Kristo: Te Ota are e ota i buakon te Ro
Ngkana ko namakinna bwa ana biikan am koaua e a moanna ni memeere ootana ao n namakinna bwa e a bua ootam, tai bwarannano. Kawakin am berita ma te Atua.
N au aobiti are e mena ni Kateitein te Bootaki n Aine ko kona n noora raoi iai te Salt Lake Tembora. Ni katoa tairiki, e ririki n tainako ae, a ura tauran te tembora ake i tinaniku ngkana e bung taai. Te tembora bon te ota ae teimatoa man karaunano are I kona n noria man au wintoo.
Teuana te tairiki ni Beberuare ae nako, au aobiti e tiku ni memeere otana ngke e nang bung taai. Ngke I taraa tinaniku man te wintoo, e a roo te tembora. A bon aki ura taurana. E uotai nakon te iango. I aki kona n noora taubukin te tembora ake I nonori ni katoa tairiki i nanon ririki aika mwaiti.
Noran te roo n te tai are I kantaningaia bwa N na nora te ota e kauringai bwa teuana oin ara kainnano are kakaawaki bwa ti aonga n rikirake bon te teimatoa ni kaaniaki ma mwiokon ootara—Iesu Kristo. Ti karekea korakorara mai Irouna, bon Ngaia Otan ao Maiun te Aonaba. N akea te reitaki ae korakora ma Ngaia, ao e na moanna ni mate tamneira. Ibukina bwa e ataa aio, Tatan e kataia ni kabonganai kaangaangan te aonaba ake ti bane ni kaitarai. E kataia ni kamemeerea ootara, n urua te reitaki, ni korea mwiin te iti, ao ni katikuira n ti ngaira n te roo. Kaangaanga aikai bon baika a tabangaki n te maiu aio, ma Tatan e mwakuri korakora ni kaokoroira ao n tuangira bwa ti ngaira aika ti rinanon baikanne.
Tabeman mai iroura a namakinna ae akea te bwai ae a kona ni karaoia ibukina bwa a Korakai
Ngkana a riki baika a kananokawaki nakoira, ngkana e riao marakira man baika a riki ni maiura n te aro are ti namakinna ae kanga ti aki kona ni ikeike, ngkana ti a tia n rinanon ana namakin teuare iaon kawain Ieriko are e kitanaki ao e a kuri ni mate, E roko Iesu ao n nurakina ikoakira n te bwa, e karaurau n tabekiira, n uotiira nakon te auti n iruwa, ao ni kawakiniira.1 Ao nakoia naake a korakai, E kangai, “N na … kabeebetei taian uota ake a katokaki iaon angami, bwa kam na aki kona n namakin iaon nukami, … bwa kam aonga n ataa te koaua bwa Ngai, te Uea ae te Atua, I bon kaakawariia au botanaomata i nanon aia tai n rawawata.”2 Kristo E kamaoi taian ikoaki.
Tabeman mai Iroura A Bon Kua
Unimwaane Jeffrey R. Holland e taku: “E aki katauaki bwa e na kabirimwaka riki te aomata nakon are riaon korakorana. … Ma [e ngae n anne] , I ataia … bwa e bati iroumi aika a biri, n [ae rangi ni] birimwaka n [te] aro are korakorami ma marurungimi e a taraa ni kani bane.”3 Ngkana baika a kataningaaki a karawawataira, ti kona n toki ao ni butiia Tamara are i Karawa bwa tera ae na karaoaki. Iteran maiura bon reiakinan baika ti riai n aki karaoi. E ngae ngke e koaua aio, n tabetai e rangi ni kakua te maiu aei. Iesu e karaui nanora, “Bane mai nako Iu, ngkami akana kam kua ao kam rawawata, ao N na motiki rawami.”4
E tauraoi Kristo bwa ti na amoa amona bwa e aonga ni beebete rawawatara. Kristo bon te motirawa.
Tabeman mai Iroura A Namakinna ae a Aki Tau n aranaki bwa Kaain te Ekaretia
E mwaiti bukina ae, ti aki namakina iai te butimwaeaki ke te tau. Te Nu Tetemanti e kaotii ana mwakuri Iesu aika a bati n taben nanoia aomata ni kabane: rebera, taan rikoa te angabwai, ataei, I-Kariraia, kabekaau, aine, Baritaio, taan bure, I-Tamaria, aine aika a mate buuia, Tautia n ana taanga ni buaka Rom, taan wenenibure, ake aki itiaki ni waakin bootaki. E kuri n ae ni karaki aikai ni kabane, E taben nanoa temanna are e aki butimwaeaki irouia te koraki.
