Bwebwenato ko an Ijo Jokwe ie
Loe ilo juon Mijen, Bar ioon doon ilo juon Mijen
Ilo 1982 ilo bukwōn ko iturear rettoļo̧k jān jikin kweilo̧k ko reļļap ilo Melbourne, Australia, Elder Laddie Stewart im Micheal Bouy rekar kōļļaļaļ ilo kōjem̧ eo aō. Ruo iaan ro m̧ōtta—Steve Byrne and Chris Murphy—rekar kobaļo̧k ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata ke ikar jidik wōt jeļā kake.
Ium̧win 10 iiō ko rej eļļā m̧oktaļo̧k ikar itok limo iō ilo kabun̄ ļōmņak im kar ‘kappukot’ m̧ool. Ke rein m̧ōtta Steve im Chris rekar kobatok ilo Kabun̄ in, ikar kajjieon̄ kareel er bwe ebōd men eo rekar kōm̧m̧ane.
Ium̧win allōn̄ ko tokālkin jān tōre eo elder ro rekar itok n̄an m̧weo imō, Elder Stewart im Bouy rekar katakin eō jepļaaktok eo an gospel eo an Jisōs Kraist. Ilo M̧aaj 26th, 1983, ikar peptaij im kapen juon membōr uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata jān ro m̧ōtta, Steve im Chris, ilo m̧ōnjar eo an Croydon ilo Melbourne.
Jān iien peptaij eo aō ekar wōr aō iien em̧m̧an n̄an jerbal ilo elōn̄ kūr ko āinwōt Bisop eo an Lilydale Ward—im Stake Būreejtōn eo an Canberra Australia Stake.
Ilo 2016, 33 iiō tokālkin jān tōre eo mijenede ro rekar itok n̄an mour eo aō, ikar kūr n̄an jerbal āinwōt juon mijen būreejtōn n̄an Marshall Islands/Kiribati Mission. Ekar juon jeraam̧m̧an n̄an maron̄ bōk kūr n̄an juon jikin eaiboojoj im wōnm̧aanļo̧k ilo jerbal in lo̧mo̧o̧r eo n̄an n̄a, eo ekar ijjino ilo iien peptaij eo aō eļapļo̧k jān jiln̄uul iiō m̧oktaļo̧k.
Lan̄lōn̄ ilo kajedeed gospel eo ekar kōjeraam̧m̧an mour eo aō ium̧win elōn̄ iiō im kar aaet em̧m̧anļo̧k ilo 2017, ikar kwaļo̧k n̄an Laddie im kōrā eo pāleen, Lorrie, bwe ren ļōmņak in jerbale juon mijen ilo Moroni High School—juon jerbal eo ilowaan mijen eo me renaaj jipan̄ ilo katakin rūkaki ro an jikuuļ in.
Jim̧or Laddie im Lorrie ewōr jerbal in iminene ilo jeļāļo̧kjeņ, eo ekar kōm̧m̧an bwe ren jejjet n̄an jerbal in ilo Moroni. Ikar kōm̧m̧an karōk n̄an Stewart rein bwe ren kōnono ippān couple mijenede ro jet rerūtto rej jerbal ilo jikuuļ in im m̧okta Stewart rein rekar errā in kanne peba n̄an jerbal eo.
Ilo jem̧ļo̧kin O̧kwōj 2018, kūr eo aer āliktata ekar itok. Stewart rein kiiō rej lukkuun ijjitōn̄ n̄an jerbale mijen eo aer ilo Moroni High School, Tarawa, ijjin ilo Jānwōde 2019.
Elder Laddie Stewart ekar katakin eō ke ekar juon mijenede 19 an iiō. Kiiō, 35 iiō tokālik, rūkatak eo an enaaj jerbal āinwōt mijen būreejtōn eo an ilo an Laddie bar jerbal, iien in ej kiiō ippān kōrā eo pāleen.
Kōjeraam̧m̧an in jān Irooj ekar lukkuun un̄ūr būruwō. Ij m̧ōņōņō bwe ewōr aō iien em̧m̧an n̄an bar ioon doon ippān ‘mijenede eo aō’, eļaptata ilo am jerbal ippān doon ilo ejja jerbal in ekwojarjar me ekar bōktok kom̧ ippān doon jinoin tata.