Ana Euangkerio Iesu Kristo ae Koaua. Itiaki, ao e Bebete
Tangiran te Atua ao tangiraia raora bon aan te reirei ni buobuoki; ae boboto n te mweenga, are boutokaia te Ekaretia n ana reirei; taromauri n te tamnei ni bongin te Tabati; ao te mwakuri ni kamaiu.
Tariu ao mwaneu, e bon kaangaanga kakoauana irou bwa ai 71 te ririki n nako, n te 1948, are I mitinare ngkoa i England ao 44 ririki n nako ngke kainabau, Barbara, ao Ngai ti kaira ara utu nako Canada ngke Ngai ngkoa te beretitenti n te Canada Toronto Mition. Ngke I mwakuri inanon Eberi 1976, I weteaki nakon Ana Moan Kooram te Itingaun, ao n aki kantaningaia inanon 1985, I a manga weteaki nakon te Kooram n Abotoro ae Tengaun ma Uoman. Tiaki aron weteakiu ngkoa, are I ataia bwa N na kainaomataaki n te tai teuana, kainaomatakiu man weteau nakon te Tengaun ma Uoman tiaki te rinerine ae tamaroa moa ngkai; e ngae n anne, I tataro bwa teuana te bong e na roko tii imwiin banen ana mwakuri te Uea are e weteai ni karaoia.
Niiangoan au ka 43 n ririki aika nako ni mwakuri bwa te Mataniwi ni Kabuta ao te kabwaia ae kamiimi are I a tia ni karaoia ni buokiia natin Tamara are i Karawa n te aonaaba ni kabuta, I a tia n ataia raoi bwa e tangiria Natina ni kabane, ni karekea te rau, te kimwareirei, ao te ebiebi inanon maiuia.
Te burabeti are Riaai e reirei, “Mwane [ao aine] a riki, bwa aonga ni karekea te kimwareirei.”1 A bati bukina bwa e aera ti aki karekea te rau inanon maiura, te kimwareirei, ao te ebiebi iroura n te maiu aei, n raonaki ma te kainnano, buaka, kabuanibwain te aba, ao kaangaanga inanon te mwakuri, marurungira, ao itoman n te utu.
Ma engae ngke ti aki kona n tauu aroia baika korakora aika roko mai tinaniku ao n rooti maiura ikai n te aonaaba, ngkai ti ikakorakora n riki bwa ana reirei te Uea Iesu Kristo,ti kona ni karekea te rau, te kukurei, ao te ebiebi n aki ongea kaangaangan te aonaaba ake ti rinanona.
Temanna irouia natiu e taku,“Tamau, N na noria ngkana I kona ni karaoia.” I kaeka, “Tamara ni kabane are i Karawa e butira bwa ti na karaoa te kabanea n tamaroa are ti konaa ni katoa bong.” Tariu ao mwaneu, karaoa te kabanea n tamaroa are kam konaa n te bong teuana nakon teuana, ao ni waekoa, kam na ataia bwa Tamami are i Karawa e atai ngkami ao e tangiri ngkami. Ao ngkana kam ataa anne—ataia raoi—maiumi e na iai bukina ao nanona, ao kam na kaonaki ma te kimwareirei ao te rau.
Ngkai Otan te Aonaaba, te Tia Kamaiu e taku, “Ba e na aki mena n te ro ane onimakinai.”2
Iesu Kristo bon te ara ae anga te Tama, ao bon akea te aara riki ae anganaki are [ti] kona ni kamaiuaki iai;
“Ma ngaia are, mwaane ni kabane [ao aine] a na riai ni katoka iaoia te ara are anganiia te Tama.”3
Koroboki aika a tabu e reireiniira bwa Tatan e tangiria ni kan kairiia aomata nakon te rootongitong. Arona ni kabane e bon totokoa te oota ao koauan ana euangkerio Iesu Kristo. Ao Riaai e reireiniia natina, te riaboro “e ukoukora karawawatakiia aomata ni kabane n ai arona.”4 Ngkana Tamara are i Karawa “ mwakuri ao … mimitongiu” “ni karekea te aki mamate ao te maiu are akea tokina ibukiia [mwaane ao aine],”5 Rutibero ao ana “mwakuri” te karekea te maraia ao te nanokawaki ae akea tokina ibukiia Natin te Atua. Te bure ao uruan te tua e karika keerikakin Otan Kristo inanon maiura. Ao anne oin ara kouru bwa ti na mwabiao n ootan Kristo, are karokoa te rau, te kukurei, ao te ebiebi.
Inanon 18 te namwkaina n nako, E a tia te Uea n kairi aia iango Ana burabeti ao Abotoro ni karaoi bitaki aika mwaiti. Engae n anne, I tabetabe bwa mwakurin te tamnei n taian bitaki aikai a kona n aki butimwaeaki n tokaraken nanoia ibukin taian bitaki.