Ruka 19 e anga karakinan aia mataniwii taan rikoa te angabwai i Ieriko ae arana Takaio. E tamwarakea te aroka bwa e aonga ni kona n noora Iesu ngke e mwananga. Takaio e kamwakuraki iroun te tautaeka n Rom, ao e taraaki bwa e aonikai ao te tia bure. Iesu e nooria i eta n te aroka ao e weteia ni, kangai, “Takaio, bareiko ruo; ba e riai bwa N na mena n am auti n te bong aei”5 Ao ngke Iesu e noora nanon Takaio ae raoiroi ao bwaai ake e karaoi ibukiia tabeman, E butimwaea ana angabwai, ao e taku “E a roko te maiu n te auti aei n te bong aei, [bwa] bon natin Aberaam naba Teuaei.”6
E taetae ma te tangira Iesu nakoia Nibwaite, “Akea temanna ae I kanakoa.”7 Iai iroun Betero te atatai ae korakora aio i nanon Makuri 10 ngke e kangai, “E tuangai te Atua ba N na aki atonga [te aomata] temanna ba e aki itiaki ke e kamwara.”8 Bon te bwai ae aki bibitaki are e riai bwa a na karaoia ana reirei Kristo ao Aomata aika Itiaki.9 Iesu e anganiira naba te kakao are E angan Takaio: “Norai, I tei i rarikin te mataroa, ao I karebwerebwe: ngkana [ko] ongo bwanau, ao ngkana ko kauka te mataroa ao N na nako [im], ao N na amarake ma [ngkoe], ao [ngkoe] ma ngai.”10 Kristo e nora nanora ni kan kaniira.
Tabeman mai Iroura A Korakai n te iango ibukin aia Titiraki
Tabeua te ririki n nako, I korakai n te iango ao n aki rau n au titiraki ake e aki reke kaekaaia irou. N teuana karangainan te Kaonobong, iai miiu ae uarereke. N te mii ao I noora te auti ae uarereke are I ataia bwa I riai n rin i nanona. Bon nimaua bouana are e katobibia, ao wintoona bon tenaan atibu. I ngurengure ni miiu, n aki kan rinnako ibukina bwa e uarereke ao e rotongitong. Imwina iai te iango ae roko irou ae kangai bwa tarin Iareta e a tia ni keiaki ni bitii atibu nakon kiraati aika a raoiroi. Te kiraati e reke ngkana e kabueaki te atibu ni karokoa e riki n ran ao ni bitaki. Ngke te Uea e ringii ana atibu tarin Iareta, a riki bwa oota ni kaibuke ake a roo.11 E bon roko naba are I a kan rin te auti are uarereke nakon riki taabo ake tabeua. Bon aio raoi te tabo—ti te tabo—ibukiu bwa N na “oota.” Titiraki ake I mweengabuaka iai aki bua, ma e bati riki au iango iaon te titiraki aio: “Ko na kanga ni kakorakoraa am onimaki, n aron tarin Iareta, bwa aonga ni karikaki am atiibu bwa a na oota?”12
Kaburorora n te rabwata e karikaki bwa e na karekea te mataata ao te oota teutana imwin teutana. I aki ataa bukina bwa e aera e rangi ni kaangaanga reken te oota n te maiu aio. Tiaki aio iteran maiura ae akea tokina are ti na karekei iai kaeka ni kabane. Aio iteran maiura are ti na karikirakea iai te kantaninga (n tabetai te aki nanokokoraki) ni kakoauaki n baika aki nooraki. Kabwarabwaraan baika kantaningaki e kona n roko ni kawai aika a matoa, ma n tainako te oota e na anganiko te rau. E taku Iesu, “Ngai te oota, ao te maiu, ao koauan te aonaba.”13 Ao ibukiia naake a ukora te koaua, n te moantai e taraa n ae ko mena n te auti ae uarereke are e roo. Ma n titiraki aika taotaonaki n nano man kakaonimaki, Iesu e kona ni bitii ara wintoo ake atibu nakon te kiraati ao te oota. Kristo bon te kawai are ti na oota iai.
Tabeman mai Iroura A Namakinna bwa a Aki Kona n Raoiroi
Te kunnikai te taaitaai n te Nu Tetemanti e aki ti mwaiti karana ma e teimaan naba n te aro are karana aika a ootara a nim nakon burae ao n aki manga tae e ngae ngke e a mwaiti uatiiana.14 Tatan e kabongana te kabotau aio ni kamwengabuakaira: te burae ae mainaina ae memea n te uraura e aki kona ni manga mainaina. Ma E taku Iesu Kristo, “Ba [a] rietata riki arou nako nakon aromi nako,”15 ao te kakai man Ana akoi bon ngkana ti raira n nano man ara bure, ao Raraana are e uraura e kaitiakiira. E aki boomaongina, ma e ngae n anne e bon koaua.
