Raoiroin te Atua Naba Ngkai
E ngae ngke ti kakantaningaa te Uea n te tataonakinnano, iai kakabwaia aika a koaua ake a na waekoa n roko iroura.
Tabeua te ririki n nako, natira te mwaane ae nimaua ana ririki e kawarai ao n taekinna, “Tamau, Tamau, iai te bwai ae I reiakinna. I reiakinna bwa te tai ae uarereke ae ko taku bon te tai ae e rangi ni maan irou.”
Ngke te Uea ke Ana toro a taekin bwaai n aron, “E aki mwaiti te bong ma ngkai” ke “E aki raroa te tai,” e kona n nanonaki ni maanin te maiu ke te tai ae e rangi ni maan.1 Ana tai, ao n taai aika a bati Ana tai, e kaokoro ma ara tai. Te taotaonakinnano e rangi ni kakawaki. Ngkana akea, ti na aki kona ni karikirakea ke ni kaota onimakinan te Atua are e kairiira nakon te maiu ao te kamaiuaki. Ma au rongorongo n te bong aei bwa, e ngae ngke ti kakantaningaa te Uea n te tataonakinnano, iai kakabwaia aika a koaua ake a na waekoa n roko iroura.
Ngke a reke Aramwa ma ana aomata inanon baia Reimwanaite, a tataro ibukin kainaomatakiia. A tuai waekoa ni kainaomataaki, ma ngke a tataninga ma te taotaonakinnano ibukin kainaomatakiia, te Uea e kaota raoiroina naba ngkai ma kakabwaia aika a koaua. N te tai ae waekoa ao E kamaraui nakoia taian Reimwanaite bwa a aonga n aki tiringiia. E kakorakoraiia naba ana aomata Aramwa ao ni kabebetei rawawataia.2 Ngke a kainaomataaki n te kabane, a mwananga nako Taraemera, are a tibwauaa aia taneiai nakoia taan ongoraa ake a miimi. A miimi aomata aika kaain Taraemera, “ao … ngke a iangoa raoiroin te Atua naba ngkai, ao mwaakana ngke e kamaiua Aramwa ma tarina man te … tautoronaki, a tabeki bwanaaia ni kaitaua te Atua.”3
Raoiroin te Atua naba ngkai e roko nakoia ni kabane ake a tataro nakoina ma te nano ae koaua ao ni bwanin. E raonaki aei ma naake a tataro ma rawawatan nanoia ae koaua, ngke e taraa n raroa kainaomatakiia ma te korakai are e taraa n reitinako, ao n rikirake.
Ao ai arona naba bwa e kanga te ataeinimwaane ae te burabeti are e korakai ao e a kuri ni mate n te karabuuti ae mwaimwai ma ni mwaitorotoro ae e mena iaantano imwaain ae tang n takarua: “O te Atua, ko mena iaa? … E na maan baim n tiku …? Eng, O te Uea, a na maanra …?”4 N te kaeka, te Uea e aki waekoa ni kainaomata Iotebwa, ma E waekoa n taekina te rau.5
Te Atua e anga te kaantaninga naba ngkai ibukin te kainaomataaki n te kabane.6 E aki kakawaki bwa tera, e aki kakawaki bwa iaara, inanon ao rinanon Kristo ti na karekea te kaantaninga n taainako.7 E mena te kaantaninga naba ngkai imwaaira.
Irarikin aei, E a tia ni berita: “E na aki nako au atataiaomata mai roum.”8
E riaon riki Ibuakon bwaai ni kabane, ana tangira te Atua naba ngkai. N raonna ma are e taku Bauro, I kakoaua bwa akea te bwai ae kona ni “karaureira ma tangirara iroun te Atua, are inanon Kristo Iesu.”9 E ngae ngke ara bure, a kararoaira mai roun Tamneina i nanon te tai, ma a aki kona ni karaureira ma Ana tangira ae e reitinako naba ngkai mairoun tamana.