Iotebwa F.Timiti e taku: “Ana euangkrio Iesu Kristo ae koaua, itiaki ao e bebete e a tia ni kaokaki. Ti katabeaki ibukin tararuakina iaon te aonaaba.”6 E raonna bwa te koaua, te itiaki, ao beebeten te euangkerio bon te “reirei ni kamaiu iroun Kristo.”7
N Taekan te Onimaki, te Burabeti Iotebwa Timiti e reirei bwa “rinanon Ana mwakuri ni Kamaiu Kristo, aomata ni kabane a na kamaiuaki, man te ongeaba nakon tuua ao otenantin te Euangkerio.”8
Te moan reirei n te euangkerio bon te onimaki iroun Kristo, rairannano, bwabetito, ana bwaintangira te Tamnei ae Raoiroi, ao n teimatoa ni uaa te toki. Tarina ae Hyrum e reirei: “Reirei nakoia riki [ao teuana riki] teuana riki: ao kam na kunea n te bong koraki iango aika boou ao n ikotaki ma oota ni kaeineti nakoia are e na kaotaki nakoim. Kam kona ni kabwarabwarai … ni kamataatai raoi. Kam na kona ni karaoi bwa a na ota irouia ake [kam] reireiniia.”9
Kawai aika tamaroa ibukira n noora mwakurin te tamnei n te Ekaretia bon maiuakinan te koaua, te itiaki, ao reirei aika bebete iroun Kristo ao ni kamwakura naba ana tua te Tia Kamaiu aika uoua: “Ko na tangira te Uea ae Atuam n nanom ni kabanea. … Ko na tangira raom n aron tangiram ibon iroum.”10
Te ongeaba nakon tuua aika uoua e karekea te kawai riki nakon te rau ao te kukurei. Ngkana ti tangiria ao ni beku ibukin te Uea ao n tangiria ao ni beku ibukiia raora, ti na bon namakina riki te kukurei are roko nakoira n te kawai ae tamaroa riki.
Tangiran te Atua ao tangiraia raora bon aan reirein te mwakuri ni ibuobuoki; ni boboto-n te mweenga, te Ekaretia-boutokaa reiakinana; bongin-te Tabati taromauri n te tamnei; ao te mwakuri ni kamaiu ni uoua iteran te roki ni boutokaaki n taian Bootaki n Aine ao aia kooram unimwane. Bwaai ni kabane aikai a boboto iaon tuua aika mimitong n tangira te Atua ao n tangiriia raora. Iai riki te bwai ae na kona ni bebete, ae rangi ni kakawaki, ae bebete riki nakon anne?
Maiuakinan te koaua, te itiaki, ao bairen te euangkerio aika bebete are a na anga riki te tai nakoira ni kawaria aine aika akea buuia, mwaane aika akea buuia, aika a mate aia karo, a maroa, a aoraki ao aika kananoanga. Ti na karekea te rau, te kimwareirei, ao te ebiebi inanon maiura ngkai ti beku ibukin te Uea ao raora.
Taian bitaki inanon te Tabati are e katuruturu te boboto iaon te mweenga, boutokaan te reirei n te Ekaretia ao kamatebwaian te euangkerio bon taai ni kaboui tamneira ao ara taromauri nakon te Atua ni mwengara. Tera ae konaa bwa e na riki ni bebete, ni kakawaki, ao n rangi nnano? Tariu ao mwaneu, kam mataata bwa reiakinan ao reirei te euangkerio inanon ara utu bon te kawai ae boongana ni karekea te kimwareirei ao te ebiebi inanon maiura?
N taekina te Tabati, e taku te Tia Kamaiu, “Bwa e koaua ae aio te bong ae I a tia n rineia ibukim bwa kam na motirawa man ami mwakuri nako, ao ko na anga am nebo nakon are Moan te Rietata.”11 E raonna, “Bwa e na kororaoi ami kukurei … [rinanon] te kukurei ma te tataro…kam [na] karaoi bwaai aikai ni kabane ma te kakaitau, ma onraken te nano n te kukurei … [ao] te mata ni kukurei.”12
Taiaoka iangoi taekan tabeua kakawakin taian taeka inanon te kaotioti aio: kukurei, kakukureia, kakaitau, naano aika kukurei, kakatonga te nano, ao te moangare. Atongana irou n aekan kawakinan te bong ae te Tabati e na kakukureira.
Ngkana ti ibuobuoki n te kawai ae rietaata ao te kawai ae mimitong,taiaoka iangoia bwa e kanga riaina bwa ti na kamauria ake a roko nakon ara bootaki taromauri n te Ekaretia, riki nakoia membwa aika boou ao taian irua. Ti na bane ni kukurei n anenei anene n taromauri ao ni kakauongo nakon taekan tataron te toa ma te nano ae uki ao te iango.
