Te Aro ni Kiritian ae Itiaki
Te mwakuri n ibuobuoki ae e aki tatauti—ni mwaninga taekara, ni mwakuri kainnanoia tabeman, ao n anga maiura inanon aia mwakuri n ibuobuoki—e a tia n taainako n riki bwa aroaroia ana reirei Iesu Kristo.
Kamaataata n te Tamnei iroun Annie Henrie
Inanon Mataio mwakoro 11 te Tia Kamaiu e reireiniira te reirei ae kakaawaki man are E karaoia tiaki ti a atongnga bwa te kaeka nakon te titiraki are e tabekaki mai irouia ana reirei Ioane te Tia Bwabetito:
“Ao ngke e ongo ana mwakuri te Kristo Ioane mai nanon te auti ni kaikain, e kanakoa te taeka irouia uoman ana reirei,
“Ao e taku nako Ina, Teuare nangi roko Ngkoe, ke ti a kantaninga temanna?
“Ao E kaekaia Iesu ni kangai, Kam na nako n tuanga Ioane baika kam ongo ma n nori:
“A nooraba mataki, ao a nakonako mwauku, a kaitiakaki rebera, ao a ongotaeka taningabono, ao a kautaki mate, ao a reireiaki akana a aki kaubwai n te euangkerio” (Mataio 11:2–5).
Anga te kabwarabwara n reirei ae uarereke ni kabwarabwaraa bwa bon Ngaia, raoi, “teuare e nangi roko,” te Tia Kamaiu e kaeka man te kawai are E karaoia—Ana katooto n ana mwakuri n ibuobuoki.
Inanon te maungatabu ni kabuta n Eberi 2014, Unimwaane Richard G. Scott man te Kooram n te Tengaun ma Uoman n Abotoro e kauringiira: “Ti karaoa te kabanea n tamaroa ni mwakuri n ibuobuoki nakon Tamara are i Karawa man karaoan te mwakuri are e na rootia tabeman ao ni karaoa te mwakuri n ibuobuoki nakoia. Te katooto ae te kabanea n tamaroa are e a tia ni maiu n te aonaaba bon ara Tia Kamaiu, Iesu Kristo.”1
Te mwakuri n ibuobuoki ae e aki tatauti—ni mwaninga taekara, ni mwakurii kainnanoia tabeman, ao n anga maiura ibukin aia mwakuri n ibuobuoki—e a tia n taainako n riki bwa aroaroia ana reirei Iesu Kristo. N aron are e reiakinna te Uea are Beniamina n raka nakon te 100 ririki imwaain bungiian te Tia Kamaiu, “Ngkana kam beku ibukiia raomi ao kam bon beku naba iroun Atuami” (Motiaea 2:17).
Iakobo e kauringiira bwa aron te “aro ni Kiritian ae itiaki” ae e kakaawaki e bon kuneaki n ara beku ibukiia tabeman ngkana ti “kawariia akana a mate tamaia ma aine aika a mate buuia ngkai a rawawata” (Iakobo 1:27). “Te Aro ni Kiritian ae Itiaki” e raka riki nakon taekinana bwa tera am onimaki; bon kaotakina bwa baikara am onimaki rinanon am mwakuri.
Tangiriia Raom ni Mwananga
Inanon nuukan Turai 1984, tii tabeua te wiiki imwiin kainnabau, Carol, ao ngai ni mareaki inanon te Los Angeles California Tembora, bon iaon kawaira n nako Utah, ike N na moana iai au mwakuri ao Carol e na kabanea ana reirei n te kaoreti. Ti buti ni ka aika maenako. Imarenan kaa aika uoua, ti uotii bwaai ni kabane ake ara bwai.
Tao nuukan kawaira nakon ara tabo are ti na nako iai, Carol e kaania au kaa ao ni moanna ni karaoa te kanikina bwa a aonga n taraia. Aio inanon boong imwaain te mobwaira tareboon ao timwaati tareboon, tekiting ao Twitter. N taraan moana rinanon wintoon ana kaa, I kona n taekinna bwa e aki marurung. E taekinna bwa e kona n reitanako butina, ma I bon raraoma ibukin kaainabau ae boou.
Ngke ti a kaan n roko n te kaawa ae uarereke i Beaver, Utah, e a manga kaaniai naba, ao I kona n taekinna bwa e kainnanoa te toki. E a bon aoraki ao e aki kona n reitanako kawaina. Iai uoua kaa aika aonrake n te kunnikai ao bwaintangira ni mare, ma te kananokawaaki bwa ti teutana ara mwane. Te ruu n te outero bon akea ara kataumwane iai. I aki koaua bwa tera ae N na karaoia.