Tamnei iroun iStock.com/iinwibisono
“Tao ai aroni kunnikai aika uraura ami bure, ao a na riki ni mainaina n ai aron te tinoo; ngkana tao a uraura n ai aron te bwai ae moan te uraura, ao a na riki n ai aroni buraen te tibu.”16 N aki nanououa e taetae te Uea: teuare ke neiere “e tia n raira nanona man ana … bure, ao e na bon kabwaraaki ana bure, ao Ngai, te Uea, N na aki manga uring ana bure.”17 N taekinana teuana: Mai ikai, ba ti na iango.18 Ba akea te kakaokoro: aomata ni kabane a bane ni bure.19 Nakomai nakoiu ao rairinanomi.20 N na aki manga uringa te bure.21 Ko na kamaiuaki.22 Iai te mwakuri ae N na anganiko.23 Kristo e kamainaina buraen te tibu.
Ma tera raoi ae ti riai ni karaoia? Tera te bwai ae te kabanea ni kakaawaki ibukin manga karekean mwaakan Iesu Kristo n te tai are ti nanokokoraki iai? Beretitenti Nelson e taekinna ni kabwarabwara: “Te bwai ae kakaawaki bon karaoan ao kawakinan berita aika tabu. … Tiaki te kawai ae kaangaanga.”24 Karika Kristo bwa te kabanea ni kakaawaki ni maiu.25
Ngkana ko namakinna bwa ana biikan am koaua e a moanna ni memeere ootana ao n namakinna bwa e a bua ootam, tai bwarannano. Kawakin am berita ma te Atua. Titiraki. Taotaonannano ngkai te Uea e onea te atibu nakon te kiraati. Ukora Iesu Kristo, are e teimatoa n tangiriko.
E taku Iesu, “Ngai te oota [are] e oota n te roo, ao te roo e aki kinaa.”26 Nanona bwa tao mwaitira are e kataia, te roo e aki kona ni konaa te oota. E bon aki kona. Ko kona n onimaki bwa Ootana e na tauraoi ibukim.
Ngaira, ke aomata ake ti tangiriia, e kona ni bua ara koaua teutana te tai. Ao ni karakinan te Salt Lake Tembora, te manatia ibukin batiriti, te Tari Val White, e karekea te tareboon n te tai ae tawe. E nooraki irouia aomata. Tera ae e riki n tauran te tembora? Te moan, te tia mwakuri aei e bon karoko nakon bwaoki n iiti nako ake n te tembora ao e kamauii tenaan taura. Imwiina a bitii baeteren te bwai are e roko mai iai te iti ao a tuoa n nooria bwa tera ae e uruaki.
E kaangaanga kamaiuan tenaan taura n ti ngkoe. Ti kainnanoia raoraora. Ti kainnanoira i bon i marenara. N ai aroia taan mwakuri ibukin bwaai n te tembora, ti kona ni ibuobuoki i marenara ni bon karoko, ni manga tiaatina baeteren tamneira, ao ni karaoa te uruaki.
Ara taura n tatabemaniira e kona n riki bwa teuana te taura iaon te aroka. Ma ti na teimatoa ni kaota ootara ae uarereke, ao n ikotaki, ti na katika nanoia mirion aomata nakon ana auti te Uea. Ae te kabanea ni kakaawaki, n aron are e a tia ni kaungaa Beretitenti Nelson, ti kona n uota ootan Kristo nakon maiura ao nakoia aomata ake a kakaawaki iroura man te mwakuri ae bebete are bon kawakinan ara berita aika tabu. Ni kawai aika a kakaokoro, te Uea e kakabwaiaa te mwakuri ni kakaonimaki anne ma te korakora ao te kimwareirei.27
I kakoaua bwa kam tangiraki. Te Uea e ataia bwa korakorara are ko a tia ni kataia. Ko a rikirake n tamaroa. Waaki nako. E noori am anga karea aika aki noraki irouia tabeman ao e kakabwaiako ma naake ko tangiriia. E aki banebuaka am mwakuri. Ko aki maroaa. Ao nanon arana are, Emanuera, bon “Te Atua i roura.”28 E na buokiko n tainako.
Teimatoa maiuakin tuua ao onimaki n tainako, e ngae ngke ko aki ataa te bwai ae na riki. E na manga reke te oota iroum. Iai au koaua ni koauan ana taeka Iesu, ao a kaonaki n te oota: “Kaaniai ao N na kaaningkami; botumwaaka n ukoukorai ao kam na kuneai; bubuti, ao kam na karekea; karebwerebwe, ao e na kaukaki nakoimi.”29 N aran Iesu Kristo, amen.