Kaekaakin te Tataro
E atai arora te Tama, baike ti kainnanoi, ao e na buokiira n ae kororaoi.
Te reirei ae kakawaki ao ni karaunano n Ana euangkerio Iesu Kristo bwa bon iai Ana tangira ae kororaoi Tamara are i Karawa ibukiia Natina. Ibukin te tangira ae kororaoi anne, E kakabwaiaira tiaki ti ibukin are ti kantaningaia ao ni kainnanoia ma e bon kaineti naba nakon Wanawanana ae akea tokina. N taekana ae bebete n aron are e taekinna te burabeti Nibwaai, “I ataia ae [Te Atua] e tangiriia natina.”1
Teuana iteran te tangira are e kororaoi anne bwa Tamara are i Karawa e irekereke inanon maiura, e ngae ngke tao ti aki ataia ke ni mataata iai. Ti ukora ana kairiiri ao ana ibuobuoki mai ieta te Tama rinanon te tataro ae koaua, are nako man te nano. Ngkana ti maiuakinii berita ake ti karaoi ni kabanea ara kona n riki n ai aron te Tia Kamaiu, ti katauaki bwa ti na kakarekei2 kairiiri aika a raanga mai ieta rinanon ana kairi ao ana kairiri te Tamnei ae Raoiroi.
Ti reireinaki ni koroboki aika tabu: “Ba E atai baika a riai ba kam na anganaki Tamami, ngkana kam tuai ni butia,”3 ao E “atai bwaai ni kabane, bwa a kaoti bwaai ni kabane i [Matana].”4
Te burabeti ae Momoon bon te katooto n aei. E aki tiku ni maiu n noora mwiin ana mwakuri. Ma e ataia bwa te Uea e karaua ni kairia ni karaoan aei. Ngke e karekea te kairi bwa e na booti ana bwaatua Nibwaai aika a uarereke ma ana rekooti, e koroia Momoon: “Ao I karaoa aio ibukin te waaki ni wanawana; bwa e a tia ni wirikirikiaki nakoiu, n aron ana mwakuri Tamnein te Uea are e mena inanou. Ao ngkai, I aki kona n atai kanoan bwaai aikai ni kabane; ma e atai bwaai ni kabane aika a na roko te Uea; mangaia ae e mwakuri inanou bwa N na karaoa are nanona.”5 Ma e ngae ngke Momoon e aki ata ae ana bua baan koroboki ake 116, e ataia te Uea ao e katauraoa te kawai n tokanikai iaon te aeka n totoko anne i mwain are e na riki.
E atai arora te Tama, baike ti kainnanoi, ao e na buokiira n ae kororaoi. N tabetai te buoka anne e a roko naba n te tai ae waekoa ke tao i bon i mwin naba are ti bubuti buokara mai ieta. N tabetai nanora aika a nano man kororaoi a aki kaekaki n aron are ti kantaningaia, ma ti kunea bwa te Atua iai kakabwaia ake e katauraoi ibukira aika a korakora. Ao n tabetai baika a raoiroi ake ti tangiri aki koro nanoia n te maiu aei. N na katereterea rinanon teniua taian rongorongo aika a kakaokoro te kawai ae Tamara are i Karawa e na kaekai ara tataro aika a nano Nakoina.
E weteaki natira te mwaane ae te bina bwa e na beku bwa te mitinare n te France Paris Mition. Inanon te kakatauraoi ni beku, ti airi ma ngaia ni karekei baika a kainnanoaki n aron ana kabaraki, ana kooti, neketai, ao tiaokiti, ao te kunnikai ae marairai ibukin te mwaitoro. Te kaangaanga, bwa te kunnikai ae mwarairai ibukin te mwaitoro bon akea ana tiaaiti are e tangiria iai. Ma e ngae n anne, te tia bobwai n te titoa e taekinna bwa ae e na roko te kunnikai anne inanon tabeua te wiiki mangkai ao e na kanakoaki nakon aia tienta ni kataneiai mitinare i Provo imwain nakon natira nako Buranti. Ti kabwakaa boona ao tia aki manga tabe iai imwin anne.
E kaea te tienta ni kataneiai ibukiia mitinare natira inanon Tuun, ao te kunnikai ae mwarairai ibukin te mwaitoro e nikiraki tabeua te bong imwain mwanangana ni kitana te tabo n Aokati. E aki kataua iaona te kunnikai ma e a kabaitia naba ni karinna ibuakon ana kunnikai ni mwananga ma ana bwai ake tabeua.
