Ana Berita n Taainako
Robyn Casper, Utah, USA
Kamatata n te korotamnei iroun Bradley H. Clark
Ngke I tabe n tekateka n tain te bootaki n toa n iangoa raoi tataron te kariki, e kaokiokaki taekaia i nanon au iango: “bwa e aonga ni memena Tamneina irouia n taainako” (Moronaai 4:3; D&C 20:77).
“N taainako,” e taku—tiaki n tii n taai aika koaua. Bukin tera, ngkanne, tabeua namwakaina i mwaaina, ngai ma kainabau akea te wirikiriki nakoira ibukin kamanoan natira te mwaane ae 11 ana ririki ni maiu i mwaain ae e mate n te kabuanibwai ni kuratina n te rebwerebwe? Bukin tera te Tama are i Karawa n “taainako” e aki kamanoira ao ni kauringiira?
I a tia ni reireinaki n te Buraimwari ao ni kakoaua bwa te Tamnei ae Raoiroi e na kamanoira. E na kabongana te bwanaa ae maraaraa, ae uarereke ni kamanoira, kairiira, ao ni kauringiira ibukin te kabuanibwai. E memena n au iango te taeka aei man te tai are e mate iai Ben. N na bon aki manga nooria, ao nanou e rootaki ni kan oota ao n rau.
E mena ia te bwaana ni kauring? E angara te Tamnei ae Raoiroi? I namakinna bwa ti karaoa ara kabanea n tamaroa bwa ti na raoiroi. Ti kabwaka ara kabwianibwai, iriiri ara bobootaki, ao ni karaoi tabera ngkana ti tuangaki. Ti raroanako ma te kororaoi, ma ti boboa ara bootaki n utu n te tairiki ao ni kamatebwai ni booki aika tabu. Ti bon karaoa are ti kona.
Ibukin te tai aei I tekateka n te kiraati n te Bootaki n Aine ngke e karaki te tia reirei n rongorongon taekan ana koraki ni kaan ae maeka irarikina. Ngke e tabe n tataninga tokin te taura, au koraki aio e karekea te namakin bwa e riai n tei ao ni manga tataninga n te tabo are e mena iai ngke e kiriin te taura. E ongo te wirikiriki, ao n te tai ae waekoa e a karina ni kaoti te turaki ae totoa rinanon te tutanikawai, ni buti n aki ira nanon te taura ae uraura. Ngke arona bwa e aki ongo n te bwanaa anne, a na bae ni kaman tia n ikoaki ke e na mate naba ngaia ma natina.
Te karaki aio e rangi n rootai, ma inanon au tai n tekateka iaon au kaintekateka a baro ranin matau ike I a tauraoi ni kitana te ruu, I namakina te karaunano ae korakora. I namakinna te rau bwa te Tamnei ae Raoiroi e boni mena raoi irarikiu. N au kangaanga E aki mena ikekei n aron ae te bwanaa ni kauring ma e mena ikekei bwa te tia karaunano.
Man ana tai ni kabuanibwai Ben, I a tia n namakina te korakora n riaon oin korakorau ao n tia ni karauaki nanou man ana tangira Tamau are i Karawa. E karako au atatai n taai akanne bwa bukin tera a riki baikai, ma I aki nanououa n Ana tangira.
Iai au onimaki bwa te Atua e oota ni bwaai ni kabane ao e na bon aki kona ni kitanai ma te aki rau. Te Tamnei ae Raoiroi e karaoi mwakuri aika bati i nanon maiura. E kona ni kawakiniira, ma E kairiira naba, e karau nanora, e reireiniira, ao ni karekei atatai ao kakabwaia tabeua.
I reiakinna bwa te Tama are i Karawa e bon kawakin Ana berita. E bon memena irarikiu n “taainako”.