Titita a Ibuobuki, Kaitibo, ao a Roko

Titita Jean B. Bingham, te Beretitenti ni Kabuta n te Bootaki n Aine, ao Bonnie H. Cordon, te Beretitenti ni Kabuta n te Bootaki n Ataeinaine, e kamatatai ana burokuraem te Ekaretia ibukin te botanaomata, n aron te ran ae e itiaki, te tararua ibukiia ataei aika a tibwa bungaiaki imwin teuana namwakaina, ao bwainiti, ao ana reirei te Ekaretia ao burokuraem ibukin te konabwai n koroboki ao n reirei, ngkai a kaitibo ma mataniwi n te tautaeka ao n ibuobuoki nakoia membwa n te Ekaretia i Ghana, Nigeria, ao Ivory Coast (Côte d’Ivoire).

“Oin bukin rokora ni kaitibo ma Aomata aika Itiaki, ni karaoi tabeua kairiiri ibukiia tititati, n ongoraeakin aia kaangaanga, n namakini nanoia, ao ni kaotia nakoia bwa ti tangiriia,” e taku Titita Bingham.

Titita Bingham ao Titita Cordon e a karaoa ana bootaki n taromauri ma mitinare n te Ghana Accra West Mition. A kaitibo naba tabeman membwa inanon mweengaia. Titita Bingham e ira te burokuraem n reirei ibukin te koroboki ao te wareware n taekan te euangkerio, are e reireiniia aomata bwa a na kanga ni wareware inanon reireinakiia taekan ana euangkerio Iesu Kristo. Ao aine naba a ira te kataneiai ni kairiiri ibukin te kanakobwana are e karaoaki i Accra, are e karoko n ae e riaon 100 taan taromauri i Aberika Maeao; a kaitibo ma te Moan Aine ae Kakannato mai Ghana ao ma te Tia Koroboki n te Minita ibukin aia Waaki Aine ao Katokan te Maiu ni Kainnano n ana Tautaeka Lagos n Aban Nigeria.

Imwiin kaitibona ma tititati i Ivory Coast, e taku Titita Cordon, “Aia onimaki ma aia atatai ibukin te Atua ao Antai Ngaia ao tera ae E kona ni karaoia ni maiuia, e bon kamimi irou.” E taku bwa ngke e taekinna ae e nang reke te tembora i Abidjan, temanna te titita ae tang ibukin kimwareireina. “Ti na waaki nako ma te nonori n Aberika,” e taku Titita Cordon. “Ti na waaki nako ma te tangira ae boou.”

Titita Joy D. Jones, te Beretitenti ni Kabuta n te Moanrinan, a tibwatibwa te mwane ni karikirake rinanon te kaembein ibukin Kaota te Aonaaba nakon tabeua aobitin taian bootaki ibukin mwakuri n tangira i Manhattan, New York, USA. “Ti karinea te Tia Kamaiu Iesu Kristo rinanon te mwakuri n ibuobuoki,” e taku Titita Jones, n ataia bwa e bon kamiimi nooraki te bwai ae riki “ngkai aomata ataa kakukurein te tai n angaanga.”

I Salt Lake City, Utah, USA, Titita Sharon Eubank, te Moan Kauntira n te Bootaki n Aibne, e tibwatibwai mwane ni karikirake man Kaotan te Aonaaba “n anga baika a karaoaki n te mitiin” nakon te tabo ni kawakin amwarake, te mwakuri n tangira ibukin karaoan te tararua ibukin mataia ataei, ao te tabo ibukiia taan birinako are akea mweengaia. Aikai tabeua mai buakon $2.3 te mirion ae karikirakeaki man taian miitin i Arizona, New York, ao Utah, USA, ao i London, England, ao Manila, Philippines, aio ni kabutaki nako nakon mwakuri n tangira ni kabuta te aonaaba.