“O le mea lea, na ou fai atu ai ia te outou, taumamafa fiafia i afioga a Keriso”

Savali o le faatuatua ma le faamoemoe mai ia tatou talavou.

Aoao ia te Au

Saunia e Mariana, 14, Apia Samoa

O le “Aoao ia te au” o le oo ina iloa Iesu Keriso ma le Tama Faalelagi. O se vaega taua lea o la tatou malaga faaletino. Na fetalai mai le Alii, “O le ola e faavavau foi lenei, ia latou iloa oe le Atua moni e toatasi, atoa ma lē ua e auina mai o Iesu Keriso lea” (Ioane 17:3).

Ao tatou iloa atili Iesu Keriso, e mafai ona tatou malamalama i le tele o Lona agalelei, atamai, agaalofa ma le alofa. O le a faateleina lo tatou faatuatua ma la tatou molimu ia te Ia, ma o le a faateleina lo tatou naunau e mulimuli ia te Ia ma le Tama Faalelagi.

O le “Faalogo i a’u upu” o se poloaiga mai le Alii. E fetalai mai Iesu Keriso ia i tatou e ala mai i tusitusiga paia, perofeta soifua ma le Agaga Paia. Tatou te manaomia ona taumamafa fiafia i tusitusiga paia, manatunatu loloto ma faaaoga nei upu i o tatou olaga.

Ao o’u suesue i le afioga a le Atua, ou te taulai atu i le Tusi a Mamona ona ou te iloaina o le tusi lea e sili ona sa’o i luga o le fogaeleele ma o le maatulimanu o la tatou tapuaiga. Na aoao mai Iosefa Samita, “O le a sili atu ona latalata le tagata i le Atua e ala i le ola ai i ona aoaoga nai lo se isi lava tusi.” Na tuuina mai e Peresitene Thomas S. Monson se valaaulia mamana lava i le Konafesi Aoao o Aperila 2017; na ia valaauliaina ai i tatou ia faitau le Tusi a Mamona i aso taitasi e fesoasoani ia i tatou ia malamalama ai i le afioga a Keriso.

“Savali i le agamalu o lo’u agaga” o se vaega taua tele o le mulimuli ia Keriso aua o Ana afioga e faatoa mafai ona suia i tatou pe a tatou naunau e faatino ma usiusitai. O lenei mea e manaomia ai le agamalu. E manaomia ai i tatou e tuuese o tatou lava ala ma savavali faatasi ma Ia i Ona ala. O nisi taimi tatou te mafaufau ai o la tatou ala e sili atu ae afai tatou te agamalu ma mulimuli ia te Ia, o le a Ia taitaia i tatou i luga o Lana ala atoatoa.

Ona oo mai ai lea o le folafolaga, e faapea ‘o le a outou maua le filemu ia te a’u.’ Ua folafola mai e le Alii ia i tatou le filemu pe afai tatou te faia mea uma Na te poloaiina i tatou e fai. Faalogo, aoao, ona savali lea i Ona ala, o le a tatou maua le filemu ia te Ia. O le a tatou maua le faamautinoaga faapea o le Agaga Paia o le a faatasi pea ma i tatou ma o le a puipuia i tatou e le Atua e ui lava i soo se popolega po o vaivaiga atonu e oo ia i tatou. E mafai ona tatou maua le mautinoa faapea o Iesu Keriso ma lo tatou Tama o i le Lagi o le a le tuua lava i tatou pe tuulafoaia i tatou aua na folafola mai le Alii ia i tatou i le Mataupu Faavae ma Feagaiga 82:10, “O Aʼu, o le Alii, e noatia aʼu pe a outou faia mea Ou te fai atu ai.”

O le Taimi a le Alii

Saunia e Loreighelle, 14, Vaimoso Samoa

E ta’u mai e lo’u tamā ia i matou i taimi uma lava, pe a oo i le taimi a le Alii o le taimi a le Alii, e le o so tatou taimi, e le o sou taimi, e le o sa’u taimi pe o se taimi a se isi lava tagata—o le taimi a le Alii.

O nisi taimi atonu tatou te faapea ai, “Ou te matuai le iloa lava le mea e fai, ua tele na’ua mea e tatau ona fai, ae na o le lua o’u lima.” E aoaoina i matou e lo’u tama faapea afai tatou te faatulagaina i tatou lava ma faamuamua mea e sili ona taua, ona mafai lea ona tatou faataunuuina mea uma e manaomia ona faia. Na ia aoaoina i matou faapea o mea e tolu e sili ona taua i le olaga o le taimi a le Alii, taimi o le aiga ma le taimi o galuega po o le aoga.

O le Seminare o le taimi a le Alii. E le tatau ona tatou faatagaina i tatou lava e momoe pe tosina ese i le taimi a le Alii. E le mafai lava ona tofa o Ia pe a tatou manaomiaina o Ia. I aso uma e faatasi mai pea e le aunoa le Alii ma i tatou, o lea la ua na o sina ositaulaga itiiti le tuu atu o se itula i taeao taitasi ia te Ia i le seminare; e alu ai i le lotu i le aso Sa, auai i gaoioiga o le Mutuale ma auauna atu i a tatou uarota o ni uso ma tuafafine o auaunaga. Ou te talitonu o nei taimi taua i lo tatou vaiaso o taimi uma lava a le Alii ma e tatau ona tatou auauna atu ia te Ia ma le maelega pe a tatou i ai i Lana taimi ma Lana galuega. Ua folafola mai e le Alii e faamanuia i tatou pe afai tatou te alolofa ia te Ia ma tausi Ana poloaiga, ae maise lava pe afai o Lana taimi lea ua tatou i ai.

