Ekkatak ilo Wāween eo an Irooj
Jān Elder David A. Bednar
Jān Doulul eo an Jon̄oulruo Rijilōk ro
Jān juon ekōnono kar kwaļo̧k ilo kweilo̧k eo an mijen būreejtōn ro rekāāl ilo Juun 25, 2013.
Karuwaineneiki Jetōb Kwojarjar n̄an erom juon rikaki ej juon un eo ioļapļap ilo aolep jon̄ak in ekkatak ko an Irooj.
An Irooj kōmōkajļo̧k Jerbal in An ej aikuji ad ekkatak, oktak, im wōnm̧aanļo̧k aolep iien kōn tōmak ilo Rilo̧m̧o̧o̧r.
Juon Jon̄ak ilo Aolep Men
Ilo juon revelesōn kar letok n̄an Rikanaan Josep Smith ilo Juun 1831, Irooj ekar ba: “Inaaj lewōj n̄an kom̧ juon jon̄ok ilo aolep men kein, bwe kom̧in maron̄ jab po ilo m̧oņ; bwe Setan eajeeded ilo āne eo, im ej ilo̧k im m̧oņe laļ ko” (K&B 52:14).
Ekabwilōn̄lōn̄ bwe Irooj ekar letok n̄an kōj “juon” im jab jon̄ak “eo” n̄an aolep men. Ijjab tōmak bwe Irooj ej kōjerbal kajin in “juon jon̄ak ilo aolep men” me āinwōt n̄e ewōr wōt juon An jon̄ak n̄an kōjerbale ilo aolep jekjek ko. Ijjelo̧kin menin, wāween eo Irooj ekōņaan ekitbuuj elōn̄ kain jon̄ak ko me emaron̄ jerbal n̄an tōpar kōtōpar ko reokkotaktak an jetōb.
Kōttōpar ko ad ilo wāween ekkatak im katakin ej aikuj ļōme im kōjerbal jon̄ak eo ak jon̄ak ko me rej kakke aikuj ko im tōpar tōprak in ekkatak ko me rekkar.
Jetōb Kwojarjar Ej Juon Rikaki
Jetōb Kwojarjar ej membōr eo kein kajilu ilo taitōļ in Anij im juon Ribōk Revelesōn, juon Rikaki, juon Rikaenōm̧m̧an, juon Rikarreo jān Jero̧wiwi, im Ej kakememej men otemjej n̄an kōj (lale Jon 14:16–17, 26; 3 Nipai 27:20). Elder James E. Talmage (1862–1933) jān Doulul eo an Rijilōk ro Jon̄oulruo ekar kōmeļeļe, “Opiij eo an Jetōb Kwojarjar ilo Jerbal in Lo̧mo̧o̧r eo An ilubwiljin armej ro em̧ōj kōmeļeļeiki ilo jeje ko rekwojarjar. Ej juon rikaki kar jilkintok jān Jemed Ilan̄; im n̄an ro me rej mour ekkar n̄an katak ko An Enaaj kwaļo̧k aolep men ko remenin aikuj n̄an em̧m̧anļo̧k eo an jetōb ko aer.”1 Karuwaineneik Jetōb Kwojarjar n̄an erom juon rikaki ej juon kōttōpar ioļaptata ilo aolep jon̄ak ko an Irooj n̄an ekkatak im katakin.
Juon rikatak eo ej kōjerbal aņemkwōj eo an im kōm̧m̧an ekkar n̄an katak ko rejim̧we ej kōpelļo̧k buruōn n̄an Jetōb Kwojarjar—im ilo wāween in ej karuwaineneik katak ko An, kam̧ool kōn kajoor, im rikam̧ool eo em̧ool. Ekkatak ippān im kōn tōmak ej aikuji kijejeto eo ilo jetōb, kōļmenļo̧kjeņ, im ānbwin im jab baj bōki wōt katak ko ilo am̧ jab kōm̧m̧ani. Kōn m̧ool im tiljek kōn tōmak ko ad ilo ad jerbale, jej kwaļo̧k n̄an Jemedwōj Ilan̄ im Eo Nejin Jisōs Kraist ad ikdelel n̄an ekkatak im bōk kōmeļeļe ko jān Jetōb Kwojarjar.
Ļōmņak wāween an mijinede ro jipan̄ rikatak ro n̄an ekkatak kōn tōmak. Kōm̧m̧an im kōjparok kalim̧m̧ur an jetōb, āinwōt ekkatak im jar kōn Bok in Mormon, kōjparok kien ko, im pād ilo iien kweilo̧k ko an Kabun̄ in emenin aikuj n̄an juon rikatak bwe en kamineneiki tōmak eo an im jerbale. Katak in ej barāinwōt n̄an membōr ro, ekitbuuj mama im baba ro, rikaki ro, im ritōl ro.
Katakin, kapilōklōk, im kōmeļeļe—relukkun bar aorōk—rejjab maron̄ kwaļo̧k n̄an juon rikatak, juon ajri, juon rijikuul, ak juon membōr juon kam̧ool kōn m̧ool eo an gospel eo me em̧ōj an jepļaaktok. Mae iien tōmak ko ej jino jerbal im kōpelļo̧k buruōer Jetōb Kwojarjar emaron̄ kwaļo̧k kam̧ool ko rem̧ool n̄an er. Mijinede, mama im baba ro, rikaki ro, im ritōl ro ealikkar bwe rej aikuj ekkatak n̄an katakin jān kajoor eo an Jetōb. Kōn an jon̄an wōt juon aorōkier, ijoke, ej juon eddo epād ippāer n̄an jipan̄ ro jet ekkatak kōn tōmak eo aer make.
