Mweengara, Ara utu

Bootakin te Utu n te Tairiki—Ko Kona ni Karaoia!

N aki tabe bwa aekakira aron am utu, e kona te bootaki n utu n te tairiki ni kakabwaia ao ni kakorakora ana utu te tia wareware.

Ana mwamwannano n te kauring n tamnei Brigham Young University; tamnei n te been iroun iStock/Thinkstock

E okira mweengana te tama ma te kua imwiin te mwakuri ae bati n te bong anne ao ni kuneia kaain ana utu ni kekeiaki ma te aeka n namakin anne. Bon tairikin te Moanibong, ao karaoan te bootaki n utu n te tairiki e tara ni kangaanga. Imwiin karaoan te tataro ibukin te ibuobuoki, te tama ao te tina a kataia ni kabebetei bwaai. A weteia kaain aia utu ni kabane, anenea te anene, ao ni bootaki n tataro. Angania kaain te utu te taura te nenea aika uarereke bwa a na kaurai ngkai a taekina taekan te bwai teuana ae a tia ni kaungaia n te tai ae aki maan n nako. Inanon te ruu ae rotongitong, otan te taura te nenea e tei ibukin kairi mai ieta ao n katika aia iango ataei. Ngke a tibwaaki koaua, te namakin ae kakukurei te rau ao te tangira e rin inanon te mweenga. A katoka te tairiki anne te utu ma te kakaitau ngkai a karaoa aia bootaki n utu n te tairiki.

Ko ataia ae a tia n riki te bootaki n utu n te tairiki bwa ana buroukuraem te Ekaretia ibukin 100 te ririki? N Eberi 1915, te Moan Beretitentii e tuangiia membwa bwa a na katuka te tairiki teuana ni katoa wiiki ibukin te tataro n utu, katangitang, reirei n te euangkerio, karaki ao waaki ni kakukurei. (Taraa iteraniba 80 ibukin taekana n te reta man te Moan Beretitentii.) Aki toki burabeti ni kauringira n aron kakawakin te bootakin utu n te tairiki. “Ti aki kona ni kaboa ni kakea te burokuraem ae karekeaki mai ieta aei,” E taku Beretitenti Thomas S. Monson. “E kona ni uota te rikirake n tamnei nakoia kaain te utu n tatabemania nako, ni buoka teuanne ke neienne ni kanakoi kariiri aika a mena n taabo ni kabane.”¹

Aikai tabeua katei aika ko na kawakin n am iango ngkana ko karaoa te bootaki n utu n te tairiki bwa kanoan am wiiki:

E kaineti aei nakoia taan wareware. “Te Bootaki n Utu n te Tairiki bon ibukiia aomata ni kabane,” e taku Unimwaane L. Tom Perry man te Kooram n te Tengaun ma Uoman n Abotoro.² Ngaira ni kabane—ti a tia ni mare ke ti tuai, iai natira ke akea—ti kona ni karekea te tai ni kakorakora te utu ao te reirei n te euangkerio.

I kona ni karekea taina. E katea te katooto te Ekaretia man kawakinan tairikin te bong ae te Moanibong bwa e na aki katabeaki ma waaki ni kakukurei n te Ekaretia. Ko kona ni kaotia nakon te Uea ao am utu bwa iai nanom ni katuka te tai ibukin te bwai ae moan te kakawaki.

I kona ni kakaea te mwakuri ae tau ibukin au utu. Ngkana a maenako kain am utu n iteran nako te aonaaba, kata te “utu iaon te rain n te tairiki” n taetae ma kain te utu iaon te rain ke iaon te tareboon. Iai aika a na mwakuri ni bwakanako n tai? Karaoa te “bootaki n utu n te tairiki itinaniku” irarikin te tabo ni mwakuri n tain te motirawa. Te tama ae raure e karaoa “te reta n te utu n te tairiki” ni katoa Moanibong, ni koroboki nakoia natina aika a raroanako maekaia.³ Kariaia bwaai aika a totoko ke e na karika te bitaki ibukin te konabwai ae akea kabotauana.

I kona ni moanna n te wiiki aei. Bootakin te utu n te tairiki a kona ni baireaki nakon kainnanon ao kanganga ni mweengam. Aikai iango tabeua aika tabangaki:

• Moanna ao motikia n te tataro.

• Kabonganai katangitang, n raonaki ma kuuna ao aia anene kaain te Moanrinan.

• Reirei man booki aika tabu ao burabeti n taai aikai.

• Karaoi inanona waaki ni kakukurei, mwakuri n ibuobuoki, waaki ni kakukurei n te euangkerio aika kaineti ma te euangkerio man te wiiki teuana nakon teuana.

• Karaoi waaki ni kangare! Karaoa te takakaro ke karaoa te amwarake ae beebete.

• Karaoia n Taainako. Ngkana ko aki kona ni karaoia n te Moanibong, karaoia ni boong riki tabeua ae na nakoraoi iai.

I tangiri kakabwaia. A tia burabeti ni berita bwa ngkana ti iriiri bootakin te utu n te tairiki, ana reke kakabwaia aika mwaiti: Te tangira ao te ongotaeka n te mweenga e na rikirake. E na rikirake te onimaki inanoia kairake. Utu “a na karekea te mwaaka ni kaitarai ana kairoro ao ana kabwakabwaka te buakaka” are e katobibia.⁴

E ngae ngke bootakin te utu n te tairiki e na aki kororaoi n taainako, am utu a na kakorakoraaki ao ni kakabwaiaki man am kekeiaki. “Ni kabane bootakin te utu n te tairiki iai mwiia nakon tamneira, kanga aron mwiin win te burati ni been iaon te been,” E reirei Unimwaane David A. Bednar man te Kooram n te Tengaun ma Uoman n Abotoro bwa. “Akea te bootaki n utu n te tairiki ae tara ni katekenano ke ni ururungaki. Ma kanga ai aron … mwiin te been ni waia ni mwakuri bon irouia ao ni karekea te mwakuri ni korotamnei ae anainano, ngaia ae ara teimatoa ni karaoi bwaai aika tara ni uarereke e kona ni kairiira nakon mwiina n tamnei aika kakawaki.”⁵

Bwaai aika a na taraaki

1. Thomas S. Monson, “Constant Truths for Changing Times,” Liahona, Meei 2005, 19.

2. L. Tom Perry, “Therefore I Was Taught,” Ensign, Meei 1994, 38.

3. “Bootakin te Utu n te Tairiki: Any Size, Any Situation,” Ensign, Ritembwa 2001, 42.

4. Te Moan Beretitentii, n James R. Clark, comp., Messages of the First Presidency of The Church of Jesus Christ of Latter-day Saints, 6 vols. (1965–75), 4:339.

5. David A. Bednar, “More Diligent and Concerned at Home,” Riaona, Nobembwa 2009, 19–20.

Anga te Kabanea n Rietaata ni bwai ae Kakawaki

“Ti reireinia kaaro ao ataei bwa a na anga te kabanea n rietata ni bwai ae kakawaki nakon te tataro n utu, bootaki n utu n te tairiki, kamatebwai n te euangkerio ao te kaetieti, ao waaki ni kakukurei aika kamarurung n te utu. Irarikin ae aekakira bonganan ao riain tangiran bwaai aika riai tabeua ke waaki ni kakukurei, aki riai ni kariaiakaki n onei mwiin mwakuri ake e a tia te Atua n anga are ti kaaro ao utu aika a kona ni karaoi.”

Ana reta te Moan Beretitentii, Beberuare 11, 1999