Te Rongorongo man te Moan Beretitentii
Beretitenti Monson e Wewete Ibukin te Ninikoria
Iroun Beretitenti Thomas S. Monson
Kamatata n te tamnei iroun iStock/Thinkstock
E a tia Beretitenti Thomas S. Monson n taekinna bwa e tara n ae ti kuri n tainako ni weteaki bwa ti na karaoi aekan rinerine aika kakaokoro.
Ni karaoi rinerine aika wanawana, e reirei, bwa ti kainnanoa te ninikoria—“te ninikoria n taekina tiaki, te ninikoria n taekina eng. Babaire a bairea tokin kawaira.”1
Inanon rongorongo aikai, Beretitenti Monson e kauringia Aika Itiaki ni Boong Aika Kaitira bwa a kainanoa te ninikoria ni kamanoa te koaua ao te raoiroi, ni kamanoa te bwai ae a onimakinna, ao ni kaitara te aonaaba are e aki butimwaai katei ao tuua ao reirei aika akea tokiia.
“Te wewete ibukin te ninikoria e teimatoa n roko nakoira n tatabemanira nako,” e taku. “E koaua aei n taai nako, ao e na teimatoa ni koaua.”2
Te Ninikoria e Uota Ana Kariaia te Atua
“Ti na bane ni kaitara ma te maaku, rinanon te bwainikirinaki, ao n rotaki ma kaitara. Ti riai—ni kabane—n iai iroura te ninikoria ni karaoi mwakuri ni kakaitara ni kamanoi ara tua. Te ninikoria, tiaki te boraraoi, e kakabwaiaira ma a na kariaia te Atua. E riki te ninikoria bwa te katei ae korakora ao n anainano ngke e iangoaki bwa ti aki te nano ni kani mate ma te nano ni mwaane ma te nano ae korakora naba ni maeka ma te katei ae riai. Ngkai ti waaki nako, ni kekeiaki ni maeka n aron ae ti riai ni karaoia, ti na karekea te ibuobuoki mairoun te Uea ao ni kona ni karekea te kamanoaki man Ana taeka.”3
N totoko ma te Ninikoria
“Tera ae nanonaki bwa ko na te teimatoa? I tangira te kabwarabwara aei: n totoko ma te ninikoria. E kona te ninikoria n tau ibukim bwa ko na kakoaua; e na iai te tai ae riai ngkana ko ongotaeka nako iai. E na bon kainnanoaki raoi ngkana ko teimatoa ni karokoa te bong are ko nang kitana iai te maiu ae mamate aei.”4
Karekea te Ninikoria n Tei ibukin te Koaua
“[Au] kantaninga bwa iai iroum te ninikoria n teimatoa n riki bwa te tia tei ibukin te koaua ao te raoiroi. Ibukina bwa te botanaomata a totokoi Ana katei aika raraoi ao Ana reirei te Uea aika mwaiti ae E a tia n anganira, ko na bon bae ni kainnanoaki ni kamanoa te bwai ae ko kakoaua. Ni karokoa ae a matoatoa aan am koaua, e na kanganga ibukim bwa ko na matoatoa ni kaitaraia naake a kaitara am onimaki. Ngkana e unikaki ni matoatoa, am kakoaua n ana euangkerio, te Tia Kamaiu, ao iroun Tamara are i Karawa e na rooti bwaai ni kabane aika ko karaoi inanon maium.”5
Ti Kainnanoa te Ninikoria n Tamnei ao ae Riai
“Rongorongo ake a kaotaki n te terewition, n tamnei, ao n aekan anga ni kareke rongorongo riki tabeua [n te bong aei] a rangin ni kaitara n taainako ma te bwai ae ti tangiria bwa ana butimwaai ao ni iangoi raoi. Bon tabera bwa ti na aki ti reireinia bwa ana raoiroi ni maiuia n tamnei ao n te reirei ma ti na buokia naba n tiku n aroia anne, n aki tabe ma katikitiki mai tinaniku aika a na kona ni kaitara ma ngaai. Aio ae na tangira te tai ao te mwakuri ae bati n ara itera—ao n te aro bwa ti na buokia tabeman, ngaira bon iroura ti kainnanoa te ninikoria n tamnei ao ae riai ni kaitara te buakaka aika ti noori n taabo nako.”6
Au Kantaninga Bwa ti bane n Ninikoria n Tainako
“N ara tai ni maiu n te bong teuana ma teuana, e na tara n ae iai te kantaninga bwa e na kataaki ara onimaki. Ti kona n taai tabetai ni katobibiaki irouia tabeman ao n angiia ke n tei n ti ngai ni kaineti ma te bwai ae kariaiakaki ao ae e aki …
“Au kantaninga bwa ti na teimatoa n ninikoria ao n tauraoi n tei ibukin te bwai ae ti onimakinna, ao ngkana e riai bwa ti na tei iroura n te waaki, au kantaninga bwa ti karaoia ma te ninikoria, ni kakorakoraki ma te atatai are ni koauana ti aki kona n tiku n ti ngaira ngkana ti tei ma Tamara are i Karawa.”7