Milton Camargo

Te Moan ni Kauntira n te Beretitentii ni Kabuta n te Reirei n Tabati

E kan reke teuana te ririki iroun Helio da Rocha Camargo, te minita n te ekaretia teuana, ni baireia bwa e na bwabetitoaki n Ana Ekaretia Iesu Kristo Ibukiia Aika Itiaki ni Boong aika Kaitira. Teutana imwiina, kainnabana, Nair Belmira da Rocha Camargo, e baireia bwa e na rimwiin ana banna ni katoto buuna ni bwabetitoaki naba.

N te tai anne, Nair e bikoukou iroun natiia te mwaane, are a aranna bwa Milton. Aia babaire ni katiteuanaaki Camargos ni kainakin te Ekaretia e na kakabwaiaia rooro nako n aia utu n aki toki.

Te Tari Milton da Rocha Camargo e bungiaki ni Maati 10, 1958, i São Paulo, Brazil. Te Tari Camargo, e kamatoaki n Eberi 6, 2019, bwa te Beretitenti ni Kabuta n te Moan Kauntira n te Reirei n Taabati, e taekinna bwa e kakabwaiaki ngkai e a tia n ikawairake bwa kain te Ekaretia.

“Te Uea e kinaira n tatabemaniia,” e taekinna. “Ana baire ibukira n tatabemaniira a bubura riki nakon are ti kona n iangoia.”

Te Tari Camargo e kaitibo ma buuna, Patricia, ngke tamana e tararua Brazil Rio de Janeiro Mition imwain banen te ririki 1970 tabun. Taanga a mareaki n Tianuare 4, 1980, e kan reke teuana te ririki imwiin okin man ana mition ae bwanin taina n te Portugal Lisbon Mition. Iai natiia teniman.

Inanon aia moan ririki ni mare, ana utu Camargo a maeka i Rio de Janeiro, ike e kabanea iai ana baetura tikurii te Tari Camargo completed n te civil engineering man te Instituto Militar de Engenharia. Imwiina e karekea ana mwatita tikurii iaon te business administration degree man te Brigham Young Uniwetirii.

Rinanon ana mwakuri, te Tari Camargo e a tia ni kabane ana tai ao korakora n reiakiniia tabeman. E a tia ni mwakuri ma tabeua reirei n te uniwetirii, n ikotaki ma Laureate Brazil Online Education, Universidad Tecnológica de México, ao n taai aikai ma te BYU-Pathway are tabangaki n te Aonaaba bwa te kauoman ni beretitenti n te karikiram.

Te Tari Carmargo e a tia n riki bwa te Itingaun te Aono, beretitenti n te Brazil Porto Alegre South Mition (1997–2000), kauntira n te beretitentii n te Tienta ni Kataneiai ibukiia Mitinare i Brazil (2002–5), bitiobi, beretitenti n te mition n te titeiki, ao te beretitenti n aia kooram unimwaane.