Juon Kabwilōn̄lōn̄ ilo Mweo Im̧ōn Irooj ilo Kyiv
Doru Vasile
Bucharest, Romania
Kōmeļeļe jān Allen Garns
Baam̧le eo aō im n̄a kar m̧ōņōņō in ettōr ilo wa jān Romania n̄an Kyiv, Ukraine, n̄an aje eo an tampeļ eo ilo Okwōj 2010. Jeļā bwe tampeļ in enaaj n̄an ro Rekwojarjar ilo Romania/Moldova Mijen, kōm̧ ar ettōr 14 awa ko n̄an pād ijeņ. Ke kōmij tōparļo̧k, kōm eaar ioon bar juon kumi me raar bar itok jān Romania. Kōm ar aolep m̧ōņōņō in pād ilo Kyiv ilo iien eo ekwojarjar.
Ilo raan in aje eo, kumi eo ammim jān Romania kar alooje aje eo ilo kadiwōjļo̧k ilo ruum̧ eo ilaļ ilo tampeļ eo. Jet raar jino kwaļo̧k aer inepata. Raar kōjatdikdik n̄an bōk kūņaer ilo aje eo ippān rikanaan eo ilo celestial ruum̧. Jet raar ba ren kar pād wōt m̧weo m̧weer im alooje kadiwōjļo̧k eo jān m̧ōnjar eo aer ilo Romania.
Iaar jino jar ilo būruwō, “Jemedwōj Ilan̄, elmen am̧ jipan̄ membōr rein jān Romania bōk juon en̄jake eo ban meļo̧kļo̧k e ilo Mwiin Mōm̧?”
Iaar jab bōk juon uwaak m̧ae eaar jino m̧wen̄an in aje eo. Tokālik iaar jeļā bwe rikanaan eo, Būreejtōn Thomas S. Monson (1927–2018), ej tin wallaļtak n̄an likūt dāke in jeban eo ilo jikin. Bōlen en̄in ej uwaak eo ammim! Iaar jar kōn juon wāween bwe rikanaan eo en itok im iak-iakweik Armej ro Rekwojarjar jān Romania.
“Iaar jab kajjitōk menin n̄an n̄a make,” iaar jar, “ak n̄an ro jeiū im jatū.”
Ālkin kōjeraam̧m̧an eo an dāke in jeban em̧ eo, Būreejtōn Monson eaar etetaltok iturin ruum̧ eo ammim ilo iaļ eo an ļo̧k n̄an celestial ruum̧. Ejjab to, iaar en̄jake ilo būruwō ke ij aikuj jutak im kūr tok n̄an ruum̧ eo ammim.
Iaar jutak im kar ba, “Am rikanaan! Itok im lale kōm. Kōmij jān Romania.”
Āinwōt eaar jab ron̄ aō ikkūr. Innām, tokālik, eaar itok. Eaar ba, “Romania!” im kar deļo̧n̄tok ilo ruum̧ eo.
Eaar iak-iakwe kōm aolep im ba ej lukkuun iakwe kōm. Būruwō eaar obrak ke ij lale turin mej ko relem̧ōņōņō an membōr ro. Iaar jar, “Kom̧m̧ool, Jema jitōn bōro,” “kōn kabwilōn̄lōn̄ in ilo Mwiin Mōm̧.”
Ke rikanaan eo ej etal jān ruum̧ eo, ejjeļo̧k juon eaar būrom̧ōj. Iaar en̄jake bwe kōm eaar pād ilo ruum̧ eo ekar ejeraam̧m̧an tata ilo tampeļ eo. Ekar juon en̄jake iban meļo̧kļo̧ke.