Kaotikoaua n ara onimaki n ara aki mamatam ao ara bootaki ni kaoti koaua ae kairaki iroun temanna kaain te bitiobiriki, are tibwaua ana kaoti koaua ni kaatuua iaon te baire ni kakukurei ao te koaua, itiaki, ao ana euangkerio Kristo ae bebete. Ni kabane a na ira nanon te katooto. Ti kainanoa ni ururinga bwa iai taabo tabeua n karakina te rongorongo ke n tibwaua taekan te kakaongoraan te mwamwananga. Ngkana ti kawakin ara koaua ni kabebetei ao ni kaatuua iaon ana euangkerio Kristo, E na katauraoa kabouan te tamnei ngkana ti tibwaa ara koaua ma temanna riki.
Te buobuoki ae rang kakai e na riai ni oota ni iangoakina n ana tangira te Atua ao tangirakiia raora. Taekana ae bebete, ti ibuobuoki bwa ti tangira Tamara are i Karawa ao Natina. I kakoaua bwa arora ni ibuobuoki e na nakoraoi ngkana ti kabebetea ara mwakuri. Te kukurei ae bati e roko man baika a bebete n te maiu, ma ngaia are ti kainanoa te karaurau n aki kainanoi riki bwaai aika karaoaki nakon te bitaki are tia tia ni karekea ni katea te onimaki ao koaua aika matoatoa inanoia Natin te Atua.
Ti riai n aki kamangaongaoi bwaai n taian boowi, baika a kantaningaaki, ke baika a tangiraki. Kawakinana e bebete. E bon mena inanon te kabebete are ko na karekea iai te rau, ao te kimwareirei, ao te ebiebi are I a tia n taekina arona.
Inanon ririki mwakurin kairiri n te Ekaretia, are taekinaki n te Aeniboki 2, are taekan arona bwa a itiaki ao a bebete, man te bwai are I taekinna:
“Taan kairiiri a kaungaia membwa n tatabemaniia nako bwa a na karekei otenanti aika riai n te nakoanibonga, kawakin aia berita ake a tia ni karekei, ao n tau ibukin te karietataaki ao te maiu are akea tokina. …
“Ikawai: Kaungaia ikawai n tatabemaniia bwa ana kororaoi ni karekei otenanti n te tembora. Reireiniia ni kabane ikawai bwa ana atai aia bakatibu ma ni karaoi otenanti n te tembora ibukiia.
“Roronrikirake: Buokiia ao ni katauraoia kairake n ataeinimwaane n tatabemania bwa ana karekea te Nakoanibonga ae te Merekitereka, ni karekei otenanti n te tembora, ao ni kororaoi n nako ni beku bwa te mitinare ae bwanin ana tai. Ibuobuoki ni katauraoiia kairake n ataeinaine bwa a na kororaoi ni kona ni karaoi berita aika tabu ao ni karekei otenanti n te tembora. Kakorakorakiia roronrikirake rinanon irakin waaki ni kakukurei aika uaana.
“Ni kabane Membwa: Buokiia taan kairiiri n te nakoanibonga ao taan kairiri ni bootaki, buobuoki, kauntiran te uoote, uoote ao mitinare aika bwanin aia tai, ao membwa a na uaia ni karekebai ni mwakuri ni kamaiuia n tatabemaniia nako, kakorakoraia utu ao iunite n te Ekaretia, karikirakea te waaki ni kakukurei irouia kaain te nakoanibonga, ao n ikotiia Iteraera rinanon te rairaki, te kateimatoaki, ao te mwakuri ni kamarurung. Reireiniia membwa bwa a na kona n kamiuia ibon irouia ma aia utu ao ni buokiia rarikin ao kainnano n ana kawai te Uea.”12
Au mwakuri inanon te Ekaretia e a tia ni kakabwaiai ni mwaitin tamaroan ao n rinanon taneiai aika onoti n te n te aro n tamnei. Ngai te tia kakoaua bwa te Uea e kaira Ana Ekaretia ni kabobonga Ana mwakuri. I a tia ni karekea te kairi ae mairoun te Atua are e riaon korakorau. Kakukurein maiuakinan te euangkerio ibukiu e boboto iaon te koaua, te itiaki ao bebeten te reirei ao ana euangkerio Iesu Kristo.
I a tia ni mwakuri iaan taian king ao aia kairi onoman burabeti ao Beretitentin te Ekaretia mairoun Spencer W. Kimball nakon Russell M. Nelson. I kakoaua bwa ngaiia n tatabemaniia bon ngaia ao ana burabeti te Atua ae rineia. A tia n reireiniira reirei aika boongana ibukin te Ekaretia ao te euangkerio ao ana reirei Kristo. Beretitenti Nelson e uotarake ana mwakuri te Uea n rangi ni waeatata. I taekina “rangi waetata” bukina bwa tii ngaia temanna mairouia Abotoro ae ikawai riki nakoiu, ao iai au kanganga bwa I aki kona ni bwaka rimwiina! Ngai te tia kakoaua bwa kingin te nakoanibonga ao niniran te burabeti a toka iaona. Beretitenti Nelson e reirei te koaua, te itiaki, ao te euangkerio ae bebete. I taekina au koaua bwa Iesu bon te Kristo, ao aio Ana Ekaretia—are I kakoaua ma te nanorinano inanon aran Iesu Kristo, amen.