Ekkatak in ij kōnono kake eļapļo̧k jān jon̄an ad maron̄ meļeļe kake im ad dāpij im kakeememej meļeļe ko. Kain ekkatak in ij kōnono kake ej kōm̧m̧an bwe jen rujļo̧k n̄an Anij (lale Alma 5:7), utūkļo̧k armej eo ilo lukkun biktokin (lale Mosaia 3:19), n̄an ukōt buruōd (lale Mosaia 5:2), oktak tok n̄an Irooj im jamin bar bun̄ (lale Alma 23:6). Ekkatak kōn tōmak emenin aikuj jim̧or ilo bōro im ikdelel in ļōmņak (lale K&B 64:34) im ej tōprak in an Jetōb Kwojarjar bōktok kajoor in naan an Anij n̄an jim̧or ilo bōro. Ekkatak ilo an lōn̄ tōmak ejjab etal jān juon rikaki n̄an juon rijikuul, jān juon mijinede n̄an juon rikatak, kōn juon katak, juon kōmeļeļe, ak juon iminene; ijeļo̧kin, juon rijikuul ej aikuj kōmmoururi tōmak eo an im jerbale ilo jejjetin n̄an bōk juon jeļāļo̧kjeņ
Juon Jon̄ak n̄an Ekkatak im Katakin
1. Kōppopo n̄an ekkatak. Eļan̄n̄e kwoj pād ilo kūļaaj ko an Jabōt Jikuul im ron̄jake an rikaki eo kwaļo̧k unin kōnono eo, ej juon men em̧m̧an. Ak eļan̄n̄e em̧ōj am̧ jerbale im kōpooje, eļan̄n̄e kwoj ļōmņak kōn men ko rikaki eo am̧ ekar kūr eok n̄an riiti, kejokļo̧kjeņ kake, jar kake m̧okta jān kūļaaj, emaron̄ wōr juon kajoor in Jetōb ej lutōkleplep, im Jetōb Kwojarjar enej erom juon am̧ rikaki. m̧aanjabpopo ej letok revelesōn
Ippān doon n̄an kōketak. Ikōņaan bwe kom̧ en lukkun lale eoon in. “Jitōn̄ ilubwiljimi juon rikaki, im aolep ren jab rikōnono ilo juon wōt iien; ak juon en ekkōnono ilo juon iien im aolep ren ron̄jake ennaan ko an, bwe n̄e em̧ōj an aolep kar kōnono aolep ren maron̄ ketak jān aolep, im bwe kajjojo armej en maron̄ wōr an iien utiej in ekkōnono.” (K&B 88:122).
En̄in ej juon iaan jon̄ak ko an Irooj rekajoor n̄an ekkatak im katakin. Imaron̄ ke kwaļo̧k bar juon wāween ilo kōjerbal eoon in: “Jitōn̄ ilubwiljimi juon rikaki.” Wōn eo ej rikaki? Jetōb Kwojarjar. Emaron̄ ke bwe eļan̄n̄e kokōņaan bwe Jetōb Kwojarjar en juon rikaki, innem “juon en [ekkōnono] ilo juon iien im aolep ren ron̄jake ennaan ko an, bwe n̄e em̧ōj an aolep kar kōnono aolep ren maron̄ ketak jān aolep”? Men eo wōt emaron̄ kōketak ej Jetōb Kwojarjar.
Ippān doon n̄an kōketak ej karuwaineneiki revelesōn. Kiiō ilo Kabun̄ in, jej ekkatak im mour kōļapļo̧k mour in jetōb, niknik, mour kōn jon̄ak ko n̄an ekkatak im katakin remenin aikuj. Jenaaj ke kōm̧m̧ane aolep iien men ko me ekkā ad kōm̧m̧ani im bōk ejja tōprak eo wōt me ekkā ad bōke, ak ad ukweļo̧k im ekkatak im oktak im katakin enaaj ke kōļapļo̧k wāween eo Irooj ekōņaan?
3. Kūr n̄an jerbale. Juon kajjitōk epidodo ej jipan̄ tōpar kōttōpar in. Ta eo konaaj kōm̧m̧ane kōn ta eo kwar ekkatak? Jerbal kōn revelesōn ej letok eļapļo̧k revelesōn.
Ij jar bwe jenaaj jon̄an wōt juon Ippān Irooj, bwe jen jab baj kōm̧m̧ane wōt ejja men ko wōt jekar kōm̧m̧ane m̧okta.
Ij kwaļo̧k aō kam̧ool kōn mour eo an Irooj Jisōs Kraist em̧ool. Ijeļā bwe E emour. Eaar jerkakpeje. Ej jutak ilo bōran Kabun̄ in im Ej tōl e. Ej jiron̄ kōj aolep bwe jen jon̄an wōt juon Ippān im ļoor jon̄ak ko an me em̧ōj An kar karōke n̄an ad eddōk im ekkatak.