Elder Gerrit W. Gong: Iakwe Irooj im Lōke E
Juon rim̧are im rijikuuļ ekar kadiwōjļo̧k ilo England’s University of Oxford, Gerrit W. Gong ekar katak jān en̄jake im imminene ko an make ke n̄e jej iakwe Irooj im lōke E, Enaaj jipan̄ kōj, tōl kōj, im kōkajoorļo̧k kōj.
Gerrit ekar juon rijikuuļ ekar bōk jipan̄ in Rhodes Scholar n̄an jerbal im kadedeļo̧k ruo degree ko, juon iaer ej juon doctorate. Ejja iien in wōt, ekar jerbal ilo Oxford Ward bisoprik eo. E im kōrā eo pāleen, Susan, rekar keememej kōkapilōklōk eo me Elder David B. Haight (1906–2004) Jān Doulul eo an Jon̄oulruo Rijilōk ro ekar leļo̧k ke ekar kōm̧areiki erro ilo Salt Lake Temple. “Ekar jiron̄tok kōm n̄an bōk juon kūr (calling) aolep iien,” Elder Gong ej ba. “Kōm jeļā bwe eļan̄n̄e kōmij lōke Anij im kōm̧m̧ane ijo em̧m̧antata, Enaaj jipan̄ kōm̧.”
Gerrit im Susan rekar bōk “jipan̄ eo ekwojarjar im tūriamo̧ ko rejouj,” ej ba. Ke ej wōnm̧aanļo̧k wōt ilo eddo eo an ilo bisoprik eo, Gerrit ekar kadedeļo̧k aolep menin aikuj ko ilo an kar jikuuļ n̄an an bōk juon doctoral degree, ijjelo̧kin juon peba eaitok eaar je. Ekar kajjitōk ippān bisop eo an Oxford Ward eo, Alan Webster, kōn juon kōjeraam̧m̧an an priesthood. Ilo kōjeraam̧m̧an eo, Gerrit ekar bōk kallim̧ur in: “Wōnm̧aanļo̧k im kōm̧m̧ane aolep men ko komaron̄ e, im Irooj enaaj jipan̄ eok.”
Ruo membōr in ward eo rekar rijeje ro rejeļā kōn jerbal in kien rekar jipan̄ e je peba eo an, im Gerrit ekar maron̄ kam̧ōj peba eo eaitok eaikuj je ium̧win jejjo wōt allōn̄. Ilo m̧ool, ekar kadedeļo̧k jim̧or juon master im juon doctoral degree ilowaan wōt jilu iiō ko. Ke ej kadiwōjļo̧k eaar barāinwōt bōke n̄an juon jerbal āinwōt faculty research ilo university eo. En̄jake eo an ilo Oxford ekar kōkajoorļo̧k lōke eo an ilo Irooj, lōke bwe emaron̄ kijenmejtok n̄an rainin im enaaj wōnm̧aanļo̧k im kōjeraam̧m̧an Gerrit W. Gong āinwōt kiiō ej jerbal ilo Doulul eo an Jon̄oulruo Rijilōk ro.
Pilawe ko im Ek ko
“Irooj ejouj im meanwōd im ej pukōt n̄an kōjeraam̧m̧an kōj,” Elder Gong ej ba. “Eļan̄n̄e jej kōm̧m̧ane ijo em̧m̧antata jemaron̄ e, Enaaj kōtļo̧k ad kōm̧m̧ane eļapļo̧k jān ad maron̄. Ej āinwōt orļo̧k in pilawe ko im Ek ko. Irooj ej bōk ta eo ewōr im kōļapļo̧k eļapļo̧k jān ta eo me jemaron̄ in kōm̧m̧ane n̄an kōj make.”
