Ti Riai n Nako nakon te Tembora Ngkai!
Mary Holmes Ewen, California, USA
Kamatata n te korotamnei iroun Bradley H. Clark
Ingabongin te Tabati teuana e kabwarabwaraki temanna kain te aro ae e a bon tibwa bwabetitoaki n te uoote. Aran neiei bon Lydia. N te tai ae waekoa e a reke tangirana iroura.
E a bon kara Lydia ao ni matakii man ana ririki ni kaitara ma te aoraki ae te tioka. E waekoa ni kinaiia kaain te uoote man bwanaaia ao bukibukin waeiia. E na bae n atong arara ao n iobai ma ngaira, ao ti aki kan taekina arona ae matakii.
I mwiin te ririki n tataninga, e kaitibo Lydia ma te bitiobi ao te beretitenti n te titeiki bwa e na karekea ana rekomente nakon te tembora. N te Tabati teuana n te Bootaki n Aine, e katikai rikaaki nako rarikina ao n takarua n taetae, “E tuangai te beretitenti n te titeiki bwa I riai n nako nakon te tembora n te tai ae waekoa. Ko kona ni kairai?”
Bon moan wiikin Ritembwa—bon taai ni katabetabe nakoira. I kataia ni kakaei nako anga ni karautaeka ae tataneiai te aba iai ao n taku, “Ti aki kona n tataninga ni karokoa Tianuare?”
“Tiaki, ti riai n nako ngkai!”
Kurubu n aine man te uoote a nanako n te tembora ni katoa namwakaina, ngaia are I a roko irouia ni karaoa te mwananga ma Lydia. A bon rangin tabetabe naba. Ma Lydia, ma matana aika ranran, e a manga tuangiira riki bwa e tuangaki iroun te beretitenti n te titeiki bwa e riai n nako n te tai ae waekoa.
N anne ao ti bane ni kariaia ni karaoa te mwananga ae 150-te maaire (241 kiromiita) n te wiiki are i mwiina. Ngke ti mwananga, ti karaoa te maroro iaon te minibwati ma aia iraorao waniman aine. E rang kimwareirei Lydia ni baike e rinanona inanon te tembora ao te kakabwaia ngke e karekea oin ana entaumente.
Ni moan wiikin Tianuare, e a tabe ni buakaka marurungin Lydia ao e a rin n te onaoraki ibukin kabuanibwai aika karina. N te wiiki are i mwiina ao e a boraunako. Ma e nako Lydia ma kakabwaia aika akea tokiia ake e karekei inanon te tembora tii inanon tabeua te wiiki mai i mwaaina.
I mwiina ao I karakina rongorongon mwanangara nakon te beretitenti n te titeiki ao n tuangnga bwa kukureira ngai ngkai e karekea te kanamakin n tuanga Lydia bwa e riai n nako nakon te tembora n te tai ae waekoa.
“I aki nanonna raoi bwa e riai n nako n te tai ae waekoa,” e kaeka. “I tuangiia taan karekei rekomente nakon te tembora bwa riai n nako nakon te tembora n te tai ae waekoa. E taetae te Tamnei nakon Lydia, tiaki ngai!”
E reireiniira Lydia ni kabane bwa ti na kakauongo nakon te Tamnei ao ni mwakuriia n te tai ae waekoa. I bon kakaitau ibukin ana kauring ni kakaungo nakon te bwanaa, ae maraara man bebete.