Kaetieti aika Boou, Karaoakiia, ao Bwaai n Ibuobuoki

Maroro iaon te tembora. Te Moan Beretitentii e kanakoa ana maroro n Tianuare 2, 2019, n taekinna ni mwakorona: “Imwiin bubua n ririki aika a mwaiti, kabwarabwara n irekereke ma te mwakuri n te tembora a tia ni bitaki ni katoa tai, n ikotaki ma taetae, aron karaoaia, bwaai n reitaki, ao kawakinan rongorongoia. Burabeti a tia n reirei bwa bon akea tokin bitaki aikai n aron are e kairaki iroun te Uea nakoia Ana toro.”

Karikirakeaia Ataei ao te Roronrikirake. Ataei ngkai a kabanea te Moanrinan ao kairake a mwaing man te kiraati teuana ke te kooram nakon are imwiina nakon te roro are imwiina n aia ririki n Tianuare nakon aia rekenibong n tatabemaniia. Aio nanona naba bwa kairake a kona ni karekea te rekomente ae tianaki taiana nakon te tembora n te moan tai inanon Tianuare n te ririki are e koro iai 12 aia ririki, ao kairake n ataeinimwaane a kona ni katabuaki nakon te Nakoanibonga ae te Aaron inanon Tianuare n te ririki are e koro iai aia ka 12.

E mwaiti riki te anga n ibuobuoki. LDS Charities e a tia ni katanoata reitakina ma JustServe.org ni katabangaaka moan waakinan te #YouCanDoSomething, ni kaoi aomata bwa a ana ibuobuoki n aia tabo ao n anga te mwakuri ae raoiraoi n te aonaaba ni buoka te bitaki nakon te aonaaba. Ngkana koa moan waakinna, nakon ana iteraniba “How to Help” iaon LDSCharities.org.

Bwai n ibuouboki ae boou n te ministering. Te webutiaite Te Mwakuri n Ibuobuoki aei (ministering.ChurchofJesusChrist.org) e a tia ni manga kabouaki rongorongo ake iaona ao witeo. Bwaai n ibuobuoki iaona a kona ni buokiia taan wareware n anga aia ibuobuoki n nakonaba, katea te reitaki ae nano riki, ni katamaroa te konabwai iaon te kakauongo ao a mwaiti riki. Kanoana aika a boou e kairaki rongorongon Reirei iaon Mwakuri n Ibuobuoki ake a tia ni boretiaki n te Ensign ao Liahona maekatiin, n reitaki nakon maroro iaon te ibuobuoki iaon maungatabu ni kabuta, ao witeo ake a kona n tibwaaki, kuote, ao koroboki aika a tabu.

Kantaninga ao kamarurung ibukiia naake a rootaki n te bwainikiriinaki. Ana webutiaite te Ekaretia ae boou, abuse.ChurchofJesusChrist.org, e anga bwaai n ibuobuoki ao bwai ni mwakuri aika akona ni karaoaki ibukiia ake a rootaki maiuia n te bwainikirinaki ao ibukiia naake a tangira ni buoka totokoan te bwainikirinaki. Te Moan Beretitentii e korea naba te reta ni Maati 26, 2019, ni kaungaia taan kairiiri n te Ekaretia bwa a na anga baia n tangira ni buokiia nake a rootaki man te bwainikiriiraki. E raonaki te reta ma te beebwa are e kabouan kainibaire bwa ana kanga bitiobi ao beretitentii n te titeiki ni maroro ma naake a rootaki mwakuri ni kakeru ao tangako ao tera araoia ni kaira te intawiu ma membwa n te Ekaretia. Te ekaretia e karaoa naba te witeao, “Protect the Child,” ao e kaboui rongorongo iaon te Euangkerio iaon te bwainikirinaki.

Bwaai aika a boou ao apps. Te baire ibukin bwaai ni kamatebwai aika tibwa ngkai n te Gospel Library app e buokiko ni katea am tai ni kamatebwai iaon kanoan te app . Otenanti ake a Tauraoi bon te bwai ni mwakuri ibukin KakakenUtu ake a kauarerei kakaean ara ibukin te tembora, ni karekea am tai ni beku ibukiia am utu ao ni kukurei ni kakabwaia n te tembora. Ao KakakenUtu e kaan teniua te tatin waaki ni kakukurei aika a boou, n aron “Walk Where They Walked,” ni buoka kabaeaia membwa ake kairake n rongorongon te utu. Waaki ni kakukurei a tauraoi n taetae aika 10.

Kaotinakoan ae mwaiti e aki kaungaaki. Ngkai bukamaru ni katei n aono ao rongorongon rimoa aika a bon riai, te Ekaretia n te tai aei e aki kaunga bootaki aika bubura n aron kamataku. Teniua kamataku aika a na reitinako:te Nauvoo Pageant i Illinois, USA, ma ana boutoka te etekuata n te Ekaretia; te Mesa Pageant i Arizona, USA, iaan ana kairiiri te aono; ao te British Pageant, iann ana kairiiri te aono, bwa e na karaoaki ni katoa aua te ririki. Te Ekaretia e a tia ni katoka te bukamaru n te kateti imwain kaukan te tembora n onea mwiina n te bootaki n taromauri ao kawarakiia taan kairiiri n te Ekaretia ibukiia kairake.