Pedped in katak eo kōn pilawe ko im ek ko ej barāinwōt m̧ool kōn ekkatak, ej ba. “Men̄e kain jeļāļo̧kjeņ eo em̧m̧an ejjeļo̧k, jitbōn ekkatak ej men eo eaorōk, kōnke ekkatak ejjeļo̧k jem̧ļo̧kin. Kōj aolep maron̄ pukōt meram im m̧ool eo, jekdo̧o̧n ta jekjek ko ad. N̄e jej kōm̧m̧ane, Irooj enaaj jipan̄ kōj pukōt e.”
Ribujen ro
Ilo kar Oxford, Elder Gong ekar katak bar juon pedped an gospel eo, juon eo im ej ņaetan “ribujen ro.”
“Ilo am epaakeļo̧k Irooj, kōmij bar epaakeļo̧k doon,” ej ba. Ilo Oxford, Susan im n̄a kōmro kar kaorōke en̄jake ko am ilo ward eo jon̄an aorōkier wōt en̄jake ko am ilo jikin ekkatak. Elōn̄ wōt iaan ro m̧ōttam n̄an rainin rej armej ro jān Oxford Ward.”
Ilubwilijin rein m̧ōttam rej Tim im Katherine Witts, ro ij keememej aer kar etal n̄an tampeļ eo ippān baam̧le eo an Gong ro. “Ij keememej bwe Brother Gong ekar witik waj eo an bwe en jab kōm̧ad e ak kaddodoiki jān an kejōkļo̧kjeņ kōn men ko raorōk an indeeo,” Sister Witts ej ba. “Juon m̧akūtkūt edik eo me ekar jipan̄ eō tiljekļo̧k ilo aō make kabun̄jar ilo tampeļ eo.”
Baam̧le eo an Gong ro ekkā aer ioon ro m̧ōttaer rejeļā kajjeer kōnke kōn gospel in. “Armej renej ba, ‘Kōm kar jerbal ippam̧ ke kwaar pād ilo ko̧o̧njeļ eo eutiej,’ men rot kein,” Elder Gong ej ba, “im ej itok ilo wāween keinjim̧or. Ij kam̧oolol kōn juon stake būreejtōn im juon ward ko̧o̧njeļ eo me rekar jipan̄ eō āinwōt juon bisop edik. Kōmij aolep m̧uri n̄an jinen im jemān, ro jined im jemed, jeid im jadi an ro ippād (in-laws), ro retirūm̧, mijen būreejtōn ro, kōrā jeim̧ im jatūm̧, im ritōl ro an priesthood ro rekar jouj n̄an kōm, tōl kōm, im rōjan̄ kōm n̄an itok n̄an Kraist.”
Ro Ineen Baam̧le Eo
Menmenbwij eo an baam̧le eo an Elder Gong ej wanlikļo̧k 34 epepen ko n̄an First Dragon Gong, eo ekar ļotak ilo 837 Ālkin an Kraist mej (AD). Jibūn im jim̧aan Elder Gong rekar em̧m̧akūttok jān China n̄an United States. Jinen, Jean, ekar kobatok ilo Kabun̄ āinwōt juon jodikdik ilo Hawaii, USA, im tokālik jikuuļ ilo Brigham Young University ilo Provo, Utah, USA, ijo im ekar jokwe ie ippān baam̧le eo an Gerrit de Jong, rijojom̧ar eo kein kajuon an rijikuuļ ro ilo Kalōj kōn Fine Arts. Baam̧le eo an de Jong rekar jipan̄ eō meļeļe elmen āinwōt juon baam̧le ilo gospel,” ej ba.
Ālkin BYU, Jean ekar bar jikuuļ ilo Stanford University ilo Palo Alto, California, USA, ijo me ekar lo Walter A. Gong. “Ekar juon Rikūrijin kadede im ekar m̧ōkaj an meļeļe ta eo jepļaaktok eo an gospel eo ej bōktok,” Jean ej ba. Ekar kobatok ilo Kabun̄ in, im juon iiō tokālik rekar m̧are ilo Salt Lake Temple. Erro jim̧or rekar erom̧ rūkatakin ro retijem̧ļo̧k im m̧ōj aerro joļo̧k elōn̄ļo̧k jān 70 iiō ko ilo katakin.
