Titiraki & Kaekaaia
“N na kanga ni mweengaraoi ngkana I maroro ma au bitiobi ibukin titiraki aika kauntaekaki ke tabeaianga?”
E na bae n nako nanom n taetae ma am bitiobi n taekan bwaai ake ko korakai iai, ao anne e bon ririki. Angin te tai ti nako n nano i mwaain ae ti rinanon bwaai aika boou ke i mwaain marorora ma ae e a ikawai.
Ma am bitiobi e weteaki iroun te Atua. E weteaki ibukina bwa bon ana reirei Iesu Kristo ae motinnano. E na karaoa are e kona n akoi ao n oota. Ana kouru bwa e na buokiko n oki nakon te Tia Kamaiu bwa ko aonga ni karekea te rau. Oina ni koaua, ko na bae ni mama n taetae ma ngaia ibukin am titiraki ke am bure, ma e na aki iangoiko n te aro ae aki raoiroi. Ni koauana, e na bon kukurei bwa iai nanom ni kan kanakoraoiko. Ao e na kawakin am maroro ni kaini bwa a kakawaki.
Ko aki kona ni uota rawawatam n tii ngkoe. Am bitiobi e kona ni buokiko ni karekei kaekaan am titiraki ao, ngkana e kainnanoaki, e buokiko n rairananom ao n tokanikai, rinanon ana Mwakuri ni Kamaiu, n namakinan te kairua, te bwarannano, ke te aki tau.
Ngke ko taetae nakon am bitiobi, ko na namakina ana tangira ibukim. E ngae ngke e bukintaeka ibukin te uoote ke te mwaanga ae bwanin, oin boton ana taratara bon mweeraoia kairake n ataeinimwaane ao ataeinaine. Ko aki katabetabea man am titiraki ni kan buokaki.
Ko kona n tataro nakon te Tama are i Karawa ibukin te korakora ao te ninikoria n taetae nakon am bitiobi. E a tia n angan am bitiobi te kariaia ni buokiko ao am bitiobi e ingainga ni kan karaoia. Ngkana ko nako ma nanom ae marau ao am iango ni kan kanakoraoa arom, ko na kunea bwa ko kitana ana aobiti n te namakin ae tamaroa nakon are mai i mwaaina.
E na aki Iangoiko n te aro ae Aki Raoiroi
Te bitiobi n am uoote e anganaki te kariaia ni kairiko rinanon mwanekan te rairannano. N tabetai kawaran am bitiobi bon tii te kawai ibukim n raira nanom n ae bwanin rinanon te Tia Kamaiu. Ngkana I kainnanoia ni kan taetae nakon au bitiobi, e buokai ni kunea te Tia Kamaiu ao n tokanikai iaon te ikoaki ae koakora are I a tia ni karekea. Am bitiobi e tangiria ni kan buokiko. Weteana bwa e n a tararuaiko, ao e na aki iangoiko n te aro ae aki raoiroi n te bwai are ko tangiria ni kan nooria iai.
Madison D., ana ririki 18, Utah, USA
Am Bitiobi E Tauraoi ni Buokiko
I namakina te aki mweengaraoi inanon te intawiu, ma ni koauana I kunea bwa au bitiobi e tatauraoi n taainako ni buokai n taobaraa au kangaanga. Onimakina am bitiobi; boni ngaia te tia kawakin tiibu ao te uoote bon ana nanai.
Jaime R., ana ririki 19, Cochabamba, Bolivia
E na Aki Kamwaneko n Onimakinam
I karekea te koaua bwa te bitiobi bon ngaia te kabanea n onimakinaki n aomata ae ko na karekea buokam mairouna. E na bon aki kamwaneko n onimakinam―bwaai ni kabane ake ko tibwauai ma ngaia a teimatoa ni kainaki ao ni kawakinaki. N tabetai e boni kangaanga ae ko na tibwauai am kangaanga, ma te maroro n itaramata ma temanna are e tangira ao n tabe ao n tangiria bwa ko na nakoraoi e kabebetea riki kawaim.
Nicole S., ana ririki 18, Idaho, USA
Ko Kona N Onimakinna
Am bitiobi ke am beretitenti n te mwaanga bon ana toro ni koaua te Uea. Ko kona n onimakinna ibukin kairam ngkai ko ukora ana kairi te Tamnei ae Raoiroi ao koroboki aika tabu. Ko na ataia bwa te bitiobi e mena ikanne bwa e na buokiko ao e boni kairaki iroun te Atua.
Stanislav R., ana ririki 19, Donetsk, Ukraine
Uringnga Bwa E Tangiriko
Ngkana iai te bwai ae ko rang kan maroroakinna ma te bitiobi, e na bon bebete te maroro ma ngaia n taekan te reirei ao tabeua bwaai aika kabuta moa. Ngkana e nako nanom ibukina bwa ko na maroro ma ngaia ibukin kangaanga n te rairannano, tii uringnga bwa e tangiriko. E aki riai n nako nanom n te bwai ae e na iangoia ibukim, ibukina bwa bukin terana ngkai e na iangoia bwa akea kakawakim ngkai ko tangiria ni kaniiko ma Kristo?
Ashley D., ana ririki 17, Arizona, USA
E ngae Ngkana Ko Karaoa te Kairua
E na matoatoa ao ni kamaama ni kaoti bwaai nakon am bitiobi, ma ngkana ko kitana te aobiti anne, ko na namakina te rauaki, ao ko na ataia bwa e tangiriko te Tama are i Karawa. E tangiria bwa ko na kukurei, e ngae ngkana ko karaoa te kairua.
Amanda W., ana ririki 16, Utah, USA
E Mena Ikanne bwa E na Ibuobuoki
Am bitiobi bon te tia kawakin tiibu ibukin am uoote. Uringnga bwa e na bon karaoa ana kabanea ni kona ni buokiko ao iai irouna mwaakan te Atua n ana itera. Ngkana ko namakina te maaku, ko kona n tataro ibukin te korakora bwa ko aonga ni kona ni maroro ma am bitiobi. N te kabane, ko na bon kukurei bwa ko a tia ni kawaria―ao e materaoi karaoana.
Samuel H., ana ririki 14, Idaho, USA
Tataro bwa ko na Ataia
Titirakiniko bwa bukin tera ngkai ko aki mweengaraoi ni maroro ma am bitiobi. Ko taku bwa e na aki kani buokiko n taobaraa am kangaanga? Tataro bwa ko na ataia bwa e tangiriko te bitiobi ao e a tia ni weteia bwa e na buokiko.
Adam H., ana ririki 13, California, USA