Ngke e a uakaan tain te kamwaitoro i Paris, n te tabo are e beku iai natira, e kororeta nakoira bwa e anaa te kunnikai ae mwarairai ibukin te kamwaitoro ao e kataua i aona ma e kunea bwa e rangi ni uarereke. Ngaia are ti a manga karina ana mwane riki inanon ana akaunti n te bangke bwa e aonga ni kabooa ana kunnikai ni kamwaitoro i Paris, ao e bon karekea. Ma te aki rau n nano, I kororeta nakoina ao n tuangnga bwa e na anganako te moan kunnikai ni kamwaitoro ngkai e aki kona ni kabongana.
Ti karekea rimwi te i-meeri aei mai irouna: “E a bon riao kamaririn te tabo aei. … Ai aron ae e rinnako te ang rinanon rabwatara, e ngae ngke au kunnikai ae mwarairai ibukin te mwaitoro e rangi n tikiraoi ao ni matenten. … I anganako are teuana arei nakon [temanna te mitinare n ara auti] are e taku bwa e a kaman tia n tatataro bwa e na reke te anga ae e na reke ana kunnikai ni kamwaitoro ae raoiroi. E a bon tibwa rairaki tabeua te ririki ao bon ti ngaia ma tinana … ao mitinare ake a bwabetitoia ake ngaiia ma tinana ake a boutokaia n ana mition ngaia are te kunnikai ni kamwaitoro anne bon kaekaan te tataro, ngaia are I rangi ni kukurei ibukin anne.”6
E ataia Tamara are i Karawa bwa te mitinare aio, are e beku i Buranti tao 6,200 te maire (10,000 km) raroana ma mweengana e na rangi ni kainnanoa te kunnikai ae mwarairai ibukin te kamwaitoro ae boou ibukin te kamaitorotoro i Paris ma te mitinare aei akea ana mwane ae e na kona iai ni kabooa teuana. E ataia naba Tamara are i Karawa bwa natira te mwaane e na butimwaea ana kunnikai man te titoa ni kunnikai i Provo, Utah, te kunnikai ae mwarairai ibukin te kamwaitoro ae e na rangi ni uarereke. E ataia bwa mitinare aika uoman aikai a na uaia ni beku i Paris ao te kunnikai ni kamwaitoro bon kaekaan ana tataro ae nanorinano ao n nano te mitinare ae iai kainnanona.
E reirei te Tia Kamaiu:
“Tiaki a kaboaki uoman te tibaro n te aba-bene? ao e bon aki bwaka i aontano temanna n aikai ngkana e aki ataaki iroun te Tama.
“Ma a bane naba ni warekaki iranatumi.
“Ma ngaia ae kam na tai maku, bwa kam bongana riki nakoia Tibaro aika bati.”7
Inanon waaki tabeua, ngkana nanora aika a kororaoi a aki kaekaaki n aron are ti kantaningaia, tao anne ni koauana bon ibukin kakabwaiara. Te katooto, Iotebwa are natin Iakobwa e bati n nanobwiaki ao n ribaaki irouia tarina n te aro are a bairea tiringakina. Ma a manga aki, ma a kabonakoa bwa te toro nako Aikubita.8 Ngkana e tia te aomata temanna n namakinna bwa e aki kaekaaki ana tataro n aron are e kantaningaia, tao boni Iotebwa. Ni bon koauana, e teretere bwa te bwai ae aki raoiroi are e riki nakoina e karekea te kakabwaia ae bati nakoina ao e kamaiuia ana utu man te baki. Rimwi, imwiin rikina bwa te tia kairiiri ae onimakinaki i Aikubita, ma te onimaki ae korakora ao te wanawana e taku nakoia tarina:
“Ao ngkai kam na tai raraoma, ao tai un iroumi, ngke kam kaboai ngkoa nako ikai: bwa E kanakomaiai te Atua imwaimi bwa na kamaiua te aba.
“Bwa ai ua ririki ririkin te rongo iaon te aba aei ngkai: ao ai ti nima ririki ae e na aki karau te aba iai, ao e na aki tai te aba.
“Ao E kanakomaiai te Atua imwaimi bwa N a kawakiningkami ba nikira i aonaba, ma ni kamaiui ngkami n te kamaiu ae kakanato.
