Te Taratara Raoi ni kaitaraaki ma te Mamanikangare
Ngkana ana kairoro te aonaaba e rikirake ni butimwaea te buakaka, ti riai ni keiaki ma te botumwaaka ni karaoi baike a na kariira ma te kamanoaki nakon ara Tia Kamaiu.
N te taina I noora te koroboki iaon te wintoo ae kangai, “Te kukurei, $15.00.” I bon rangi ni kan ataia bwa mwaitira te kukurei are I kona ni kabooa ibukin $15 ngaia are I nako ao n rin n nooria. Bwaai aika I noori bon bwaai aika boraoi ao n rangi n tamaroa karaoaia ao bwaai ni kanuring—akea te bwai teuana ae I nooria are e kona n anganai kukureiu are e oti n te koroboki arei! Inanon ririki aika bati, I angoa te koroboki arei n te tai e mwaiti bwa e na kanga ni bebete karekean te kukurei ni baika a booraoi ke aki teimaan. Ngkai membwa n Ana Ekaretia Iesu Kristo ibukiia Aika Itiaki ni Boong aika Kaitira, ti kakabwaiaaki n ataia bwa e kanga ao e reke ia te kukurei ae koaua. E bon kuneaki ni maiuakinan raoi te euangkerio are e kateaki iroun ara Uea ao ara Tia Kamaiu, Iesu Kristo, ao ni kekeiaki n riki n ai Arona.
Iai raoraora ae tangiraki ae te Intinia n te turein. N te bong teuana ngke e kabuta te turein iaon kawaina, e noora te kaa n tei n te kawai are i moana. E waekoa n ataia bwa e bae te kaa ao n aki kona ni kitana kawain te turein. E waekoa ngkekei naba ni kabureika te turein, are e a karikii naba bureikin autin nako te turein are abwakina bon (1.21) te kiromiita i bukin te intin, ni uota te rawawata ae 6,500 te tan (5,897 metric tons). Bon akea te bwai ae e na kona ni kateaki iai te turein i mwain ae kuratina te kaa, ao e bon kuratinna. A tekeraoi aomata ake n te kaa, bwa a ongo te buu ni kauring man te turein ao a kitana te kaa i mwain ae kauntaba. Ngke e taetae te intinia ma te bureitiman are e kakae rongorongo, temanna te aine ae un e kainetiia. E taku bwa e bon noora ni kabane te bwai ae riki ao imwina e taekinna bwa te intinia e aki naba kataia ni bita kawaina bwa e aonga n aki kuratina te kaa!
E ootara bwa, ngke arona bwa te intinia e a tia ni bita te kawai ao ni kitana kawain te turein n totokoa te kurati, ngaia ao a na turein ni kabane a na bua man kitanan kawain te turein ao butin te turein e na karina n toki. E tekeraoi bwa, bitini kawain te turein ake e buti iaona ana turein e kabutii ni kamatoaa nainain te turein nako mooa ni kaea te tabo are e nako iai n aki tabe ma te totoko are imwain kawaina. Ti tekeraoi bwa, ngaira naba ti mena iaon te kawai, kawain te berita are ti berita nako iai ngke ti bwabetioaki bwa membwa n Ana Ekaretia Iesu Kristo ibukiia Aika Itiaki ni Boong aika Kaitira. E ngae ngke ti kona ni kaitara ma tabeua totoko iaon te kawai, te kawai aio e na kateimatoaira ni mwaing nako mooa nakon tokira ae akea tokina are bon kanuangara ngkana ti teimatoa i aona.