“Baba ekar barāinwōt juon petriak,” Elder Gong ej ba, “im kōnke kōjeraam̧m̧an ko an petriak rekar kōm̧m̧an ilo m̧weo im̧ōm, m̧weo im̧ōm ekar obrak kōn juon kautiej em̧wilaļ kōn iakwe eo an Anij n̄an kajjojo ajri ro nejin.”
Ilo Tijem̧ba 23, 1963, ilo Redwood City, California, m̧aanje in ajri ro jilu nejin Jean im Walter ekar ļo̧tak. “Etan kar leļo̧k, Gerrit, ej RiDutch, n̄an kautiej Gerrit de Jong,” Jean ej kōmeļeļeiki. “Et eo etan juon ej Walter, n̄an kautiej jemān. Im etan baam̧le eo am ej RiChina, eo ej kautiej ļāmoren eo an.”
Jean ej ba Gerrit ekar kea kōn ajri ro jatin, Brian im Marguerite. “Ekōņaan jipan̄ er,” ej ba, “mekarta men ko reddik āinwōt katakin er likwōji toto in juuj ko aer.” Ej keememej an ro̧o̧ltok jān m̧ōnjar eo juon raan im mōkin ron̄ an Gerrit im Brian ba juon kōnono ilo kweilo̧k in kwojkwoj eo ekar kamejkiki. “Kōn menin ikar kajjitōk ippāer: ‘Ekwe kom̧iro kwaļo̧k juon kōnono em̧m̧an.’ Rekar uwaake kajjitōk eo im jino leļo̧k aerro eļapļo̧k n̄an aolep kōnono ko,” liin ej ba.
Āinwōt juon jodikdik, Gerrit em̧m̧an ippān loļo̧k bukwin wōjke im tōl ko im tallōn̄ ippān likao ro jet ilo ward eo an. Wally Salbacka, juon m̧ōttan ļaddik, ej keememej juon iien kāām tūrāāp ilo juon iien. “Ikar pād ijo ippān Gerrit im ļaddik eo jatin, Brian, im juon m̧ōttan ļaddik ejjab juon membōr in Kabun̄ in. Kōn jet un ko, kōm kar jino al. Gerrit ekar al raino, Brian ekar tōna, im ikar peej. Ij ļōmņak bwe kōm kar al 10 ak 20 al ko, kōn lan̄lōn̄ eo kōn al. Ekar juon en̄jake em̧m̧an. Eo m̧ōttam̧ ejjab membōr ekar bwilōn̄.
Brother Salbacka ekar barāinwōt keememej bwe ilo high school, Gerrit ekar kajjitōk ippān rikan̄n̄in̄i ro n̄an tōl rikan̄n̄in̄i ro ejjeļo̧k aer ennaan n̄an team in jōkab eo. “Ekar kareel er bwe jipan̄ ikijeen m̧wil erreo em̧m̧an n̄an aolep armej, “innām rekar liklo̧ke juon iien jiāe!”
Jān tuanmiin̄: Marjorie im Gordon B. Hinckley ej iakiakwe Gerrit im Susan ilo iien kōjota in m̧are eo an Gong. Āinwōt juon mijenede ilo Taiwan, Elde Gong ekar katakin juon baam̧le im iiō ko tokālik, āinwōt juon Ritōl Eutiej, ekar ioon juon iaan ļaddik ro jibūn juon iaan leddik ro ilo baam̧le eo. Ilo Vietnam, Elder im Sister Gong rekar jin̄aiki juon jin̄a ilo juon wall kileplep āinwōt juon iaļ n̄an bōktok ajri ro rej jelm̧ae apan̄ ko. Ro uwaan baam̧le eo an Gong rekar kuktok ippān doon ippān ro rej jipan̄ ilo jin̄a eo an wall eo ilo Vietnam.