Akea mai iroura ae e a tia n roko i Beaver, ao n aki ataia raoi bwa tera ae N na taraia, ti buti tabeua te miniti ni karokoa I noora te tabo ni bwaaki. Ti nako n tei n te tabo ni bwaaki ao ni kunea te aroka ma tabeua nuuna, ike I kawenea te burangketi bwa e aonga ni wene iaona Carol.
Tabeua te miniti imwiina tewaana te kaa e buti nakon te tabo ni bwaaki are irarikira ao ni katea ana kaa irarikin ara kaa ake uowaa. Te aine, ae tao roron tinara, e otinako man ana kaa ao n titiraki ngkana iai te bwai ae riki ao ngkana e kona n ibuobuoki. E taekinna bwa e noorira ngke e buti irarikira ao n namakinna bwa e riai n toki. Ngke ti kabwarabwara arora, e waekoa ni kaoiira n iiria nakon mweengana, ike ti kona ni motirawa n aron are ti kainnanoia.
Ti a waekoa n anganaki te kainiwene ae kamwengaraoi n mweengana ae mwaitoro ae tei iaan tano inano. N te naba are ti a mweengaraoi iai, te aine ae kamiimi aio e tuangiira bwa e rawata kawaina ae e na karaoi ao ngaia are ti nang bon tiku i bon iroura inanon tabeua te aoa. E tuangiira bwa ngkana ti baki, ti butimwaeaki nakon bwaai ake ti kona ni kunei inanon te umwanikuuka, ao ngkana ti nako imwaain okina, ti na taiaoka ni kaina te mataroa are imoa.
Imwiin karekean te matu ae e rangi ni kainnanoaki, e namakina te marurung Carol ae e tamaroa riki ao ti reita kawaira n aki roko n te umwanikuuka. Ngke ti nako, te aine are e akoi e tuai ni karairaki. Nakon kamaamaeara, ti aki korea ana aetureti ao n tuai ni kaaitaua raoi ara I-Tamaria ae raoiroi, are e katoka ana kaa iaon te kawai ao ni kauka mweengana nakoia ianena ake a kainnano.
Ngke I iangoa te mwakuri aio, ana taeka Beretitenti Thomas S. Monson, are e taekina ana reirei te Tia Kamaiu n “nako ao kakairi I rouna” (tara Ruka 10:37) n aroia aomata nako, e rin n au iango: “Ti aki tangira raoi te Atua ngkana ti aki tangiriia raora n te mwananga n te maiu aei.”2
N taabo ake ti kaaitibo ma “raora ni mwananga”—iaon te kawai ke inanon mweengara, iaon te tabo n takakaro ke inanon ara reirei, inanon te tabo ni mwakuri ke n te taromauri—ngkai ti ukoukoria, n noria, ao ni mwakuri, ti na riki n ai aron te Tia Kamaiu riki, ni kakabwaiaki ao n ibuobuoki iaon te kawai.
Ukoukoria
Kamaataata n te Tamnei iroun Annie Henrie
Unimwaane Neal A. Maxwell (1926–2004) man te Kooram n Abotoro n te Tengaun ma Uoman:
“N tiaki n aron ara Tia Kamaiu ae kakawaki, ti bon koaua n aki kona ni karaoa te mwakuri ni kamaiu ibukin bureia aomata! N ikotaki ma aio, ti bon aki kona ni uota aekan nako aorakin te rabwata, mamaaraia, ao rawawataia (taraa Aramwa 7:11–12).
“E ngae n anne, iaon ara tikeera ae uarereke riki, n aron are e a tia ni kaoia Iesu, ti kona raoi ni kataia n riki ‘n ai [Arona]’ (3 Nibwaai 27:27).”3
Ngkai ti ukoukoria n riki n ai Arona, ma te nano ae koaua ni kakabwaiaia “raora ni mwananga,” ti na anganaki taai aika riai ni mwaninga ngaira ao n tabeakinia tabeman. Taai aika riai aikai a na kona n taainako n aki nakoraoi, ni katai oin nanora aika koaua a riki n ai aron riki te Tia Reirei, are e na kabanea ana mwakuri n ibuobuoki ae kakannato iaoia ni kabane, Ana Mwakuri ni Kamaiu ae akea tokina, bon te bwai ae e tau ni karaoaki. “Ma e ngae n anne,” E anga, “mimitongina nakon te Tama. E taua ao ni kabanea ana katauraoi ibukira” (taraa D&C 19:19).
