Iminene ko me rej Kōpooj Eok n̄an Ilju im Jekļaj Eo Am̧
Jekdoon n̄e kwoj etal n̄an kaļōj, kappok jerbal, ak ekkatak kapeel, kwoj kōļapļo̧k m̧wil ko rekkar n̄an kalōk aelōn̄ in kiin̄ eo an Anij.
Ijjab tōmak jabdewōt leddik 14 an iiō ej kōttōbar n̄an jerbal ilo jikin menin mour ko rettoon, ineek jabōļ ko rejjo, karreoiki jikin o̧o̧j ko rettoon. Ak ikar jerbal ie aolep raan ālkin m̧ōj in aō jikuuļ m̧ae iien irūtto n̄an bōk juon jerbal eoktak.
Ekar jab lukkuun juon jekjek eo em̧m̧an n̄an jerbal ilo iien aō high school, ak ikar meļeļe bwe eļan̄n̄e ikōņaan juon jerbal eo em̧m̧an ippa—juon jerbal eo me ijjab aikuj karreo jikin menin mour ko—ikar aikuj jikuuļ ilo kaļōj, im bwe in etal n̄an kaļōj, ij aikuj jāān. Ikar jeļā ippa make, bwe jeļāļo̧kjeņ ekar juon bun̄ton eo ejim̧we n̄an kakūrm̧ool juon jerbal eo ikar (kōjatdikdik kake).
Men eo em̧m̧an ej bwe iminene eo ikar kālete ej juon iaer me emaron̄ jipan̄ eō ekkatak jerbal im kakke aikuj ko aō make. Menin in rej ņa etan ūn̄n̄are peid make ilo mour in kanniōk im ilo jetōb. Ilo am̧ ļōmņaki kālet ko am̧, kajjieon̄ kālet iminene eo me kwonaaj en̄jake bwe em̧m̧an tata im enaaj kōpooj eok.
Bwebwenato kein rej jān armej ro me rekar jon̄aer wōt kom̧ jejjo iiō rem̧ootļo̧k. Ilo am̧ ļoor waanjon̄ak ko an rūm̧m̧an ded rein, komaron̄ lo iaļam̧ n̄an tōprak ilo am̧ ūn̄n̄āre peim make.
Ļōmņak kōn Aikuj ko Ipeļaakim
Jān Oudom Piseth, Cambodia
Bwe in maron̄ tōpar kōttōbar eo aō, ij ba n̄an n̄a make bwe buuļ jerbal eļap an aorōk, ak bar juon wāween bwe jen tōprak jej aikuj jimaat ilo ad jerbal. Ālkin mijen eo aō ilo England, ikar jepļaak n̄an Cambodia im ikar lali jerbal ko ilo jikin kabbok jerbal ko. Ikar etale men ko āinwōt juon aeitokan kaminene bwe in maron̄ bōk juon jerbal im wōņāān kaminene eo.
Ikar lo bwe būrookōraam̧ in kaminene eo ej n̄an erom juon riwiakake nuknuk, ekadu ak epen, im eiiet armej rej kōm̧m̧ane. Ikar lo bwe ekar juon iaļ em̧m̧an im ikar kālet bwe in bōke. Kiiō em̧ōj aō kadedeikļo̧k būrookōraam eo im ij jerbal āinwōt juon riwiakake nuknuk ilo juon kom̧pani.
Tōpar juon jerbal em̧m̧an emaron̄ lukkuun pen, ak aō Rilo̧mo̧o̧r ej jipan̄ eō im kōketak eō.
Kōjerbal Jeļāļo̧kjeņ n̄an Kōpelļo̧k Kōjem Ko
Jān Iolanda Teixeira, Cape Verde, Africa
Jinō aolep iien ej rojan̄ eō kōn naan in, “Jeļāļo̧kjeņ ej kii eo n̄an tōprak.” Ikar kōņaan juon ilju im jekļaj eo em̧m̧an im eļaptata n̄an baam̧le eo aō, im n̄an kōm̧m̧ane menin, ikar aikuj wōnm̧aanļo̧k ilo jikuuļ. Ejjeļo̧k Jāān ilo tōre eo ke ij etal n̄an kaļōj, ikar kateruru n̄an jāān in jipan̄ ko n̄an pād ilo jikuuļ in kaminene ko n̄an ekkatak kōn kam̧putōr im kōkōm̧anm̧anļo̧k jorrāān ko.