Alkin high school, Elder Gong ekar jikuuļ ilo Brigham Young University. Jān 1973 n̄an 1975, ekar jerbal ilo Taiwan Taipei Mission, innām ro̧o̧ltok n̄an BYU, ijo ilo 1977 ekar bōk juon an bachelor degree kōn ekkatak kōn RiAsia im ekkatak katak ko jān university.
Iien Maanjabpopo n̄an Mare im Iien M̧are
Ālkin mijen eo an, Elder Gong ekar m̧ōņōņō in kōm̧m̧ane nokon in jota ko ilo Jabōt ilo Prove Missionary Training Center. Nokon in jota ko rekar jipan̄ mijenede ro rej etal n̄an Taiwan jeļā kōn armej ro, imminene ko, im m̧anit eo ijeņ. Juon iaan mijenede ro ekar Sister Susan Lindsay jān Taylorsville, Utah, leddik eo nejin Richard P. im Marian B. Lindsay. Brother Lindsay ekar juon membōr in Doulul eo Kein Karuo an Jiljilimjuonn̄oul eo. “Ikar en̄jake ke Susan ekar juon armej eo ikar aolep iien jeļā kajjeen,” Elder Gong ej ba.
Ruo iiō tokālik, jet allōn̄ ālkin an kar Susan bar ro̧o̧ltok n̄an BYU ālkin mijen eo an, Gerrit ekar pād ilo Provo ippān baam̧le eo an. Jemān ekar katakin ilo unversity eo, im Gerrit ekar karōk ruo wiik ko n̄an loļo̧k. Loļo̧k in ekar aetokļo̧k n̄an emān wiik ko, āinwōt e im Susan rekar bwebwenato aolep raan. Innān Gerrit ekar em̧m̧akūt n̄an juon ekkatak ilo Hawaii m̧okta jān an ro̧o̧lļo̧k n̄an Oxford.
“Kōm kōm̧m̧ao ippān doon jān ruo jikin ko rettoļo̧k jān doon,” Elder Gong ej keememej. “Ikar kajjieon̄ ekkatak ilo England ejja iien eo wōt katak aolep men imaron̄ in kar kōn liin jān iturājet in Atlantic Ocean.”
“Kōmro kar kallim̧ur n̄an doon ilo taļboon,” Sister Gong ej ba. “Ekar ro̧o̧ltok ilo iien Thanksgiving, im kōm kar m̧are ilo raan eo jinointata ke tampeļ eo ekar peļļo̧k ilo iiō eo ekāāl.” Ruo wiik tokālik, rekar kelo̧k n̄an England n̄an jino juon mour ekāāl ippān doon.
“N̄e armej rej m̧are, rej kōnono kōn ruo baam̧le ko rej erom̧ juon wōt baam̧le,” Elder Gong ej ba. “Im en̄ņe ta eo em̧ool ekar waļo̧ktok n̄an n̄a. Ij en̄jake aō m̧ōttan baam̧le eo an Lindsay, āinwōt aō m̧ōttan baam̧le eo an Gong.”
Juon Jerbal Eaorōk
Ālkin an kar joļo̧k jidik iien ilo faculty eo ilo Oxford, jerbal eo an Gerrit ekar oktak n̄an jerbal ko an kien ilo Washington, D.C., USA. Ilo 1984, ekar jerbal ippān jarin jerbal eo n̄an bar kālet Reagan–Bush, ijo im ekar jerbal ilo juon opiij ippān Mike Leavitt, eo im tokālik ekar erom̧ jeban jikin eo an Utah. “Gerrit ekar juon rietale im ļōmņak kōn elōn̄ men ko rem̧m̧an,” Brother Leavitt ej ba, “bōtaab ekar jeno̧lo̧k kōn an lukkuun jouj.”