“Ma ngaia ae tiaki ngkami aika kam kanakomaiai, bwa te Atua.”9
Ngke e mena n te kuura, natira te mwaane ae te ikawai e kateirakeaki n te mwakuri ae e rangi n tamaroa ae e itera n tai iai are e kona n reke tikuna iai bwa ana mwakuri ae matoa, imwin ana anga beeba. E mwakuri korakora n te mwakuri aei inanon aua te ririki, e rikirake n rangi ni mwatai iai, ao e karineaki irouia raona ni mwakuri ma ana tia kairiiri. Ni banen ana kaua n ririki n reirei, n aron ae kanga e a kaman baireia te Atua ibukina (ae anne n ana taratara natira) e a reke te mwaawa n te mwakuri ao bon ngaia te moan ae e taraki nako iai, ao ni kabane te taratara ao te katautau bwa, boni ngaia, ae e na reke te mwakuri irouna.
Ma, e bon aki kateirakeaki. Akea mai ibuakora ae e ota iai. E a tia n rangi ni katauraoia, e raoiroi ana intawiu, bon te kabanea ni konabwai, ao n tia n tataro ma te kantaninga ae korakora ao te ingainga! E bon bwara nanona man un, ao akea iroura ae mataata bwa e aera ngkai e aki rineaki. E aera ngkai te Atua e aki mwananoia ibukin nanona ae koaua?
E aki ataaki ni karokoa tabeua te ririki imwina ae e a mataata raoi bukin aki rineana. Ngke arona bwa e reke te mwakuri are e taku bwa e raoiroi ibukina imwin ana anga beeba, e na bon katibanakoa te tai ae moan te kakawaki ni bitakin maiuna are e kakoauaki ngkai bwa bon ibukin tekeraoina ao kakabwaiana ae akea tokina. Te Atua e ata tokina man te moan tai (n aron ae E ataia n tainako), ao n aron aio te kaeka nakon tataro aika koaua bon tiaki, bwa e aonga n reke ae e rangi n tamaroa riki.
Ao n tabetai, te kaeka nakon tataro aika a koaua, a kainnanoaki, aika a rangi ni ukoukoraki n ae bati a na bon aki karekeaki n te maiu aio.
Titita Patricia Parkinson e bungiaki ma ana taratara ae raoiraoi, ma ngke itiua ana ririki e a moana n aki noraaba. N ana karuaiwa n ririki, Pat e a moana irakin Reirein Utah ibukiia Bonotaninga ao Matakii i Ogden, Utah, tao 90 te maire (145 kiromita) man mweengana, are e a karika riaina bwa e na tiku n te auti ni maeka n te kawa n reirei—are e irianaki ma te ururing ni maroa ae e kona n namakinna te tei ae ai tibwa ruaiua ana ririki.
N ana ka 11, n ririki ao e bon matakii raoi. E okira mweengana Pat ngke 15 ana ririki bwa e na kaea te kaua rinan n reirei n ana tabo. E reitinako n reirei n te kuura ao e karekea ana beeba ae te tikurii kamatebwaian kaangaangan nako te reitaki ao ana iango te aomata, ao imwiin te ninikoria n ikakorakora n taian kakaitara mai irouia taan babaire ibukin te karinrin n te kuura ae rietata, e rin n te reirei ae rietata ao e karekea ana mwatita iaon kamatebwaian aorakin nako te reitaki. E mwakuri ngkai Pat ma 53 ataein te moanrinan ao e tararuaia aman taan mwakuri n aron te taetae n te reirei n ana mwakoro. Iai oin mweengana ao ana kaa, are aki toki ni buokia raraona ao kaain ana utu ni kabutia ngkana e kainnanoa baona Pat.
Ngke 10 ana ririki e kabaeaki ana tai Pat bwa e na manga karaoaki te tutuo ibukin kekerikakin ana taratara. A aki toki ana karo n tuangnga te bwai ae e na riki ngkana e na karaoaki te tutuo nakoina, ma n te tai aio ao aikoa tuangnga aron te aekaki n tutuo aio. Ngke e a tuangaki irouia ana karo bwa e a tia ni kabaeaki ana tai ibukin te tutuo aio, Pat, n ana taeka tinana, “e un ao e raraoma.” E biri Pat nakon te ru teuana ma e a manga oki ao n taku nakoia ana karo ma te maraki n nano, “N na tuangi ngkami bwa te ra. I bon ataia, e ataia te Atua, ao tao kam bon bae n ataia naba. Ae N na bon matakii n ua tokin au bongi ni maiu!”
