni karineia tamaia ma tinaia ao ni kaota aia kakataiu ibukin kakabwaia ni mweengaia n te aro bwa ana berita te Uea nakoia e na bon kakoroaki raoi bukina ao a na kananauaki maiuia ao ni kakukureiaki. …
Ti … kaungaiia kairake n ataei bwa a na tiku inanon mweengaia n te tairiki anne ao ni kabonganai korakoraia ni kataa aia kona ni kanakoraoia, e na iai uaana (nakon maiuia), ao ni kaunga.
Ngkana a ongotaeka Aomata aika Itiaki n te reirei aei, ti berita bwa a na kaoti kakabwaia aika bati. Te tangira n te mweenga ao te ongotaeka nakoia kaaro e na rikirake. E na rikirake te onimaki inanoia kairake mai Iteraera, ao a na karekea te mwaaka ni buaka ma ana kairoro te riaboro ao ana kariiri are e mena i mwaaia.
Tarimi,
Joseph F. Smith
Anthon H. Lund
Charles W. Penrose
Moan Beretitentii