Te mi ni burabeti iaon te kai ni kamaiu e kaotia nakoira bwa e kanga mwiin te aki tarabwai ni kairiira nako man kawain te berita. Iangoia bwa te kai ae te biti ao te kawai ae eti ma n irariki, ke kawain te berita, are e kaeineti nakon te kai ni kamaiu, ike ni kabane kakabwaia ake a katauraoaki iroun ara Tia Kamaiu ao Ana Mwakuri ni Kamaiu a tauraoi nakoia ake a kakaonimaki. Ae nooraki naba n te mi ni burabeti bon te karaanga n ran are tei ibukin te kammaira. Koroboki aika tabu a kabwarabwaraa bwa te karaanga aio e “raanga nako” n te kawai aei ma e ti “uakaan” ma te kai, ao e aki toma nako iai. E onrake te aonaba n taian kamangaongao ake a kona n burebureiia ake a rineaki, ni karikiia bwa a na aki tarabwai ni maiuakinan aia berita—ngaia are e kairiia nako rarikin te kai, ao tiaki nako iai. Ngkana ti aki taratara raoi ni maiuakinan raoi ara berita, n tokin te tai ara waaki n aki tarabwai e na kairiira nakon kawai aika aki ataaki taekaia ke n raoniia naake a tia ni kaaina te kateitei ae moan te korakora ma ni buubura. Ngkana ti aki taratara raoi ti na kona ni bwabwa i nanon te karaaanga are kammaira.1
Iai te kawai n taratara raoi ao n aki tarabwai ni karaoan bwaai nako, n ikotaki ma maiuakinan te euangkerio. Ngkai ti iangoa ara mwioko nakon te Tia Kamaiu, ti taratara raoi ke ti aki tarabwai? Ibukina bwa iai arora n rabwata, tiaki n tabetai ae ti kanuui arora, ao n tabetai ti taekini ara mwakuri bwa a mena i nuuka, ke renganan te raoiroi ma te bwai ae aki rangi n raoiroi? N te tai are ti taekina iai, “e ngae n anne,” “ti ngkana,” ke “ma” ngkana ti taekin aikai ni kaeineti ma aia reirei ara taan kairiiri aika burabeti ke maiuakinan raoi te euangkerio, ni koauana ti bon kangai, “Te reirei anne bon tiaki ibukiu.” Ti kona ni kanuui arora nako, ma te koaua bon, akea te kawai ae eti ibukin karaoan te bwai ae kairua!
Te botoniango ibukiia kairake ibukin 2019 e anaaki man Ioane 14:15, ike e reirei iai te Uea: “Ngkana kam tangirai, ao kam na tou mwin au tua.” Ngkana ti tangiria n aron are ti taku, ti kona ni kaota te tangira anne man karakaan riki ara taratara raoi ni maiuakinan Ana tua nako?
Te taratara raoi ni maiuakinan te euangkerio e aki nanonaki kaetan angan bwaai ke n ae rangi n riao. Nanona raoi bon iangoan ao karaoan baika a riai ngkai ngaira n tabera bwa ana reirei Iesu Kristo. Ngkai ti iangoa te kaokoro imarenan te taratara raoi ao te aki tarabwai ni maiuakinan te euangkerio, aikai tabeua iango ake a kona n taraaki:
Ti taratara raoi inanon ara nebonebo n te bong ae te Tabati ao n ara katauraoi n anaa te toa ni katoa wiiki?
Ti kona riki ni karaoa raoi ara tataro ma ara kamatebwai ni koroboki aika tabu ke ni katabea riki nanora ma Nakomai Iriirai—Ibukiia Aomata n tatabemaniia ao Utu?
Ti taratara raoi inanon ara nebonebo n te tembora, ao ti maiuakini ma te iango ao te motinnano ara berita aika tabu ake ti karaoi n te bwabetito ao n te tembora? Ti taratara raoi n aron taraakira ao a tararaoi oneara, riki n taabo ao ni baika a tabu? Ti taratara raoi n aron kamanenaan ara kunnikai man te tembora aika tabu? Ke aron tein kunnikai n te aonaaba e anga te kawai ae aki taraaraoi?
Ti taratara raoi n arora ni buokiia tabeman ao n arora ni kakoroa nanon nakoara n te Ekaretia ke akea raoi nanora ao ti aki tarabwai ni weteara ngkai ti na beku?
Ti tarai raoi ke ti aki tarai raoi baike ti wareki ao baike ti matakuakin n te TV ao iaon ara tareboon? Ti taratara raoi inanon ara taetae? Ke ti kukurei ni baika a aki karinerine man kammaira?
Te boki ae Ibukin kakorakorakiia Kairake iai i nanona koaua ake, ngkana a iraki raoi, ao a na karokoa te kakabwaia ae bati ao ni buokiira n teimatoa ni kawain te berita ae tabu. E ngae ngke e koreaki ibukin karikirakeaia te roronrikirake, koaua ake i nanona a aki bane taia n te tai are ti kitana iai te Bootaki n Ataenimwaane ke te Bootaki n Ataeinaine. Bon ibukira n tatabemaniira nako n taainako. Manga rinanoan koaua aikai a kona ni karekei riki tabeua kawai ake ti kona riki iai n taratara raoi ni maiuakinan te euangkeiro iroura.
