Unimwaane Ricardo P. Giménez

Mataniwi ni Kabuta n te Itingaun

Kain te Ekaretia i Antofagasta, Chile, e na uringnga n te tai ae maan te maungatabu ni kabuta n Eberi 2019 n te katanoata ibukin tembora ake a na kateaki ao te wewete nakon natina te mwaane, Unimwaane Ricardo P. Giménez, bwa te Itingaun n Aono.

Ngkai e iangoa tibwangana nakon nakoana ae boou, Unimwaane Giménez e karekea te onimaki ao te ninikoria n te taeka n rabakau “Antai are e weteia te Uea, e katabua te Uea” (Thomas S. Monson, “Duty Calls,” Ensign, May 1996, 44).

“I a tia n reirei te taeka n rabakau anne n te tai ae mwaiti n taai aika a nako, ao n te tai aei I a kataia ni karaoia nakoiu,” e taku. Tamara are i Karawa e weteiko. E kinako. Angaia are nako karaoi bwaai ake E tangirii, ao a na nakoraoi bwaai ni kabane.”

Ricardo Patricio Giménez Salazar e bungiaki n Nobembwa 28, 1971, te ikawai irouia natin Ricardo Benjamín Giménez Gimeno ao Myrto Lucisca Amalia Salazar Signorini. E kaina te Ekaretia ngke 11 ana ririki ao e mwaing ma tinana ao mwanena nako Santiago, Chile, imwiin raureia ana karo.

N 1995, e kaitibo ma Catherine Ivonne Carrazana Zúñiga i Santiago ngke e moana rokona n ana uoote n tikuna ikekei iroun ai tamana. A kabaeaki n te Santiago Chile Tembora n Tebetembwa 12, 1997, ao a riki bwa kaaro irouia natiia aika uoman.

Unimwaane Giménez e karekea ana beebwa te tikurii n te akauting ao oteta n te Uniwetiri i Santiago n 1997 ao te mwatita tikurii n te business administration n te Uniwetiri mai Chile n 2003. E waakina ana mwakuri are e mwaatai iai n te kambwana ni keniken, n tokina ni mwaingina nakon te information technology bwa te tarekita n te binanti ibukin te Computer Sciences Corporation i Latin America. E okira te tabo ni keniken n 2012, te moanna ma te Tabo ni keniken ae Sierra Gorda ao imwiina ma te Robinson Nevada Mining Kambwana.

N te tai are e weteaki iai nakon nakoana, Unimwaane Giménez e eku bwa te kauntira n te titeiki beretitentii. E a tia naba ni beku bwa te Itingaun n te Aono i Amerika Maiaki n te Aono are i Maiaki, beretitenti n te titeiki, kauntira ae rietata, bitiobi, kauntira n te bitioburiki ao te beretitentii irouia Kairake n Ataeinimwaane n te uoote, ao te mitinare ae bwanin ana tai i Chile Concepción Mition.