Talitonu i le Atua

Saunia e Aloe, 14, Lotopa Samoa

“Ia talitonu i le Atua; ia talitonu o loo soifua o ia, ma o ia na foafoaina mea uma, i le lagi ma le lalolagi; ia talitonu ua ia te ia le poto uma, ma le mana uma, i le lagi ma le lalolagi; ia talitonu e lē mafai e le tagata ona malamalama i mea uma e mafai ona malamalama i ai le Alii” (Mosaea 4:9).

Na tuuina mai e lenei mau ia te a’u le tele o mea e mafaufau i ai. Ou te talitonu moni lava i le Atua ma Lona mana ma le poto i le lagi ma le lalolagi. Ae o le a le uiga o lena mea? O lona uiga e tatau ona tatou maua le faatuatua i le Alii ma talitonu ia te Ia. Na te silafia na mea uma, na Ia foafoaina mea uma, e mafai ona Ia faia na mea e le mafai e le tagata ma e ala mai ia te Ia ona mafaia mea uma. Ou te iloaina e moni lenei mea. Ou te talitonu i le Atua le Tama e faavavau i le Lagi. Ou te talitonu ia Iesu Keriso lo tatou Faaola ma le Laveai, ma e ala mai i Lona mana ma le Togiola e mafai ai ona faasaoina a’u i le aso mulimuli. Ou te iloaina e le mafai ona ou malamalama i mea uma, ae ua lava mea ua ou aoaoina e maua ai lo’u ala e toe foi atu ai ia te Ia.

Filifili ma le Atua

Saunia e Rebecca, 14, Apia Samoa

O aso nei tatou te maua ai fautuaga mai le tele o punaoa ae e le lelei uma i latou. Na aoaoina i tatou e perofeta anamua ia: “Filifili faatasi ma le Alii i au mea uma e fai, ma o le a ia taitai oe mo le lelei” (Alema 37:37).

Ua ta’u mai e lenei mea ia te a’u faapea o le tagata e sili e mafai ona tatou maua mai ai le fautuaga o lo tatou Tama Faalelagi. O Lana fautuaga o le a taitaia i tatou i o tatou olaga ma o le a sa’o ma mautinoa o tatou ala. Ua ta’u mai foi e lenei mau ia i tatou se folafolaga faapea “. . . afai e te faia nei mea, o le a sii ae oe i luga i le aso gataaga.”

Ao tatou mulimuli i le fautuaga a le Atua, e le mafai lava ona tatou sese i la tatou malaga faaletino. Sei o tatou mulimuli ia te Ia ma o tatou loto atoa ma faalagolago ia te Ia ma Lana fautuaga ina ia mafai ai ona tatou iloa mea e fai. Sei o tatou aoao e faalogo i Lana uunaiga ma maua fautuaga e ala i faaaliga patino, taitai o le Ekalesia, matua, faiaoga ma uo lelei o e alolofa ia i tatou.

Ao tatou faalogo i afioga a le Alii ma saili Lana fautuaga e ala i le tatalo ma le suesue i tusitusiga paia i aso uma, o le a taitaia i tatou e le Agaga Paia e faia Lona finagalo ae le o o tatou loto.

Aua ua Faapea Lava Ona Alofa Mai o le Atua i le Lalolagi

Saunia e Ruth, 14, Apia Samoa

Ua lauiloa lava le faapea ana le seanoa le alofa o lo tatou Faaola o Iesu Keriso, semanu tatou te le i ai iinei i le asō. Na Ia afio mai i le lalolagi e puapuagatia, maliu mo a tatou agasala uma lava ma faasaoina i tatou. E leai so’u masalosalo na Ia ositaulagaina mea uma e aofia ai Lona soifua faapelepele paia mo i tatou, o tagata agasala. Na auina mai e le Tama Faalelagi Lona Alo na Fanaua e Toatasi iinei mo lenei mafuaaga ma mo i tatou ia iloa ua na o Ia lava tatou te manaomia.

E ala i le talitonu ma le faamaoni ia te Ia, o le a tatou maua ai le faamanuiaga silisili i faamanuiaga uma a le Atua: le ola e faavavau faatasi ma Ia. Ae ui i lea, e tatau ona tatou faatinoina muamua le faatuatua i le Tama Faalelagi ma Lona Alo o Iesu Keriso; tatalo i le Atua, salamo i a tatou agasala, talia sauniga faaola, osia ma tausia feagaiga paia, ma tumau seia oo i le iuga. O le ala lenei e mafai ai ona tatou faaali atu tatou te alolofa moni lava ma faamamaluina le taulaga na faia mo i tatou.

“Aua ua faapea lava ona alofa mai o le Atua i le lalolagi, ua ia aumai mai ai lona atalii e toatasi, ina ia le fano se tasi e faatuatua ia te ia, ae ia maua le ola e faavavau” (Ioane 3:16).

Ou te talitonu na tauave e Iesu Keriso i Ona luga a tatou agasala uma lava ina ia mafai ai ona tatou tauaveina i o tatou luga Lona suafa. E tatau ona tatou manatua o Ia i taimi uma ma tausia Ana poloaiga ina ia i ai se aso o le a tatou tutu ai ma le lē pona i Ona luma, ae le fano.