Inanon ririki n nako, E mwananga Pat n nako California ni kaitibo ma kaain ana utu ake a maeka ikekei. Ngke e mena i tinanikun aia auti ma ai natina te mwaane ae teniua ana ririki, e taku ai natina nakoina, “Aunt Pat, e aera ko aki butia Tamara are i Karawa bwa E na anganiko matam aika boou? Bwa ngkana ko butia Tamara are i Karawa, E na anganiko te bwai are ko tangiria. Ko na ti bubuti Nakoina.”
E taku Pat bwa e rangi ni kubanako n te titiraki ma e kaeka, “Ko nooria, n tabetai Tamara are i Karawa e aki mwakuri n aron anne. N tabetai E kainnanoiko bwa ko na reiakini bwaai tabeua, ngaia are E aki anganiko te bwai are ko tangiria. N tabetai ko na riai n tataninga. Tamara are i Karawa ao te Tia Kamaiu a ataa te bwai ae e raoiroi ibukira ao ae ti kainnanoia. Ngaia are A na bon aki anganiko bwaai ni kabane ake ko tangiri n te tai are ko tangirii iai.”
I rangi ni kinaa Pat inanon ririki aika mwaiti ao tabeua te tai n nako ao I tuangnga ae I rangi ni kamoamoa n arona ae e aki toki n nanomatoa ao ni kukurei. E kaeka, “Eng, tao ko bon tuai n roko ni mweengau, ke ko a tia? Iai taai n rawawata inanon maiu. I a tia n rinanon te nanokawaki ae bati, ao I a tia n tang n ae bati.” Ma e ngae n anne, e reitia, “Man te tai are I a moanna n aki noraba, bon te namakin ae kaokoro, ma I ataia bwa Tamara are i Karawa ao te Tia Kamaiu a mena irarikiu ma au utu. Ti rinanona n aron ara konaa, ao ibon irou, ti rinanona n te kawai ae eti. I a riki bwa te aomata ae e raoiroi arou, ao ni bon teina raoi I a tia n riki bwa te aomata ae kukurei. I uringnga bwa iai buokau Irouna ni bwaai ni kabane. Nakoia ake a titirakinai ngkana I rangi n un ibukin ae I matakii, Au kaeka, ‘Ao antai ae N na un nakoina? E raonai Tamau are i Karawa; I aki tiku n ti ngai. E raonai n taainako.’”
N te rongorongo aei, nanon Pat are e tangiria ni kaoka ana taratara e na aki anganaki n te maiu aio. Ma ana kibu ni koora, are e reiakinna mai iroun tamana, ae “Aio naba e na aki tiku n arona.”10
E taekina Beretitenti Henry B. Eyring, “Te Tama n te tai aei e atai ngkami, ami namakin, ao kainnanoia n tamnei ao n rabwata naake i rarikim.”11 Te koaua ae karaunano ae moan te korakora aio e kona ni kuneaki i nanon teniua karaki ake I a tia n taekin.
Tariu ao mwaneu, n tabetai ara tataro a waekoa ni kaekaaki ma mwia n aron are ti kantaningaia. N tabetai are tataro aki kaekaaki nakon are ti kiantaningaia, ma inanon te tai ti reiakinna ae te Atua e katauraoi kakabwaia aika korakora ibukira n ae riaon are ti kantaningaia. Ao n tabetai ara bubuti aika raraoi nakon te Atua a na aki karekeaki n te maiu aio.12 N aron are e taku Unimwaane Neal A. Maxwell, “Te onimaki e raonaki n onimakinan ana tai te Atua.”13
Ti karekea te raunnano bwa ni bon Ana kawai ao Ana tai, Tamara are i Karawa e na kakabwaiaira ao ni kaekai ni kabane raraomara, motibuaka, ao nanokawakira.
N taekina ana taeka te Uea Beniamina: “Ai moarara riki, I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa n onimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki. Kam na uringnga, uringnga bwa a koaua bwaai aikai; bwa e a tia n taekin te Uea ae te Atua.”14
I ataia bwa te Atua e ongo ara tataro.15 I ataia bwa ngkai e rangi n ataibwai, te Tama ae tangira, E kaekai ara tataro ni koaua, nakon Wanawana ae akea tokina, ao n te kawai ibukin tekeraoira ao kakabwaiakira. I kakoaua aei n aran Iesu Kristo, amen.