Rongorongon Reirei ni Kakawari
Anuan Iesu Kristo: N Akea te Uarao ke Mwamwanaan te aba
Tataromwaaka ni kamatebwaia te bwai n reirei aei ao n ukoukoria n ataia bwa tera ae ko na tibwauaia. E kanga am atatai ni maiun ao ana mwakuri te Tia Kamaiu ni karikirakea am onimaki Irouna ao ni kakabwaiaia naake ko tararuaia rinanon te reirei ni kakawari? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Atakina bwa akea iroun Iesu Kristo te uarao ao te mwamwana te aba e na buokiira bwa ti na kakaonimaki n ira Ana katooto. E taku Unimwaane Joseph B. Wirthlin (1917–2008) man te Kooram n te Tengaun ma Uoman n Abotoro: “Te uarao bon te mwamwana te aba ke e na uotiko nakon te kawai ae bure . … Te aomata ae aki bwaina te uarao bon te aomata ae akea ana bure, e bwaina te kokoaua, ao te nano ae itiaki, are maiuna e kaota te mwakuri ae bebete ni kanakoraoi ana mwakuri teuanne [ke neienne] ni katoa bong nakon koaua iaon te etieti. … I kakoaua bwa kainnanoan kakeaan te uarao ibukiia membwa n te Ekaretia e rangin ni kawaekoaki nakon ae taai riki tabeua ibukina bwa a mwaiti n te aonaaba ae aki ata aron kakawakin te bwai ae tamaroa aei.”1
Ni kaineti ma mwamwanaan te aba, E taku Beretitenti Dieter F. Uchtdorf, te Kauoman ni Kauntira n te Moan Beretitentii: “Akea mai ibuakora ae kanga aekan raoi Kristo ngkai ti ataia bwa ti riai n riki n aekakina. Ma ti tangiria n ae korakora n tokanikai iaon ara kairua ao te nano ni kan bure. Ma ara namakin ae te kabane n nanoti korakai n tangiria ni kan nakoraoi riki ma ana ibuobuoki ana Mwakuri ni Kamaiu Iesu Kristo.”2
Ti ataia “bwa a na baireaki taekara nakon ara mwakuri, bwaai aika e tangiria nanora, ao aeka n aomata ake ti a tia n riki nako iai.”3 Ma ngkana ti kekeiaki n rairi nanora, ti na riki n itiaki riki—ao a “kabwaia akana a itiaki nanoia: bwa a na nora te Atua” (Mataio 5:8).
Rakan riki Booki aika Tabu
Man Koroboki aika Tabu
Ataei aika uarereke akea aia bure. E taku Iesu Kristo: “Kanakomaia ataei akana a uarereke nako Iu, ao tai tukiia: ba bon aia bai uean te Atua. … Ao E babakoi’a[ataei], ao E katoka baina i aoia, ao E taetae ni kakabaiaia” (Mareko 10:14, 16).
Kristo e ibuobuoki naba nakoia ataei i Amerika imwiin Taurakina. E tuangia aomata bwa ana uota natiia ake a uarereke ma “ni katikuia i aontano irarikina, ao Iesu e tei ibuakoia; …
“… [Ao] e tang, ao aomata ake a uanao a bon kakoaua ibukina, ao e anai aia ataei ake a uarereke, temanna imwiin temanna, ao e kakabwaiaia, ao e tataro nakon te Tama i bukiia. …
“Ao ngke a tararake bwa a na nooria a tabekarake mataia nako karawa, ao a noora karawa bwa e uki, ao a nooria anera bwa a ruo mai karawa ae aiaron ae otabwaniniaki n te ai; ao a ruo ma n otabwaninia ataei ake a uarereke, … ao anera a karaoi aia mwakuri n ibuobuoki nakoia” (3 Nibwaai 17:21–24).