Ilo 1985 Gerrit ekar jerbal āinwōt juon rijipan̄ n̄an im um̧win Secretary eo an State Department. Ilo 1987 ekar erom̧ juon rijipan̄ n̄an ambaasador eo an US ilo Beijing, China. Im jān 1989 n̄an 2001, ekar jerbal ilo jet jerbal ilo Center eo n̄an Strategic and Internation Studies ilo Washington, D.C. Innām ekar bar ro̧o̧lļo̧k n̄an jikin jeļāļo̧kjeņ ke ekar bōk juon jerbal āinwōt juon rijipan̄ n̄an būreejtōn eo n̄an strategic planning ilo BYU. Ekar joļo̧k ratimjuon iiō ko ilo jerbal in.
Carri Jenkins, rijipan̄ eo n̄an būreejtōn eo kōn wāween kōnono ko an university ilo BYU, ekar pād ilo opiij eo juon ilo kōjem̧ eo juon. Liin ej keememej kōn maron̄ eo an Gerrit Gong n̄an rōjan̄ armej ro ipeļaakin. “Eļan̄n̄e ejjeļo̧k am̧ lōke bwe komaron̄ in bōk juon jerbal epen, ewōr ippān lōke in kōn kwe,” liin ej ba. “Ekar kōm̧m̧ani men otemjej ilo kajoor eo an n̄an ko̧o̧njeļ eok, lewaj kōjatdikdik, im kōtļo̧k eo wōnm̧aanļo̧k im kam̧ool e n̄an kwe make.”
Riekajet eo an Federal Thomas B. Griffith, eo ekar jeļā kajjeen Elder Gong jim̧or ilo Washington im ilo BYU, ej kōmeļeļeik wāween an m̧akūtkūt ippān ilo wāween in: “Ilo jem̧ļo̧kin juon ekōnono, kwoj kile bwe jibadbad eo ekar kwe. E ej juon riron̄jake eo em̧m̧an. Im ej kajjitōk kajjitōk ko me rej kōm̧m̧an am̧ ļōmņak.”
Cecil O. Samuelson, Ritōl eo Eutiej ilo Jiljilimjuonn̄oul eo em̧ōj an kakkije im ekar juon būreejtōn ilo BYU, ej ba Elder Gong “ejeja an ennaan, ak jerbal ko rej aolep iien tōprak.”
Mour an Baam̧le
Gerrit im Susan Gong rekar erom̧ jinen im jemān emān ļaddik ro—Abraham, Samuel, Christopher, im Matthew—ro rekar rūttoļo̧k ilo elōn̄ jekjek ko.
“Ke kōm kar pād ilo Beijing, ajri ro nejūm̧ ekar wōr ippāer kōjeraam̧m̧an bwe ren m̧ōttā ro rem̧m̧antata n̄an doon,” Elder Gong ej ba.
“Ilo bar juon wāween, ekar wōr aer iien n̄an aer lo jikin ko jet ilo laļ in,” Sister Gong ej bar ba. “Ilo bar juon wāween, ekar jipan̄ kōm dim ippān doon āinwōt juon baam̧le. Ļaddik ro rej ba wōt n̄an kiiō men ko rem̧m̧an kōm ar kōm̧m̧ani āinwōt ro jinen im jemān kar leļo̧k n̄an er jem̧jen jem̧jati.”
“Ilo juon iien, ekar emakijkij bōk mileage ko jān ekkāke ko am,” Elder Gong ej ba. “Kōm kōtļo̧k an juon kālet juon jikin n̄an etal n̄ane. Kōm kar jinoe ilo Washington, D.C., ijo kōmij jokwe ie, innām kar etal n̄an England, Czech Republic, Greece, Turkey, India, China, im Japan.
