E Wirikiriki Nakoiu te Tamnei ae Raoiroi

Christina Albrecht Earhart, Washington, USA

“Eei, naaka! Nakomai Oki!” e takarua ma te bwanaa ae korakora.

I rairaki n taraiia uoman ataeinimwaane ae tao nakon nimaua ke tao itiua aia ririki ni maiu ni biri rinanon ana tabo ni bwaake te titoa ma ranin mataia aika wawanako. E taraa n tabeaianga te tia bobwai ngke e weweteiia.

Ngke I oki nakon au kaa, e wirikiriki te Tamnei, “Ko kona n riki bwa te tia ibuobuoki ikai.” E rau man itiaki te wirikiriki bwa n te tai are i mwiina I a biri rinanon te tabo ni katei kaa nakoia ataeinimwaane.

I kunea are te ikawai n tei irarikin te minibwati ae buraaun. I kaniia ao ni katorobubua irarikina.

“Mauri. Arau bon Christina. Ko nako RAOI?”

Ngke I taekina aio, e a bon waanna bwa te tang ao e karaba ubuna ni baina. Te tia bobwai ao te ataeinimwaane are temanna a rootaki naba.

“I taku bwa a tii kona n taetae ni Buranti,” e tuangai te tia bobwai. “Ti bon kuneiia ni biri rinanon te titoa, a bua naba.”

I kaokioka au kabwarabwara nakoia ataei n te taetae ni Buranti. Au moan taetae bon te taetae ni Buranti ao I tuai man kabongana ngke I tabekaki irouia au utu n I-Matang ngke I uarereke. N ae I taneiai iai e aki rang raoiroi au taetae ni Buranti. N te tai anne, ma a bon rawerawea ongoia. A matata taeka n au iango ao bwanaau ngaia are I a karau nanoia ataeinimwaane.

Ngke e tabe n tang, te ataeinimwaane are temanna e kabaitia ni kamataata bwa ngaia ma tarina a aikoa kona ni kakaeiia aia karo ma tinaia n taabo nako n te titoa ao a birinako tinaniku ni kakaeiia. Ngke I kakauongo, I a ataia bwa ai bon kamimiira ngkai I aki tii kona n taetae ni Buranti ma ngaia I bon oota naba ao I kabebetei nanoia uoman ataeinimwaane aika maaku.

“A bua mairouia aia karo ma tinaia ao a nako n tataningaiia inanon te kaa,” I tuanga te tia bobwai. E tuangai te ataeinimwaane are e uarereke araia ana karo, are I tuanga te tia bobwai bwa e na katanoatai araia n te bwai n taetae bwa a reke ataeinimwane aikai. Tabeua te miniti i mwiina e a noora ana karo n otinako man te titoa ao ni biri n inga ma ngaia.

Ngke I ririmwiin te ataeinimwaane nakon ana karo, I kunea bwa I aki kona ni kaboo nakoina n te taetae ni Buranti. I kataia n taekina te bwai are a na kona n oota iai ataeinimwaane aikai, ma ai akea riki taeka aika N na taekin. N te kabane, I a rairia nakon te taetae n Imatang, ni kangai nakoia ataeinimwaane, “Tiabo. E kakukurei te kaitibo ma ngkami.”

Ngke I kitaniia ataeinimwaane ma aia karo ma tinaia, I bon kaonaki ma te kakaitau. E a tia ni mwakuri ma ngai te Tama are i Karawa ni karau nanoia natina uoman aika uarereke. I bon nanorinano bwa te Uea e kona ni karababa au konabwai ae tiatianaki ni kakoroa nanon Ana kantaninga. I bon kakaitau ao ni kakoaua bwa te bwai are e kona n riki ngkana ti anga ngaira Nakoina ngkana ti weteaki, e ngae ngke iai kangaanga aika kananououa.