Anenea Kunam n Taromauri ae Mamaten Nanom
Angela Olsen Center, Ohio, USA
Kamatata n te korotamnei iroun Bradley H. Clark
I a bon tibwa bung iroun natira te aine, ae Rebekah. E rang ni korakora aririu ni maraki n au tai ni bung, ao I bon rang ni kua.
Ngke e kaakaki Rebekah i nanon baiu, e roko irou te namakin ae korakora are N na anenea kunau ae mamaten nanou, “Ngai natin te Atua” (Kuna n taromauri, nambwa. 301). Au moan kaeka bon, “N aki, E a bon roko irou te kua. I a aneneia nakoina rimwi.” Ma e a manga oki naba au iango. Ngaia are, e ngae ngke I a bon rang ni kua, I moana anenea te moan kibu. A raonai n anene kainabau ao tinau.
Ngke ti a tia n anene, I namakina te namakin ae kaokoro i nanon te ruu. N aron naba te taokita, are e rang ni mwaatai ao ni kakanimatang n tabetai a wawaanako ranin matana iaon ubuna. E karabwaira ibukin anenean te kuna ae rang tamaroa. E taku bwa i nanon ana ririki ni kabung ibukiia ataei, e bon tuai man namakina ae aekakin aei n te anne.
I uringa te namakin arei ao man iangoia ngkana I riai ni kakaea te kuna ae raweaki ao n anganna. Ma te kanganga, I a rang n tabetabe ma aron te maiu ao ni mwaninga taekana.
Ngkanne e a roko te bong are N na tutuo iai i mwiin bungiu. Ngke e nakon te ruu te taokita, e kaota moamoana ni kukurei, ao e rabwatai. E taku bwa e aki toki n iaiangoa te kuna anne ao e kataia ni kakaea iaon te intanete bwa e aonga n aneneia nakon ana utu. Anne ngke e kauringai te Tamnei ae Raoiroi bwa I riai ni karekea kaobiin te kuna ibukina. I berita nakoina bwa i nanon te wiiki N na manga bon oki ma te kuna.
N te tairiki anne I tataro ibukin buokau ni kakai anga ibukin kakaean te kuna ae e na roko raoi ibukina. Te bwakantaai are i mwiina I ootana te CD are katangaki iai te kuna anne. Ngke e a roko i nanon te meeri tabeua te bong i mwiina, I a nang ni inganga ni kan anganna.
E rangi ni kukurei ngke e tia ni karekea ao e karabwaai ibukin te bwaintangira. E tuangai bwa e aki koaua raoi bwa tera bukin tangirakin te anene aio, ma te kuna aei e bon rang kakawaki irouna bwa e na tibwauaia ma ana utu. Ngke ti reitanako ara maroro, I tibwaua aio nakoina bwa ti aki ti bukin tangiran te anene aio ma ibukin naba au koaua are e reiakinaki inanona.
Ngke I buti nakon mweengau n te bong anne, I namakina ana tangira Tamara are i Karawa ibukin temanna natina te aine—au taokia. E ataia ao e tangiria, ao E tangiria bwa e na oota bwa e kona n oki ni maeka ma Ngaia n te taina.