“Ekar wōr juon am kakien epen ilo tūreep ko,” Susan ej ba. “Jabdewōt iien kōmij kar etal, kōmij m̧ōn̄ā ta ko armej ro raar m̧ōn̄ā.” Āliktata, ilo Japan ilo jem̧ļo̧kin tūreep eo, Elder Gong ekar jiron̄ļo̧k ļaddik ro nejin ke enej kar bōk er n̄an juon rejtōrōn ebun̄bun̄ kōn beef. Ilo McDonald, ļaddik ro emen rekwōle im jineer im jemāer rekar kōaaat 17 hamburger ko!
“Jim̧or Mama im Baba rekar likūt juon men eļap kōn katak jān imminene,” Abraham ej ba. “Baba ej lukkuun ļōmņak kōn ewi wāween an en̄jake kein ļame armej, ekoba m̧anit ko. Abraham ej barāinwōt kile bwe jemān “ej kōnono ilo an kōļmenļo̧kjeņ kōnke elukkuun meļeļe im tōmak ta eo ej ba.”
Sam ej keememej bwe “āinwōt an jemān kar boub ilo kar State Department eo, Jemān ekar joļo̧k iien aolep bon̄ n̄an tōl im katakin eō n̄an kūlaaj jilu jiāe bōnbōn eo me ikōņaan pād ie, kar ņaetan ‘Challenge 24.’ Ekar ba eļan̄n̄e inej wiin, kōm naaj bade kōn ice cream sundae ko im enej wōr 24 kain kāāre ko.” Sam ekar tōpare jiāe ko āliktata an laļ eo bōtaab ekar jab wiin. Baam̧le eo an Gong mekarta rekar etal wōt im m̧ōn̄ā sundae ice cream. Bōtaab ekar jab pidodo aer kōm̧m̧an bwen wōr 24 kāāre ko—juon ekar beef jerky.
Christopher im Matthew rej kwaļo̧k aer ennaan kōn ewi jon̄an aer “kam̧m̧oolol lōke, iakwe im wūjlepļo̧k eo jineer im jemāer rekar kwaļo̧ke.” Ej juon iakwe Elder im Sister Gong rekar kwaļo̧ke n̄an doon barāinwōt ippān kajjojo ļaddik ro nejier im ippān baam̧le ko aer jet.
“Barāinwōt āinwōt juon baba eo ewūjlepļo̧k, Gerrit ej juon ļaddik im būratōr eo ewūjlepļo̧k,” Susan ej ba. “Jerbal kein relukkuun aorōk n̄an e. Ej jipan̄ kōm meļeļe bwe jem̧jerā ko an baam̧le rej aorōktata iaan aolep men.”
En̄jake ko an Kabun̄
Mekarta eboub ilo jerbal im baam̧le, Elder Gong ekar m̧ōņōņō in jerbal ilo Kabun̄ in, kakūrm̧ool kūr ko āinwōt juon ko̧o̧njeļ eutiej, ritōl an pris ro routiej, būreejtōn an Jabōt Jikuuļ an Stake, rūkaki in jemenere, bisop, stake mijen būreejtōn, stake būreejtōn, im Eria Jiljilimjuonn̄oul.
Jabdewōt kūr kar kūri n̄an kōm̧m̧ane, im ilo baam̧le eo an, ej aolep iien kwaļo̧k kadkad ko rem̧ool. “Ej kalimjōk aolep āinwōt juon ļaddik ak leddik nejin Jemedwōj Ilan̄,” Sister Gong ej ba. “Ak ilōn̄ in men otemjej, ej iakwe Irooj. Ej lukkuun kōņaan ilo būruwōn n̄an kalōk aelōn̄ in kiin̄ eo im kōjeraam̧m̧an ajri ro nejin Jemedwōj Ilan̄.”
