Судрын цаг

Есүс уяман өвчтэй хүнийг эдгээв

Эрин Сандэрсон

Зохиогч нь АНУ-ын Ютад амьдардаг.

Шинэ Гэрээний талаар энэ жил хамтдаа суралц!

Өвчтэй байсан үеийнхээ тухай бод. Хэн нэгэн таныг эдгэрэхэд туслахын тулд ямар нэг сайн зүйл хийсэн үү?

Бид Шинэ Гэрээнээс Есүс өвчтэй байсан хүмүүст хэрхэн сайхан сэтгэлээр ханддаг байсан талаар уншдаг. Нэг өдөр уяман өвчин гэгддэг арьсны өвчтэй нэгэн хүн Есүс дээр ирэв. Есүст өвчтэй хүн бүрийг эдгээх хүч байгаа гэдгийг тэр мэдэж байв. Есүс түүнийг эдгээж чадна гэдэгт тэр итгэж байлаа. Есүс уяман өвчтэй хүнд хүрч, “Цэвэрш” (Марк 1:41) гэлээ. Есүс ингэж хэлмэгц тэр эдгэрэв.

Бид өвчтэй эсвэл гунигтай байгаа бусдад сайхан сэтгэлээр хандаж, бас хайрласнаар Есүсийн жишээг дагаж чадна.

Сайн мэдээнүүдээс илүү дэлгэрэнгүй суралц.

Есүсийн зарим дагалдагчийн бичсэн, Сайн мэдээнүүд хэмээн нэрлэгддэг дөрвөн онцгой ном Шинэ Гэрээн дээр байдаг. Сайн мэдээнүүд нь Есүс Христийн дэлхий дээр амьдарч байсан үеийн талаар өгүүлдэг. Уяман өвчтэй хүнийг эдгээж буй энэ түүх нь Сайн мэдээнүүдийн гуравт нь бичигдсэн байдаг. Энэ нь Марк 1:40–42, Матай 8:2–4 болон Лук 5:12–14 дээр байдаг.

Гэр бүлээрээ ярилцах санаанууд

Та Марк 1:40–42 дахь түүхийг ярихдаа 74-р хуудсан дээрх судрын зургийг ашиглаж болно. Дараа нь та Иуда 1:22-ыг уншиж, хэн нэгний амьдралыг өөрчлөхийн тулд гэр бүлээрээ ямар нэгэн зүйлийг хийх төлөвлөгөө гаргаж болох юм. Магадгүй та нар хэн нэгэнд нууцаар үйлчлэл хийж болох шүү дээ!

Дуу: “Tell Me the Stories of Jesus,” (Children’s Songbook, 57).

Судрууд: Марк 1:40–42

Видео бичлэгүүд: “Есүс хүндэтгэлийн өдөр уяман өвчтөнг эдгээв” мөн “Есүс төрөлхийн сохор хүнийг эдгээв” зэргийг үзэх бол Biblevideos.org хаягаар орж үзнэ үү.

Есүсийн мөрөөр алхах нь

Гэр бүлээрээ ийм нөхцөлд байгаа хүмүүст хайраа хэрхэн үзүүлж болохыг жүжиглэн тогло. Заримыг өөрсдийнхөө нөхцөл байдлаар зохиож болно!

• Нэгэн шинэ гэр бүл танай хөрш болж, шилжиж ирэв.

• Зарим хүүхэд сургууль дээрээ бусдад муу ханддаг.

• Сүм дээр хэнийг ч таньдаггүй нэг хүүхэд Хүүхдийн хэсэгт ирэв.

• Та нарын эрэгтэй эсвэл эмэгтэй дүүтэй чинь тоглох хүн алга.

• Нялх дүү чинь уйлж, ээж чинь оройн хоолоо хийхээр хичээж байна.

• Тойрог эсвэл салбарын тань нэгэн хүн өвчтэй байгаа учраас гэрээсээ гарч чадахгүй байна.

Судрын зөвлөгөө: Үг хайлт

Марк 1:41 дээр өрөвдөх гэдэг үгийг ашигладаг. Заримдаа Библи дээр та нарын ойлгохгүй хэцүү үг хэллэгүүд байдаг. Та нар мэдэхгүй үгтэй таарвал та нарт туслах Судруудын удирдамжийг ашиглаж болно. Жишээ нь, “Өрөвдөх” гэдэг нь юу гэсэн утгатай болохыг олж мэдэхийн тулд, бас энэ үгийг ашигласан бусад судрыг олохын тулд та энэ үгийг харж болно. Есүс уяман өвчтэй хүнийг эдгээж байгаа энэ түүхэн дэх өөр ямар үгийг та нар харж болох вэ?