Ni ukoukoria ma nanora ae koaua n riki nai aron te Tia Kamaiu e na kariaira n noora are ti na aki kona n nooria. Ara I-Tamaria are e tamaroa e kai namakin nakon te Tamnei ni kaeka nakon te wirikiriki ao ni kawara te ianena are e kainnano.
Taraa
Kamaataata n te Tamnei iroun Annie Henrie
Te nooraba ma maata n tamnei bon nooran bwaai n aroia raoi ao ni kinai kainnano ake ti na bon aki kona n noori. Inanon te kaikonaki n te tiibu ao kooti, bon akea ibuakoia ake a “kakabwaiaaki” ke ake a “karekeaki kaiia” a tia ni kinaa te Tia kamaiu irouia ake a baki, n taka, akea karabaaia, ke inanon auti ni kaikain. A kaeka nakon kaniwangaia man titiraki, “Ti nooraki n ningai?” (Taraa Mataio 25:34–44).
Tii naake a tia n nooraba ma maata n tamneia, a na kinaa te kainnano, ni mwakuri ao ni kakabwaiaia naake a korakai. Ara I-Tamaria ae raoiroi e kinaa te kainnano ngkai e taratara ma maata n tamnei.
Mwakuri
Kamaataata n te Tamnei iroun Annie Henrie
Ti kona n noori kainnano ni katobibiira ma n namakina te aki tau ni karaoa te mwakuri, n iangoia bwa tera are ti na anga ae e aki tau. Ngkana ti ukoukoria n riki n ai arona ao ngkana ti noori kainnanoia raora ni mwananga rinanon maata n tamnei, ti na bon onimaki bwa te Uea e kona ni mwakuri rinanora, ao imwiina ti na riai ni mwakuri.
N rinnakoia n te tembora, Betero ao Ioane a kaitibo ma te mwaane “ae e kaman mwauku mai biroton tinana” are e bubutiia bwaai n tituaraoi (taraa Mwakuri 3:1–3). Ana kaeka Betero bon te katooto ao te kakao nakoira n tatabemaniira nako:
“Akea au tirewa ma au koora; ma ae iai i rou ao I anganiko: Ko na nakonako n aran Iesu Kristo are te I-Natareta.
“Ao e taua ataina, ao e kateirakea” (Mwakuri 3:6–7).
Ti kona ni mwakuri man ara tai ao ara tarena ae ti anga, te taeka n akoi, ke ni karaon te mwakuri. Ngkana ti ukoukoria ao n nooria, ti na katukaki n taabo ao aaro are ti na kona ni mwakuri ao ni kakabwaia iai. Ara I-Tamaria are e raoiroi e mwakuri. E uotiira nakon mweengana ao n anganiira are iai irouna. Ae e kakaawaki e taku, “Ma ae iai irou I anganiko.” Bon ngaia raoi are ti kainnanoia.
Beretitenti Monson e a tia n anga reirei iaon koaua aika titebo ma aikai:
“Ngaira n tatabemaniira nako, inanon maiura iaon te aba, ti na mwananga n oin Kawain Ieriko. Terana ae ko na rinanona? Terana arou? N a aki nora are e bwaka ibuakoia taan iraa ao e kainnanoa au ibuobuoki? Ko na karaoia?
“N na riki bwa temanna are e noora te aomata are ikoaki ao n ongo ana buubuti, ma n teimatoa n aki ibuobuoki? Ko na karaoia?
“Ke ngai are temanna are e noora, e ongo, e tei, ao e ibuobuoki? Ko na karaoia?
“Iesu e katauraoa ara taeka ni kairi, ‘Ko na nako ao ni kakairi irouna.’ Ngkana ti ongo taeka nakon te katanoata anne, e na uki nakon ara taratara ae akea tokina te bwai ae kakukurei taraana are e karako kabotauana ao n akea ae tamaroa riki nakoina.”4
Ngkai ti rikirake n ai aron te Tia Kamaiu man ukoukorana, n taraakina, ao ni mwakuriiana, ti na karekea koauan ana taeka te Uea are Beniamina: “Ngkana kam beku ibukiia raomi ao kam bon beku naba iroun Atuami” (Motiaea 2:17).