O Le A Avea A’u Ma Ou Malamalama

Elder O. Vincent Haleck

O le Peresitene o le eria

E manatua pea e le Alii Ana auauna ma ua Ia faia ni tautinoga ia i latou. Na Ia faia nei tautinoga e ala atu i feagaiga.

Na folafola atu e le Alii ia Iosua, “. . . e pei ona ou i ai ia Mose, e faapea ona ou i ai ia te oe; ou te le tuua lava oe ou te le tuulafoai lava ia te oe. Ia e faamalosi ma lototele.”

I le aiga o Liae ao latou faimalaga atu i le laueleele folafolaina, na folafola atu e le Alii, “O le a avea a’u ma ou malamalama i le vao . . . o le a e iloa ai o a’u o loo taitaia outou.”

I le asō i le Eria o le Pasefika o loo i ai o tatou Liae ma Iosua o aso nei o e ua manatuaina le agalelei ma famanuiaga a le Alii i o latou olaga i le taimi ua tuanai ma le taimi nei. O loo ua ta’ua faapea “o le manatuaina o se faailoga o le agaga faafetai”. I lo tatou Eria atoa ua matou valaaulia ai ni ulugalii matutua e o mai ma auauna atu i na vaega o le Pasefika o loo i ai le Ekalesia i lona tulaga tau amata. Ia i latou na auauna atu ma o loo auauna atu pea, o lo latou auala lea o le toe tuuina atu i isi faatoa liliu mai i le Ekalesia. O amataga a ulugalii faifeautalai lava ia i le Ekalesia atonu na amata i le tele o tausaga ua tuanai, ina ua o mai faifeautalai mai Amerika e aoao o latou tuaa ia na taliaina le talalelei. O na uluai tagata na liliu mai mai motu, sa lei masani lelei i la latou faatuatuaga fou i le taimi muamua, e pei lava o i latou o tagata fou i le Ekalesia tau amata. Matou te valaau atu nei ia tatou ulugalii matutua o aso nei mai le Ekalesia ua faatulagaina e o mai ma fesoasoani e faamalosia o latou uso ma tuafafine i le Ekalesia tau amata. E moni lava, ua latou “saunia le malamalama”. O le a molimau atu le Agaga o le Alii e ala atu i la latou faataitaiga, faapea e ala atu i le uunaiga a le Alii na taitaia ai i latou.

Ua faia e ulugalii faifeautalai matutua se eseesega ao latou faaaogaina lo latou poto masani ma aoao atu tagata i le Ekalesia tau amata pe faapefea ona taitaia le Ekalesia, ma pe faapefea ona faaaoga le talalelei i o latou olaga i aso taitasi. E i ai le eseesega o aganuu i tagata i nofoaga e pei o Papua Niu Kini, Atumotu o Solomona, Vanuatu, Atu Maresala ma Kiripati. O a tatou ulugalii o loo auauna atu e o mai mai Samoa ma Toga, e faapea foi [ulugalii] Samoa ma Toga e nonofo i le Iunaite Setete, Niu Sila ma Ausetalia. Na i ai foi so matou uso mai Papua Niu Kini, ma lona faletua, na auauna atu.

Mafaufau i molimau a ulugalii na auauna atu, pe o loo auauna atu nei:

“O la ma misiona e lua-tausaga i Atumotu o Solomona o se tasi o aafiaga sili na ma oo i ai i o ma olaga faatasi, . . . lea ua fesoasoani ia i ma’ua e maua ai se molimau mausali . . . e malamalama ai i le alofa o lo tatou Tama o i le Lagi ma lo tatou Faaola mo i tatou, ma Ana fanau uma lava. Na ma lagonaina le toe talavou ma faamalosia ma “savavali ae le matapogia”. Na ma molimauina vavega ma le aao o le Alii i o ma olaga ma olaga o le Au Paia i le alualu i luma o le galuega”. —Uso Viiga ma Tuafafine Lupe Fuimaono, Siteki o Pesega Samoa

“Mo le tele o tausaga, na ou auauna atu ai i lalo o taitaiga a peresitene o siteki eseese o se failautusi a le siteki. O le malamalama ma le poto masani na ou mauaina, na saunia ai i ma’ua e auauna atu ma fesoasoani i taitai perisitua ma ausilali i le Siteki a Daru Papua Niu Kini. Ma te mafaufau i lenei mea o se faamanuiaga. O le auauna atu i le Alii faatasi ma la’u soa e faavavau o Tuafafine Taala, o se faamanuiaga i taimi uma”. —Uso Lamese ma Tuafafine Loreta Taala, Siteki o Pago Pago Samoa Sisifo

“O le ma auaunaga i Papua Niu Kini ua avea o se mea taua tele ia i ma’ua, ae maise lava mo Uso Jackson, o se tagatanuu o Papua. O la ma auaunaga o se toe foi mai i PNK ua leva ona moemiti i ai e folafola atu le talalelei toefuataiina a Iesu Keriso i o ma aiga ma tagata. O le faapipiiina o a ma pine faifetautalai i aso taitasi na tuuina mai ia i ma’ua se malosiaga maoae o le faatuatua ma le faamoemoe. . . .” —Uso Peter ma Tuafafine Serena Jackson, Siteki o Eight Mile Plains Ausetalia

“Faafetai mo le tuuina mai o nei ulugalii ofoofogia e auauna atu iinei i PNK. Ua avea i latou o se fesoasoani maoae mo le atiinaeina o le Ekalesia ma le faamalosia o le au paia iinei. Latou te auauna atu o ni taitai, faufautua, tagata e aoaoina atu ma faiaoga ia latou paranesi ma uarota. Latou te fesoasoani foi i a matou alii faifeautalai e auauna atu i tagata le lolotu ma tagata e le toaaga mai ia toe foi mai ma le atoatoa. O se taunuuga, ua ou vaaia le faateleina o le auai i sauniga faamanatuga. Ua fesoasoani tamaitai i le Peraimeri, Tamaitai Talavou, ma le Aualofa, e faamalosia na ausilali”. —Peresitene o le Misiona o Finau Hafoka, Misiona a Papua Niu Kini Port Moresby

I la latou auaunaga, ua faatulagaina e a tatou ulugalii faifeautalai le Ekalesia. Ua ala mai ia i latou le aumaia e le Alii o le malamalama o Lana talalelei i se nuu ma se atunuu. Ua totoina fatu i loto ma mafaufau lelei. Ua moni ai le folafolaga a le Alii, “O le a Ou i ai i lo outou lima taumatau ma lo outou agavale, ma o le a i ai loʼu Agaga i o outou loto, ma siʼo faataamilo outou e aʼu agelu, e sapasapai outou i luga”.