Ilo iien aō kar jikuuļ ikar ioon eļap apan̄ ko, ak menin ekar jab kabōjrak eō jān aō kar wōnm̧aanļo̧k ilo aō lukkuun mije em̧m̧an eo an raan ko rej itok. Jar ekar ļap an jipan̄ eō; ikar ebbōk kapilōk jān Irooj aolep iien. Ikar lukkuun kōmaat aō ilo jikuuļ, im rainin ij kōmaat wōt aō ilo jerbal eo aō, jerbal jon̄an wōt aō maron̄ āinwōt juon rikōm̧m̧an kam̧putōr im rijipan̄ ilo jerbal in wiakake.
Jerbale Kiiō N̄an Ilju im Jekļaj eo Kokōņaan
Jān Ann-Sophie im Lawrence Cavin, Scotland, UK
Ann-Sophie: Ikar baj kōņaan wōt jikuuļ ilo university, ak karōk ko n̄an pād ilo jikuuļ ekar ļap an oktak ke ij jodikdik wōt. Ālkin ad diwōjļo̧k jān high school, ikar bōk koņaaō n̄an jerbal ilo aujpitōļ iumwin jiljilno allōn̄. Jān iien eo ikar kōņaan bwe in juon nōōj, ak ikar jab ļōmņak ke inaaj kar kōm̧m̧ane.
Ilo ward eo aō ewōr juon kūlaaj in un̄n̄are peid make, kar kajjitōkin kōm n̄an kālet juon jerbal eo me jekōņaan men̄e ejjeļo̧k ad jeļā kake. Ikar jar kōn ta eo in kōm̧m̧ane, im nōōj ekar itok wōt ilo kōļmenļo̧kjeņ eo aō. Ikar kālet bwe in ļoor im̧we an Irooj.
Ļoor iaļ in ekar jab pidodo. N̄an wōnm̧aanļo̧k wōt, ikar etale būrookōraam̧ eo an nōōjiin̄ im ta eo inaaj aikuj bōk ilo jikuuļ n̄an ekkatak. Ikar kōnono ippān armej ro me rekar pād ilo ejja būrookōraam̧ in wōt. Jinoin tata aō kar leļo̧k eta n̄an būrokōraam eo an nōōj, ikar pād ilo laajrak in etan armej ro jet me rej kōttar uwaak. Ak ikar jab ebbweer; ikar bar kaņņe abūļkāijen im āliktata ikar teru. Jet iien kwoj aikuj kijenmej im ļōke Irooj kōnke Ewōr make an karōk n̄an kwe.
Lawrence: Ke ikar dik, ikar kōm̧m̧an aō kōttōbar bwe in kate jon̄an wōt aō maron̄ jekdoon ta un eo ij katak kake ak jerbal ta eo aō. Ikar kajjieon̄ aolep iien n̄an lōke im kōkm̧anm̧anļo̧k bwe in leļo̧k aō n̄an tōpar kōttōbar.
Ij jerbal āinwōt juon māānija n̄an juon kom̧pani in nuknuk, ak ikar kōņaan bar kobaļo̧k ilo juon jerbal kōjparok armej. Ilo Scotland, kwoj aikuj jokwe ilo laļ en iumwin jilu iiō m̧okta jān am̧ kaņņe n̄an jerbal in kōjparok armej. Kōnke ikar diwōjļo̧k jān laļ en im jerbal in mijenede iumwin 2 iiō, ikar aikuj kōttar jejjo allōn̄ m̧okta jān aō kar kobaļo̧k ilo jerbal eo.
Men̄e ebwe an kar pen iaļ in, ijjan̄in ebbweer. Ewōr juon aō jerbal n̄an kakke baam̧le eo aō, im ikar lukkun buuļ jerbal n̄an lale bwe en wōr aō leta ko rem̧m̧an n̄an jerbal ko ilju im jekļaj.
Āinwōt rūm̧m̧an ded rein, kwonaaj lo bwe iaļ ko kajjojo remaron̄ kōpooj eok n̄an kakke aikuj ko am̧ im baam̧le eo ilju im jekļaj. Kōn kōttōbar in, komaron̄ karōk e bwe kwon tōprak ilo kōttōbar. Elder Dieter F. Uchtdorf jān doulul eo an Rijilōk ro Jon̄oulruo ekar katakin, “Jen kōm̧m̧ane ijo jemaron̄e im ejaake juon iminene n̄an kōm̧m̧ani aolep men ilo jejjet. Jen likūt ad ļōmņak im aolepān ad n̄an iien eo em̧m̧an im aibojooj n̄an jerbal eo me kajjojo raan ej letok” (“Two Principles for Any Economy,” Okt. 2009 kweilo̧k eo eļap). Ilo am̧ kōmaat am̧ ilo ekkatak im jerbal, kwonaaj ejaake juon iminene eo me enaaj jipan̄ eok en̄jake eļapļo̧k lōke ilju im jekļaj.