Ti aki kabwakai kateira bwa ti aonga n tatangiraki irouia tabeman ke ni kamwengaraoa riki temanna. Ngaira bon ana reirei Iesu Kristo, ao ibukin anne ti waaki i nanon boutokakiia tabeman, tabekaia rake nakon te tabo ae rietaata riki, man tabu ike a na kona naba iai ni karekei kakabwaia aika a bati.
I kaoira ngaira ni kabane bwa ti na ukora ana kairiiri te Tamnei ae Raoiroi n ataia bwa tera bitaki ake ti kainnanoi ni karaoi i nanon maiura bwa ti aonga ni maiuakinii ara berita aika tabu. I bubuti naba nakoimi bwa kam na aki momotikitaeka nakoia tabeman ake a mwananga naba n te kawai aio. “Bon au bwai te motikitaeka, e taku te Uea.”2 Ti mena n te waaki n rikirake ao ni bitaki.
Te karaki n ana Boki Moomon are karakinaia aomata aika kitana te aro aika Ameritinaite e bon kakaongora nakoiu. N te aro bwa a na ataia aomata bwa a aikoa irekereke ma Iesu Kristo ao Ana Ekaretia, a karaoa te kanikina ae onoti are te uraura iaon ramwaia bwa e na nooraki irouia aomata nako.3 Ni kaitaraan anne, ao ngkai ngaira ana reirei Iesu Kristo, tera are ti na kanikinaeira iai? A kona tabeman ni kai noora Tein tarakina ni moara ao n ataia bwa antai ae ti katerea n ara mwakuri aika raraoi ni maiura?
Ibukina bwa ngaira aomata aika beritanaki ti aki kantaningaki bwa ti na boraoi ma te aonaba ni kabanea. Ti a tia n aranaki bwa “te botanaomata ae itiaki”4—aio bon te taeka ni karinerine! Ngkana ana kairoro te aonaaba e rikirake ni butimwaea te buakaka, ti riai ni keiaki ma te botumwaaka ni karaoi baike a na kairiira ma te kamanoaki nakon ara Tia Kamaiu, ni katabea nanora n ara berita aika tabu ao n aki tabe n ana waaki nako te aonaaba.
Ngke I iangoa karekean te kukurei ae teimatoa, I nooria bwa n tabetai ti bon rinanoi naba ara rinerine aika bure. Taian bubu n nang aika roo a na bon roko ngkai ti mwananga iaon kawain te berita ae tabu. Te kariiri ao te aki tarabwai e kona ni karaurau ni bita kawaira nakon baika aki raoiroi n te aonaaba ao n raroa nako man kawain te berita ae tabu. N taai ake a kona n riki aikai, ara burabeti ae tangiraki, Beretitenti Russell M. Nelson, e a tia ni kaumakiira bwa ti na oki rikaaki nakon kawain te berita ae tabu ao ni katawea karaoan aei. I karabwarabwa ibukin ana bwaintangira te rairannano ao ibukin mwaakan Ana Mwakuri ni Kamaiu te Tia Kamaiu.
E kanganga maiuakinan te maiu ae kororaoi. Ti temanna te aomata are e kona ni maiu n ae kororaoi ngke e mena n te aonaaba ae te teretio aio. Ngaia bon Iesu Kristo. E ngae ngke ti aki kororaoi, tariu ma mwaaneu, ti kona n tau: n tau n anaa te toa, n tau ibukin ana kakabwaia te tembora, ao n tau ni karekea te kaotioti ae onoti.
E kakoaua te Uea Beniamina n taian kakabwaia ao te kukurei are a reke irouia naake a taua ma nanoia n ira te Tia Kamaiu: “Ai moarara riki, I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni kakaonimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki.”5
E kona ni kabooaki te kukurei n $15? E bon aki. Te kukurei ae nano man teimatoa e roko man nanom ni koaua ao te taratara raoi ni maiuakinan ana euangkerio Iesu Kristo. N aran Iesu Kristo, amen.