Im ej kautiej e kōrā eo pāleen. “Jabdewōt men kajjitōk ippa n̄an kōm̧m̧ane,” ej ba, “Susan ej pād iturejetiū. Kōrā in ippān ejeļā karōk an ippān aolep im ejjab ruwamaijet n̄an ro jet. Aolep iien ej m̧ōņōņō in etal n̄an juon jikin ekāāl im kajjieon̄e men ko rekāāl, ko me ij kam̧m̧oolo̧ļ kaki.”
Jerbal in Jipan̄ ippān Jiljimjuonn̄oul
Ilo Eprōl 3, 2010, Elder Gerrit W. Gong ekar rejtake āinwōt juon Ritōl Eutiej ilo Jiljilimjuonn̄oul eo. Kar jitōn̄ e n̄an Asia Area Būreejtōnji eo, opiij ilo opiij ko reļļap ilo Hong Kong. Tokālik ekar erom Būreejtōn an Asia Eria eo. Ilo Oktoba 6, 2015, Elder Gong kar rejtake n̄an Būreejtōnji eo an Jiljilimjuonn̄oul, ijo im en̄jake ko an ikijeen kajjojo laļ ekar wōnm̧aanļo̧k wōt, ekoba jikin ko etali ilo elōn̄ m̧ōttan ko an laļ in āinwōt Africa im Central America.
“Kwoj ioon im jino iakwe Armej ro Rekwojarjar ilo aolep jikin kein,” ej ba. “Kwoj en̄jake am̧ jeraam̧m̧an ilo an armej jiron̄ waj eok kōn tōmak eo aer, kōnke en̄jake ko aer kōn Anij ej jerbal ilo mour ko aer im erom m̧ōttan wōt ad meļeļe kōn wōn Anij im ewi wāween An iakwe kōj kajjojo.”
“N̄e jej jilkinļo̧k Elder Gong ilo jabdewōt jekjek, ro rej bōk koņaer rej lo juon m̧ōttaer,” Būreejtōn Russell M. Nelson ej ba. “Ewōr ippān juon jon̄an in jeļāļo̧kjeņ eļap, bōtaab e ej kōttāiki. Ej ekkejel ippān armej ilo aolep jon̄ak im ej aolep iien lukkuun m̧aanjabpopo im kōketak.”
Jān Anmiin̄: Ilo Thailand, Elder Gong ekar ioone Eo Ebun̄bun̄ Francis Xavier Cardinal Kriengsak Kovithavanij, the Catholic Archbishop of Bangkok. Elder Gong ej lan̄lōn̄ kōn tūreep ko kajjojo ippān ļaddik ro nejin, āinwōt tūreep in ilo Canada ippān ļaddik eo nejin Sam. Elder Gong ekar kwaļo̧k an ļōmņak kōn Pilawa in Mour eo ippān rūkaki in jemenere im institute ro ilo 2017. Sister Gong ej iakiakwe ilo m̧ōko im̧ōn juon membōr in Cambodia.
Kūr āinwōt juon Rijilōk
Ke Būreejtōn Nelson ekar leļo̧k kūr in n̄an Elder Gong n̄an jerbal āinwōt juon uwaan Doulul eo an Jon̄oulruo Rijilōk ro, rikanaan eo “kōn iakwe kar jibwe peiū ilo pein, Susan aō jitōn bōro iturejetū, im kar letok kūr kwojarjar in jān Irooj me ekar bōkļo̧k kūtuwō im kōm̧m̧an bwe in jan̄ elōn̄ alen ilo raan ko rej jem̧ļo̧kļo̧k” (“Kraist, Irooj E, Ear Jerkakbije Rainin,” Liaona, Māe 2018, 97). Ettā, ak lukkuun kōn iakwe eo an n̄an im lōke eo an ilo Irooj, Elder Gong ekar bōk kūr eo. Kar rejtake ilo M̧aaj 31, 2018. Kar lukkuun kōpooje jān Irooj, enaaj kiiō jerbal in karejar āinwōt juon “rikam̧ool [eaorōk] ilo etan Kraist ilo aolepān laļ in” (K&B 107:23).