Unimwaane Jorge M. Alvarado

Mataniwi ni Kabuta n te Itingaun

Miguel ao Iris Alvarado a kaaina te Ekaretia i Puerto Rico n 1977 ngke onoua ana ririki ni maiu natiia te mwaane ae Jorge. E bwabetitoaki te ataeinimwaane ae Jorge uoua te ririki imwiina ao e a bon iriira naba te taromauri n te Tabati.

“Ma ibukin oin rairakiu e riki ngke I a tokara 16 au ririki,” e taku te Mataniwi ni Kabuta n te Itingaun ae boou.

N te reirei n te kaurinan, e moana ana beku bwa te beretitenti n te tieminari ni kiraati n ana tabo ae Ponce. Ataein te reirei a kamatebwaia ana Boki Moomon n te ririki anne. Katabeana ae boou e kaunga nanona bwa e na ukeuke nako ibukin kanan tamneina.

“ I riai n titirakinai i bon irou, ‘I ataa raoi ana Boki Moomon?’ I kanga n riki bwa te beretitenti n te tieminari kiraati ngkana I bon aki ataia bwa e koaua te boki anne?”

E anaa ana Boki Moomon ao n te moan tai e kabanea nanona ae koaua ni wareware iai.

“I katorobubua ao I tataro, ao I ataia imwiina bwa e bon koaua,” etaku.

Ana Boki Moomon e teimatoa n tiku bwa kabwarabwaraan te bwai n anainano ae moan te korakora nakon maiun Unimwaane Alvarado.

Ngke e beku bwa te mitinare ae bwanin ana tai i Florida Tampa Mition, e tibwaua ana Boki Moomon ma aomata nako ake e reireiniia. Imwiina riki, e kamatebwaia te boki ma kainnabana natiia aika tenman. Ngkai te beretitenti n te Puerto Rico San Juan Mition, e anga ana kakaewenako nakoia ana mitinare bwa a na tangira ao ni tibwaua ana Boki Moomon.

Ngkai, ae te Mataniwi ni Kabuta n te Itingaun, e teimatoa Unimwaane Alvarado n ingainga nanona ni kaoiia tabeman bwa a na kunea koauan ana Boki Moomon ae akea bitakina.

Jorge Miguel Alvarado Pazo e bungiaki n Nobembwa 21, 1970. N Ritembwa 19, 1992, e mareaki ma Cari Lu Rios n te Washington D.C. Tembora.

Imwiin ana kamatebwai ibukin te tararuaan te bitineti n te Iuniwetiri i Puerto Rico, e mwakuri ibukin tararuaan te bitineti ae kakaokoro i Puerto Rico ao n te United States. N te tai ae e a tibwa nako, e mwakuri n ana etekuata te Ekaretia i Salt Lake City n riki bwa te manatia ibukin te aba ni Bootaki ni Mwakuri ibukin te Maiu n Torobwai.

E a tia ni beku Unimwaane Alvarado bwa te Itingaun n Aono, beretitenti n te titeiki, kauntira ae reitata, beretitenti n te mwakoro, ao te mataniwi n te uoote n te mition.