Mark L. Pace

Beretitenti ni Kabuta n te Reirei n Tabati

N te intawaiu ae kateaki ni weteana n riki bwa te Beretitenti ni Kabuta ae boou n te Reirei n Tabati, te Tari Mark L. Pace e anga ana motinnano n irianna ma te tataromwaaka.

“Tamara are i Karawa, baikara bwaai ake Ko tangiria bwa N na karaoi, I kukurei ni karaoi,” e tataro. “Tii ataia bwa e bon bane nanou iai.”

E taku te Tari bwa oin ana kantaninga ni weteana aei bon kakabwaiakiia, boutokakiia, ao kaungakiia membwa n te Ekaretia. “Ti tangiria n anga bwaai ni kabane ake iroura,” e taetae ibukin te Beretitentii ni Kabuta n te Reirei n Tabati.

Mark Leonard Pace e bungiaki n Tianuare 1, 1957, n Buenos Aires, Argentina, irouia Lorin Nelson ao Marylynn Haymore Pace. N te tai anne, ana karo te Tari Pace e tararua Argentine Mition.

Te Tari Pace e kaitibo ma kainnabana, Anne Marie Langeland, ngke naaka uoman aikai a kaai ni mena n teuana te kiraati n te kauoua ni koraki i Salt Lake City, Utah, USA. Imwina, inanon kaean kauarinan reirei aika a kakaokoro n te kaawa, a ikotaki n teuana ana waaki ni kakukurei te Tieminari. A kaai ni kororeta imarenaia inanon tabeua te ririki ngke e raoniia ana utu nako Norway, ike Tamana e tararua Norway Oslo Mition, ao inanon te tai are te Tari Pace e beku i Spain Madrid Mition. A mareaki n te Salt Lake Tembora n Nobembwa 21, 1978, ao bon kaaro aika itiman natiia.

E karekea ana beeba te Tari Pace ae te baetira tikurii n te ikaonamiki man te Iuniwetiri i Utah n 1980 ao ma ana mwaatita ibukin tararuaan te bitineti mai Harvard Business School n 1982. Imwiin ana mwakuri ae uarereke ma Price Waterhouse i New York City, e kaaina te Boyer Company i Salt Lake City, ni katanoataan te karikirake ibukin te kabooaba man 1984 nakon 2012. Imwiin teniua n ririki ni katabeana ae te beretitenti n te Spain Barcelona Mition, e kaaina te Gardner Company n 2015, ni karaoan te karikirake ibukin te kabooaba.

Inanon ana tai ni weteana ae boou, e beku te Tari Pace bwa te Itingaun n te Aono. Nakoana ake mai imwaaina n raonaki ma te kauntira n te beretitentii n te titeiki, te kauntira ae rietata, bitiobi, kauntira n te bitiobiriki, te beretitenti n te kooram n unimwaane, te beretitenti n te uoote ibukiia Ataenimwaane, ao te Tikautimwaatita.