Juon Kōjeraam̧m̧an ilo an Jinō Jeje
Douglas Hedger
Nevada, USA
Kōmļeļe ko jān Dilleen Marsh
Juon jota iaar kōļmenļo̧kjeņ kōn ta ennaan eo inaaj kwaļo̧ke ilo kweilo̧k eo eļap an ward eo ej pojān kōm̧m̧an. Iaar ekkatak jeje ko rekwojarjar ilo aolepen wiik eo, im men̄e iaar bōk eļap kōmeļeļe im ļōmņak ko, iaar jab bōk juon tōl im ealikkar kōn ta eo Irooj ekōņaan bwe n̄a, āinwōt stake būreejtōn eo, en kwaļo̧k n̄an membōr ro an ward eo.
Ilo juon jar, iaar kajjitōk kōn tōl an Jetōb n̄an tōl ļōmņak ko aō. Innām iaar kōpeļļo̧k jeje ko aō rekwojarjar im bar jino riit. Kōļmenļo̧kjeņ eo aō eaar m̧ōkaj an oktakļo̧k n̄an kōttōbar ko an ward eo me komro bisop eo kar kōnono kaki m̧okta. Juon iaan kōttōbar ko ej n̄an kōjerbal Preach My Gospel n̄an kwaļo̧k gospel eo n̄an ro m̧ōttam̧ im ro ipeļaakūm̧.
Iaar jino kobaik Preach My Gospel ilo ekkatak ko aō joteen eo. Iaar jibwetok juon kape im kar kōpeļļo̧ke n̄an ejjeļo̧k juon peij eļaptata. Ilo peij eo, iaar lo ruo eoon in jipan̄ ko kar je—1 Nipai 8:8–11 im 1 Nipai 11:21–22. Ke ij lukkuun kalimjōke, iaar kile bwe eoon ko raar eļtan pein jinō. Jinō eo ejitōn bōro eaar mej jet iiō rem̧ootļo̧k, ruo allōn̄ m̧okta jān iiō in ļotak eo an kein 80th. Eaar juon waanjon̄ok in peran im jab ļōmņak kōn e make, eo aolep iien ej lo em̧m̧an ippān armej ro. Im eaar iakwe jeje ko rekwojarjar.
Iaar kōpeļļo̧k n̄an eoon ko im lale ta eo ekar im̧we e bwe en je. Ke ij riiti, kōļmenļo̧kjeņ eo aō eaar m̧ōkaj an peļļo̧k n̄an ennaan eo me ij aikuj kōņono kake. Eaar juon ennaan eo eļam waan me membōr ro an Kabun̄ in ro raar bōk leen wōjke eo enno ilo gospel eo maron̄ jet iien meļo̧kļo̧k bwe elōn̄ ro jet rej pukote ejja leen in wōt. Jej aikuj in pukotļo̧k im jiron̄ er ia eo n̄an kappukōte.
Iaar kōļmenļo̧kjeņ kōn jinō ke ij riiti aolepān Preach My Gospel eo. Eaar ejjeļo̧k āt, ebar ejjeļo̧k ennaan ko, ak jabdewōt n̄an kwaļo̧k bwe bok eo eaar an. Iaar jijet im kejo̧kļo̧kjeņ kōn im̧we ko an jetōb me kar tōl ļo̧k n̄an menin. Jetōb eaar kapen n̄an eō bwe kar tōl ilo ļōmņak ko aō, ke iaar jar kake. Jinō eaar jeļā jidik, ijoke elōn̄ iiō ko rem̧ootļo̧k eaar je eoon kein, Irooj eaar kōjerbali n̄an uwaake jar eo ettā an ļaddik eo nejin.