Iai tabeua kawai ao ma nanoia are mai iai “e na waekoa ni kakabwai[aira].”10 Ngkai, ni kaotia bwa a kanga reirei aikai n irekereke, N na tibwaua nakoimi bwaai ake a rinanona uoman aomata are maiuia a riki bwa kakoaua n raoiroin te Atua naba ngkai.
Ngke tebwitabun ana ririki, Emilie e ikakorakora ma bwainikirinana ni kabonganaakin bwaai . Te kakatai e a riki bwa ai te anuana, ao te anuan n noorakin mwiina e a irekereke ma bwaai aika a kareke aron tangiraia are e a ikakorakora ma ngaia inanon ririki, n aki tabe ma te tai ni kamarurungaki. Emilie e karaba ana kaangaanga, ai moarara riki imwiin are ngke e a riki bwa te buuaine ao te tina.
Ni kairan ana iango ma te kaantaninga ao n tokanikai ni bwaai aika a kareke tangiraia kanga akea namakinan te kantaninga ae e karekea n te tai anne. E katoa tai ana tutuo Emilie ni bwainaoraki ao n te tai ae waekoa, e nikiraki n te amburanti nakon te onaoraki are a maeka iai aoraki ibukin kamarurungakiia. E a moanna ni maaku ngkai e taku n ana iango bwa e a karaureaki mai rouiia natina, buuna, mweengana.
N te tairiki anne, ni maroaa i nanon te ruu ae mwaitoro man rotongitong, e wene ni kauangii Emilie iaon ana kainiwene ao ni korakai n tang. E karako ana konabwai n ataa bukina ni karokoa n tokina e a korakora kakain nanona, maakuna, ao te rotongitong ae karawawata i nanon te ruu ao n tamneina, e taku n ana iango Emilie bwa e nang bon mate n te tairiki anne. N Tiku ni Maroaa.
N te aro ane karawawata anne, e bubuti Emilie te korakora bwa e na ruo mai aon te kainiwene ni katorobubua n tataro. Ngkana akea te anua ni burebureaki are n tabetai a riki bwa mwakoron ana tataro ake mai imwaaina, e anga maiuna nakon te Uea ngkai e bubuti ma te rawawata n nano, “Nakon te Atua, I kainnanoiko. Taiaoka buokai. I aki tangiria n tiku ni maroaa. Taiaoka buokai ni keiakina te tairiki aei.”
Ao n te tai ae waekoa, n aron are E karaoia ma Betero are ngkoa, e karaua nanona inanon kataakina ae korakora.11 E roko namakinan te rau ae kamiimi iroun Emilie, te ninikoria, te kakoaua, ao te tangira. E a toki mwaitoron te ruu, e aki maroaa, ao n te moan tai ngke 14 ana ririki ni maiu, e ataia bwa e na nakoraoi bwaai ni kabane. Ngke “e uti nakon te Atua,”12 e matuunako Emilie inanon te rau. Ao n aron ae ti nooria, “ngkana kam rairananomi man aki manga kamatoatoai nanomi, ngkai naba ao e na uotaki te babaire ni kabomwi are e kakannato nakoimi.”13
Kamarurungan Emilie ao te kainaomataaki n te kabane e bon anaa te tai ae maan—namwakaina ni bwainaorakiaki, kataneiai n tokanikai ni bwaai aika a kareke tangiraia, ao n reirei, inanon te tai are e boutokaaki ao n tabetai n uouotaki man raoiroina. Ao e reitinako ni boutokaaki n te raoiroi anne ngkai e rin inanon te tembora ma buuna ao natina bwa a na kabaeaki n aki toki. N aroia aomata ae kaain Taraemera, E anga ana kakaitau Emilie ngkai e iangoa raoiroin te Atua naba ngkai ao mwaakana n tokanikai ni bwaai aika a kareke tangiraia.
Ngkai, N na tibwaua karakinan temanna te tia kakoaua ae e ninikoria. N Ritembwa 27, 2013, e kukurei Alicia Schroeder ni butimwaaia raoraona aika e tangiriia, Sean ao Sharla Chilcote, are a kaoti ni mweengana n akea kantaningaakina. Sean, are bon ana bitiobi Alicia, e anganna ana tareboon ao n taetae ma nanona ae koaua ao e taku, “Alicia, ti tangiriko. Iai temanna ae ko na tareboon ma ngaia.”
