Ara Tabo
Taan Tiriai ao Ana Bwai ni Buaka te Atua
Tamnei ni kamatata iroun Julia Yellow
Bon te bong ae raoi n au mwakuri ae te tia anganano n tiriai, ngaia are I baireia bwa N na wareka ana Boki Moomon. Ngke temanna raou ni mwakuri e noorai ni wareware, e titiraki ngkana I ataia bwa ti kona ni katokai ana bwai ni buaka te Atua n taai aikai. Ngke ti tabe n taetae, e a tang naba te araam. Iai te urarake n te titoa ae uakaan.
Ti waekoa ni karini ara bwai n tiriai ao ti kaineti n nako ikekei. E korakora te urarake, ao ti tabe ni kaan ma te titoa, e rebwetaua te bwai teuana ni kainetiira. Ti katobibiaki n te ura. Uran te ai e kabua ara iango ngai ma raou ni mwakuri inanon tabeua te miniti. Ma te kakaitau nakon ara bwai ni mwakuri ao kunnikaira ni katantan, akea ikoakira ae reke.
Ngke ti oki rikaaki nakon te titeition imwiin tiringan te ai, I titirakina raou ni mwakuri ngkana e uringa ana titiraki n taekan ana bwai ni buaka te Atua. E taku bwa e uringnga, ao I kabwarabwara bwa ana bwai ni buaka te Atua ai aron te bwai ni katantan n ara bwai n tiriai. Ti riai ni kabongana n tainako bwa ti aonga ni kona ni konaaki ni korakoran te kaitara. Ngkana ti kawakin tua, ti na kakabwaiaki ma te mwaaka ni katantan n ana bwai ni buaka te Atua, ao te Tamnei ae Raoiroi e na riki bwa te tia kairiira.
Fernando de la Rosa Marrón, Mexico
Maamaten Nanou N Koroboki aika a Tabu
1 Tamuera 16:7. “Bwa E aki taraa te aba Iehova n ai aron te aomata ngkana e taraa te aba, bwa e taratara tinanikun te aba te aomata, ma e taratara te nano Iehova” (1 Tamuera 16:7).
Imwain ae I kaaina te Ekaretia, Ia tia n tainako ni katamneia ibon irou bwa bon te aomata ni kangai ma ana konabwai ni kangai. I namakinna bwa akea uaau ae Nna anga. I maaku ni kaotia nakoia aomata bwa antai ngai ibukin te maaku are I rawa ni kanakoaki ke ni kaikoakaki. I iangoia bwa aomata ake a katobibiai a korakora riki, wanawana riki ao a tamaroa riki nakoiu.
Ma ni kabane iango aikai a bane ni bitaki ngke I riki bwa te membwa n ana Ekaretia Iesu Kristo Ibukiia Aika Itiaki ni Boong Aika Kaitira. I reiakinna bwa ngaira ni kabane bon natin te Atua ao ti karekei arora ni bwaibwai mai i karawa. I a ataia ngkai bwa bon akea te kauaba iaon antai ae wanawana riki, kaubwai riki, ke boboto taraana. I matan te Uea, ti bane n taraaki bwa titebo, ao bon Ngaia are e na motikitaekara—tiaki iaon tein rabwatara ma iaon ara ongotaeka ao nanora ni kan toua mwiin kawakina are E kateia.
Joan Azucena, Philippines
Ko Kona ni Mwakuri n te Tabati?
Tamnei ni kamatata iroun Julia Yellow
Ngke 15 au ririki, I karekea au koaua ae matoatoa n ana euangkerio Iesu Kristo ao I rang kukurei ni kaina te Ekaretia. N te tai anne, I mwakuri ni buokiia au utu. E aki maan imwiin are I bwabetito, ao e bua au mwakuri.
I tangiria ni kakaea au mwakuri ae boou ibukina bwa au utu a katan irou, ma ni katoai mwakuri ake I kororeta nako iai a kainnanoia bwa N na mwakuri n te Tabati. I kataorikaaki mwakuri aika mwaiti ake I anganaki ibukina bwa I kainnanoia ni mena n te taromauri n te Tabati (tara D&C 59:9–10).
Imwiin au kakae inanon uoua namwakaina, I teimatoa n aki reke au mwakuri. Tinau bon tiaki te membwa n te Ekaretia, ao e ngae ngke e kakoaua te Atua, e rang un bwa I kanakoi mwakuri aika rang mwaiti.
N te tairiki teuana e taraai ma rannimatana man titiraki, “Bukin tera te Atua e kariaia aio bwa e na riki ngkana ko rang kakaonimaki ni karaoa ae eti?”
I kaeka, “Tinau, I aki ataia bwa bukin tera e riki aio nakoira, ma I ataia bwa I karaoa te bwai ae eti, ao I ataia bwa te Atua e na kakabwaiaira ibukina.”
Te ingabong are imwiina temanna e anganai te mwane ae mwaiti bwa N na kabanea uoua te bong ni karai tabeua kaako aika tibeu man te auti teuana nakon are teuana. Te mwakuri e rang korakora, ma ngke I karekea te mwane, I waekoa n okira mweengau ao n anga au tataro ni kakaitau. I wakoa ni karekea te mwakuri ae tamaroa are e aki kamwakurai n te Tabati, ao I aki manga tiku n akea au mwakuri imwiina.
I kukurei bwa I rineia ni kawakina te Tabati bwa te bong ae tabu. A mwaiti kakaewenako inanon maiu, ma I ataia bwa ngkana ti kakorakoraira n aki tabe ma kanganga akanne, te Uea e na bon kakabwaiaira.
Sahil Sharma, India