Tōmak, Kōjatdikdik, im Tūriam̧o̧—Baat 3
Kōjatdikdik ilo Holland
Rijeje eo ej jokwe ilo New Jersey, USA.
Grace ej juon leddik 15 an iiō ekar jokwe ilo Holland ilo iien pata eo an laļ in Kein Karuo. Ekar to an jem̧ļo̧k tariņae eo. Armej ro ilo Holland rekar kwōle, im rekar kōjatdikdik bwe enaaj m̧ōkaj an jem̧ļo̧k tariņae eo.
Iiō eo āliktata an Pata eo an Laļ in Kein Karuo kar lukkuun nana tata ilo Holland. Nazi ro rekar bōk aolep kain. Grace ekar jab maron̄ etal im jikuuļ. Ekar ejjeļo̧k m̧elle n̄an kōmeņāāni m̧ōko. Grace im baam̧le eo an rekar aikuj m̧ōn̄ā wūt ko bwe ren jab kwōle. Relukkuun nana nemeer! Men eo enana tata, Jema ekar juon rikaļbuuj an rinana ro.
Ak ekar wōr wōt kōjatdikdik. Armej ro rekar ba bwe Nazi ro rekar luuj ilo tariņae eo. Im ilo Māe 1945, Nazi ro rekar kōjem̧ļo̧k tariņae eo. Holland ekar bar aenōm̧m̧an bar juon alen! Armej rekar kam̧ōņōņōik doon ilo kepoon in iaļ ko. Kiiō Grace ekar bar maron̄ etal im jikuuļ. Ekar ejjeļo̧k ritariņae n̄an mijak er.
Men eo em̧m̧an tata, juon raan Grace im būrātōr ro an rekar ro̧o̧l jān m̧ōn jikuuļ eo, rekar loe juon būlāāk in Holland ej ejopelpel imejen wōt m̧weo imōer. Rekar jeļā ke juon wōt meļeļein.
“Jemāer emoottok!” ekar ļamōj Heber.
Grace im būratōr ro an rekar deļōn̄ļo̧k. Grace ekkar leļo̧k pein im bakwōj jeman. Ekar lukkuun bakwōji. Ekar lukkuun em̧m̧an ke Jemāmi emoottok.
Ejjab to tokālik, bakij in m̧ōn̄ā, nuknuk, im uņo̧ ko rekar ittakļo̧k Holland. Ritōl ro an Kabun̄ in ilo Salt Lake City rekar jilkinļo̧k bwijin m̧weik ko n̄an jipan̄ armej ro ālkin tariņae eo. Jon̄an ekar bar wōr an Grace nuknuk! Ekar ekkaņōk ejja nuknuk ko wōt iumwin 5 iiō, kōn menin eļap an m̧ōņōņō bwe ewōr juon an nuknuk kāāl.
Ej kab juon kōttan ilowaan elōn̄ iiō ko, ej kab kijen Grace m̧ōn̄ā. Mijen Būreejtōnji ro im kien eo an Holland rekar kālet bwe ren jino juon būrojāāk in ekkat elōn̄ļo̧k ekkan. Membōr ro ilo Kabun̄ in rekar ekkat bitāto ilo juon jikin epaak. Ilo fall eo enej lukkuun taujin bitāto ļo̧k eo n̄an m̧ōn̄ā.
“Lale!” Grace ekar ba n̄an Jemān, ilo an jitōn̄ļo̧k ijo jikin bitato ko. “Jejamin bar kwoļle!”
Jema ekar kōm̧akūtkūt ko ak ekar jab marok. Ekar ba, “Ikar kōnono ippān Būreejtōn Zappey. Ekar ba n̄an eō bwe Armej ro Rekwojarjar ilo Raan-ko Āliktata ilo Germany bwe rej kwōle wōt, lukkuun āinwōt kōj. Rejjab bōk jipan̄ jān kien eo āinwōt kōj.” Jema ekar likūt pein ioon aeira im bakwōj eō. “Būreejtōn Zappey ekar kajjitōk eļan̄n̄e kōm maron̄ leļo̧k būtāto n̄an armej ro rekwojarjar ilo raan kein āliktata.”
“Leļo̧k bitāto!” Grace ekar jan̄. Ak Nazi ro er jān Germany! “Remaron̄ bar Armej ro Rekwojarjar ilo Raan-ko Āliktata, ak er ejja ri Germany wōt.”
“Ijeļā ejjab pidodo,” Jema ekar ba. “Ak rej barāinwōt nejin Anij. Ej bar iakwe er. Ikar jeorļo̧k aer bōd kōn aer kar likūt eō rikalbuuj. Irooj emaron̄ jipan̄ kōj aolep jeorļo̧k bōd.”
Grace ekar kalimjōk Jemān. Ekar juon armej eo eperan im ekar jeļā kake, ak ekar jab jeļā eļan̄n̄e eperan n̄an jeorļo̧k bōd āinwōt e. Innem ekar keememej juon iaan rūkaki ro ilo jikuuļ eo ilo pata eo. Rūkaki eo an ekar ba bwe ejjab aolep ri Germany rej Nazis, im ejjab aolep ri tariņae an Nazi renana. Im kiiō leddik im ļaddik ro ilo Germany rekar kwōle, āinwōt kar Grace.
Grace ekar bōk kutuōn. “Imeļeļe,” ekar ba. “Jen leļo̧k bitāto kane kijer.”
Jema ekar atbokwōj eō im ettōn̄dikdik. “Kwoj juon leddik eo eperan. Epen menin n̄an kōm̧m̧ane. Ak kōj jej rikaļooran Jisōs Kraist, im barāinwōt būratōr im sister ro ad jān Germany.
Grace eaar ettōn̄dikdik. En̄jake in illu ekar jako, im ekar en̄jake an dikļo̧k im em̧m̧an būruōn. Ekar joļo̧k an ri Germany ro bōd. Jisōs ekar jipan̄ e bwe en bar iakwe er.