Buun Alicia, Mario, ane iaon te tareboon. E mena n te tabo ae e tionako ma tabeman natina iaon baoia ni mwanangaia ae e abwabwaaki. Iai te kabuanibwai ae riki ae kakamaaku. E korakora ikoakin Mario, ao natiia ae 10-ana ririki ni maiu, Kaleb, e a mate. Ngke e tuangaki Alicia iroun Mario ma te mata n tang ae e a mate Kaleb, e namakina ae e a tong ao te maaku are a rinanona tabeman mai buakora. E karika bwakana iaontano. Ngkai e nimamate rabwatana man te karawawataaki ae kaangaanga kabwarabwaraana, e aki kona ni kakamwakuri Alicia ke n taetae.
Bitiobi ao Titita Chilcote a kabirimwaakaia nako mooa n tabekia ao n taua. A uaia n tang ao rangi n nanokawaki n tabeua te tai. Ngkanne Bitiobi e angan Alicia te kakabwaia.
Te bwai are e riki imwiina e bon kaangaanga aron kabwarabwaraana n akea ataakin tabeua ana Mwakuri ni Kamaiu Iesu Kristo ao raoiroin te Atua naba ngkai. E karaurau Bitiobi Chilcote ni katokai baina iaon atuun Alicia, ma bwanaana ae ruru, ao e moana ana taetae. E ongo bwaai aika uoua Alicia kanga titebo ma e bon taekin te Atua. Te moan, e ongo arana, Alicia Susan Schroeder. Imwiina e ongo ana bubuti te bitiobi ana kariaia te Atua ae Moan te Mwaaka. N te tai ae waekoa—n atongan arana ao mwaakan te Atua—e kaonaki Alicia ma te rau, te tangira, te karaunano ae kaangaanga aron kabwarabwaraana, ao n te aro ae kakimwareirei. Ao e reitinako te namakin aei irouna.
Ngkai, e koaua, Alicia, Mario, ao aia utu a teimatoa n tang ao n ururinga Kaleb. E bon kaangaanga! Ngkana I taetae ma ngaiia, a ranran matan Alicia ngkai e taekina aron tangiran ao ururingan ana ataeinimwaane. A reitinako n ranran matana ngkai e taekina aron te Tia Kamaiu ae Moan te Kakannato ni boutokaia inanon mwakoron kataakina, ni moanaki ma raoiroina naba ngkai n ana tai ni bwarannano ae moan te korakora “e aki mwaiti te bong ma ngkai.”
I a nooria bwa baika ti rinanona inanon maiura a karekea te kaangaanga are e a kaangaanga karekean, kinaakin ke n taua te aekaki ni buoka are a karekea Emilie ao Alicia. I a tia n rinanona n aron taai akanne. I kakoaua bwa, inanon taai akanne, kamaiuakira ae bebete bon te kaotioti ae mwaakaroiroi n raoiroin te Atua naba ngkai. Uringnga, Iteraera n taai ake ngkoa e kamaiuaki n te kabane “iroun te Atua are bon ngaia naba are e a tia ni kamaiuia”12 ni katoa bong.
I kaota au koaua bwa Iesu Kristo bon te Tia Kamaiu ae Kakannato, ao n Arana, I berita bwa ngkana kam ukoukoria ma nanomi ae koaua ma te kaantaninga, E na kamaiui ngkami man baike kam kakamakaaki ma ni kamamaraaki iai ke n uruana maiumi ke kukureimi. Te kamaiuaki anne e bon maan taina nakon ane ko tangiria—tao maanin te maiu ke te tai ae rangi ni maan. Ngaia are, n anganingkami te karaunano, te ninikoria, ao te kaantaninga ni boutokai ao ni kakorakorai ngkami nakon te tai ni kamaiuaki n te kabane, I taekinna nakoimi ao ni kakoaua raoiroin te Atua ngkai naba n aran Iesu Kristo , amen.