Itulau o le lotoifale

Taliaina o le Alofa o le Tama Faalelagi

Irene Brunt–Craig

Ina ua maliu lo’u tama, sa ou faia ni filifiliga sese uma lava. Na ou taumamao mai le Atua.

Sa ou lotovaivai ma lē fiafia. Na ta’e lo’u fatu ma na masani ona ou fesili ia te au lava ia, “E faapefea ona faia e le Atua lenei mea ia te a’u?”

Ou te manatuaina aso ae lei maliu lo’u tama. Ua fai sina leva ona ma’i o ia. Ou te manatua le valaau atu i tagata uma i le lotu na ou auai i le taimi lea ma talosaga ia i latou ia tatalo mo lo’u tama. Ou te manatua le faapotopotoina o nai o’u tei ma tatalo faatasi mo le malosi o tama.

O lo’u tama o le tagata lea na sili ona taua i lo’u olaga, ma na le mafai ona ou vaai ia te a’u lava ia e aunoa ma ia. Na ou tatalo ma le naunautai ma le faamaoni sili atu nai lo se isi lava taimi i lo’u olaga atoa. Sa i ai sa’u molimau ia Iesu Keriso, ae o le taimi muamua lava lea ua ou matuai ole atu ai lava i le Atua mo se mea. E ui i a’u tatalo faatauanau, na maliu lava lo’u tama. O le oona o le faanoanoa na ou ita ai, ma na ou avea lou faavauvau e tuuesea ai a’u mai lo’u Tama o i le Lagi.

Ou te lei iloaina i le taimi lea o le faia o lenei mea ua na ona tuuesea ai a’u mai le mana faamafanafana o le Agaga. O lena Agaga, lea semanu e faamaloloina lo’u loto ma tuuina mai ia te a’u le malamalama, na tuleieseina. Na ou matuai tiga lava ona e lei taliina mai a’u tatalo faamaoni ma le naunautai.

Pe a le faatasi le Agaga ma oe, e vave lava ona faigata ona puleaina mea uma. Sa ou leiloa ma sa ou le iloa po o fea e liliu atu i ai.

O le taimi lea, sa ou tafao faamsani ma se alii talavou e auai i le Ekalesia a Iesu Keriso o le Au Paia o Aso e Gata Ai—o Dustine Craig. Sa ia auauna atu i se misiona mo le lua-tausaga, ma o lena valavala ma ia, lea sa ou iloaina o sa’u uo mamae, sa na ona faopoopo atu i le tuuatoatasi.

Na amata ona asiasi mai faifeautalai ia te a’u. Na ou fiafia i le agaga matagofie la te aumaia ma talanoaga na matou olioli ai. E ui lava i lo’u alofa mo Dustine na ou mafaufau mamafa ai e auai i le Ekalesia, ae ou te lei saunia lava e faia lena filifiliga e suia ai le olaga ina ia papatiso.

Ina ua mavae sina taimi, na taofia le asiasi mai o faifeautalai. Ona toe tupu foi lea, o le tuua na o a’u ma na ou lagonaina e i ai se mea o loo misi. O se taimi lea o le sailiga loloto o le agaga ma le tauivi. Ou te lei manao e ole atu i le Atua mo se molimau. Ou te lei manao e ole atu i le Atua mo se mea. Na ou matuai fefe lava i le toe . . . faatoilaloina.

Na iu lava ina ou manao ia iloa pe moni mea na aoaoina ai a’u e faifeautalai, o lea na ou tootuli ai i le tatalo ma ole atu ma le faamaoni i le Tama Faalelagi e faamolemole ia auina atu se savali i faifeautalai e o mai e toe asia a’u. E tolu aso talu la’u tatalo, ae tuitui mai faifeautalai e toalua i lo’u faitotoa.

Sa matuai faatumulia a’u i le Agaga ma na matuai ootia tele i le agaga faafetai na filifili le Alii e faamanuia a’u i le mea tonu lava na ou ole atu ai; Na le mafai ona taofiofia o’u loimata ina ua ou vaaia i laua. O le tasi o faifeautalai o se uo a Dustine mai le Nofoaga Autu e Aoao ai Faifeautalai. Na talosagaina e Dustine lana uo e sue a’u. Na ta’ua e lena alii faifeautalai le talosaga a Dustine, ma na ia fai mai foi o faifeautalai talu ai na asia a’u, na tuua foi se savali faapitoa mo ia ia asia a’u.

O le faia o le filifiliga e fai lena tatalo ma ole atu mo se fesoasoani o le amataga o se ala fou i lo’u olaga. Na sili atu ona ou lagonaina le faatasi mai o le Tama Faalelagi i aso taitasi. Ao ou faatagaina le Agaga e aumaia le malamalama ia te a’u e faatatau i le maliu o lo’u tama, na amata ona fai a’u miti lea na ou vaaia ai le Tama Faalelagi o ma nonofo faatasi iina ao o’u faavauvau ma le tiga i le maliu o lo’u tama. Na i ai lava iina le Alii i le taimi atoa; i loimata taitasi na pauu. Na taofia lo’u lagonaina o le matua tuuatoatasi ma le faaesea. Na iu lava—ina ou faatagaina o Ia e ulufale mai. Na ou taofia le faaaogaina o lo’u tiga o se ‘alofaga e tuleiesea ai le Atua ma na amata ona ou vaaia i o’u puapuaga le tele o le alofa o lo’u Faaola ma Lona silafia o a’u.

I le taimi o le lesona lona tolu ma faifeautalai, na le toe mafai ona taofiofia o’u lagona. Na maligi o’u loimata ma ta’u atu ia i laua na ou iloaina o le Ekalesia a Iesu Keriso o le Au Paia o Aso e Gata Ai e moni, ma na ou iloaina e moni le Atua.

Na tali mai le Tama Faalelagi i a’u tatalo ina ua maliu lo’u tama. Na te lei faasaoina mai tama mai le oti e pei ona ou ole atu ai, ae sa Ia i ai iina i le taimi atoa lava e faamafanafana ia te a’u ao o’u faanoanoa. E ui lava ou te lei filifili e vaaia lena mea i lena taimi, e le fiu gofie le Tama Faalelagi ia i tatou. Sa Ia faatasi mai pea ia te a’u ma le onosai i la’u malaga atoa o le liua, seia oo ina mafai ona ou maua e a’u lava ia se molimau mo a’u lava ia faapea e tali mai o Ia ia tatou tatalo. Na vave lava ona ou papatiso ma ou te matuai faafetai lava i le asō mo la’u molimau ma le auai i lenei talalelei a Iesu Keriso.