Konabwai ibukin te Botanaomata e Buokiia Tengaa n Aomata
Te neeti i Indonesia e tei irarikin te tina ae boou. Neeti n te tabo ni bung a bane aia kooti n aron Buokakiia Ataei n Ikeike are e kamawakuraki man te Mwakuri n Tangira irouia Aika Itiaki.
Te rorobuaka i Ghana e moangare imwiin reken ana kaintekatea ae kokokaki mairoun te tekinitian man te Mwakuri n Tangira irouia Aika Itiaki.
Ana bootaki te Ekaretia ibukin te botanaomata, Mwakuri n Tangira irouia Aika Itiaki, a iri waaki ni karikirake n te mwaiti ae 2, 885 inanon 141 te aba n te ririki ae nako, n ikarekebai ni mwakuri ma bootaki ibukin te botanaomata n te mwaiti ae 1, 900. Man 1985, Mwakuri n Tangira irouia Aika Itiaki e katauraoa te mwaiti ae riaon riki $2.2 te birion ibukin te ibuobuoki—n raonaki ma te mwane, bwaai, ao aekakin nako angamwane inanon 197 te aba ao taabo ake a tautaekanaki, ni kaineti ma te ribooti n te ririki man Mwakuri n Tangira irouia Aika Itiaki e kaotinakoaki rongorongona ni Beberuare 19, 2019.
Ana konabwai te Ekaretia ibukin te botanaomata e kaungaaki n te nanoanga ao te tangira ibukiia natin te Atua ni kabane ao e katerei teniua reirei ni kairiiri—n tararuaakin kainnanoia te koraki ake a rangi n rootaki, ni kaungaa te nano ibukin te maiu n toronibwai, ao ni uotarake te mwakuri n anganano ao te ibuobuoki. Reirei aikai, ae aanaki n onimakinan Iesu Kristo, e anganiia aomata n tatabemaniia ao utu te korakora n aki tabe ma te reeti n aomata, te aro ke te aba.
Te Ekaretia e ibuobuoki ni kabuanibwai aika a karina (n raonaki ma aia konabwai taan anganano), mwakuri n ibuobuoki ibukiia naake iai aia kaangaanga ni mataia, tararuakiia tiina ao ataei aika a tibwa bungiaki, te ran ae itiaki ao tararuaan te marurung, te iti, karaoan kaintekateka aika a kokokaki ao katauraoan bwaai n ibuobuoki ibukin te nakonako, ni buokiia aomata ni katauraoi ibukin karekean oin kanaia man kamanenaan bwaai ibukin katokan te kaangaanga n te tabo ma bwaai n ibuobuoki, ao te ibuobuoki ae ngkai naba ao ae teimaan ibukiia taan birinako n akea aia tabo. Te Ekaretia e irii naba waaki ni karikirake n taian kaomiuniti inanon 43 ana titeite ma ana burowinti te US ni buokiia te koraki ake akea mweengaia, te tabo ni kamaeka ibukiia taan birinako, ao kainnano riki tabeua.
“Ti namakina te kakaitau ae moan te bati ao te reitaki ma aomata nako ake a anganano ni kanakoraoan te mwakuri ibukin te botanaomata n 2018,” e taku Titita Sharon Eubank, te beretitenti ibukin Mwakuri n Tangira irouia Aika Itiaki ao te Moan Kauntira n te Beretitentii n te Bootaki n Aine. E taku bwa te ribooti e tei ibukin aia akoi tengaa n aomata.