Pulong ug Kabubut-on sa Ginoo

Imahe

nanglupad nga mga insekto nga mihugpa libut sa mga tolda daplin sa suba

Taliwala sa pag-antus didto sa Winter Quarters, nadawat ni Brigham ang balita nga usa ka pundok sa manggugubot nga mga liboan ka mga lalaki miatake sa gamay nga komunidad sa mga Santos nga anaa pa sa Nauvoo. Mga duha ka gatus ka mga Santos misukol, apan napilde sila sa gubat human sa pipila ka mga adlaw. Ang pamunoan sa siyudad nakigsabut alang sa malinawon nga pagbakwit sa mga Santos, kadaghanan kinsa mga kabus ug masakiton. Apan samtang ang mga Santos mibiya sa siyudad, ang panon sa manggugubot misamok-samok kanila ug milungkab sa ilang mga panimalay ug mga karomata. Usa ka panon sa manggugubot misakmit sa templo, gipasipad-an ang sulod niini, ug gibiay-biay ang mga Santos samtang sila milayas ngadto sa mga kampo sa pikas nga daplin sa suba.²⁸

Sa dihang nahibaloan ni Brigham ang mahitungod sa pagkawala sa paglaum sa mga lalin, mipadala siya og sulat ngadto sa mga pangulo sa Simbahan, nagpahinumdom kanila sa pakigsaad nga ilang gihimo didto sa Nauvoo sa pagtabang sa mga kabus ug sa pag-abag sa matag Santos kinsa buot moadto sa kasadpan.

“Ang kabus nga mga kaigsoonan, mga biyuda ug mga ilo, masakiton ug timawa, sa karon nagpabilin sa kasadpan nga tampi sa Mississippi,” siya mipahayag. “Karon ang panahon alang sa pagtrabaho. Himoa nga ang kalayo sa pakigsaad, nga inyong gihimo didto sa balay sa Ginoo, modilaab diha sa inyong mga kasingkasing, sama sa usa ka siga nga dili mapalong.”²⁹

Bisan og sila nakapadala og kawhaan ka panghinabang nga mga karomata ngadto sa Nauvoo sa milabay nga duha ka semana ug dihay gamay nga pagkaon ug pipila ka mga tagana para reserba, ang mga Santos sa Winter Quarters ug sa kasilinganang mga pamuy-anan mipadala og dugang nga mga karomata, mga panon sa toro, pagkaon, ug ubang mga tagana balik ngadto sa Nauvoo. Si Newel Whitney, ang tigdumalang bishop sa Simbahan, mipalit usab og harina alang sa timawa nga mga Santos.³⁰

Sa dihang nakaplagan sa panghinabang nga mga pundok [relief parties] ang mga lalin, daghan sa mga Santos didto kahilanaton, kulang sa kagamitan alang sa tugnaw nga panahon, ug hilabihan na kagutom. Pagka Oktubre 9, samtang sila nangandam alang sa panaw ngadto sa Suba sa Missouri, nagtan-aw ang mga Santos samtang usa ka panon sa pugo mipuno sa kalangitan ug mitugpa ibabaw ug libut sa ilang mga karomata. Ang mga dagko ug mga batang lalaki nag-inilugay sa mga langgam, gipangdakop kini pinaagi sa ilang mga kamot. Daghan ang nakahinumdom giunsa usab sa Dios pagpadala ni Moises ug sa mga anak sa Israel og pugo diha sa panahon sa ilang panginahanglan.

“Niining buntaga kami adunay direkta nga kasinatian sa kalooy ug kamaayo sa Dios,” misulat si Thomas Bullock, usa ka klerk sa Simbahan, diha sa iyang journal. “Ang mga kaigsoonan midayeg sa Dios ug mihimaya sa Iyang ngalan nga kon unsa ang gibu-bu diha sa mga anak sa Israel didto sa kamingawan gipakita ngari kanamo diha sa among kalisud.”

“Matag lalaki, babaye, ug bata adunay mga pugo nga makaon alang sa ilang panihapon,” misulat si Thomas.³¹

Sa laing bahin, liboan ka milya ang gilay-on diha sa kagaangan [atoll] sa Anaa diha sa Kadagatan sa Pasipiko, usa ka tighupot sa Aaronic nga Pagkapari nga ginganlan og Tamanehune mipakigpulong sa usa ka komperensya sa sobra sa walo ka gatos ka mga Santos sa Ulahing mga Adlaw. “Usa ka sulat ang kinahanglan nga ipadala ngadto sa Simbahan sa Amerika,” misugyot siya, “maghangyo kanila sa pagpadala dayon nganhi og gikan sa lima ngadto sa usa ka gatos ka mga elder.” Si Ariipaea, usa ka miyembro sa Simbahan ug usa ka pangulo sa lokal nga balangay, mipadangat sa sugyot, ug ang mga Santos sa Amihanang Pasipiko mipataas sa ilang mga kamot agi og pag-uyon.³²

Nagdumala sa komperensya, si Addison Pratt kinasingkasing nga miuyon ni Tamanehune. Sa miaging tulo ka tuig, si Addison ug si Benjanim Grouard nakabunyag og kapin sa usa ka libo ka mga tawo. Apan niana nga panahon nakadawat lamang sila og usa ka sulat gikan ni bisan kinsa sa Napulog Duha, ug kini wala maghatag og kasugoan alang sa pagpauli sa panimalay.³³

Sulod sa unom ka bulan sukad madawat kana nga sulat, ang duha ka mga misyonaryo wala nay laing nadungog gikan sa pamilya, mga higala, o mga pangulo sa Simbahan. Sa matag higayon nga may moabut nga pamantalaan nganha sa isla, ilang siksikon ang mga pahina niini alang sa mga balita mahitungod sa mga Santos. Usa ka balita nga ilang nabasa miingon nga katunga sa mga Santos sa Nauvoo gipangpatay samtang ang nahibilin gipugos sa paglayas ngadto sa California.³⁴

Matinguhaon nga makahibalo sa kapalaran ni Louisa ug sa iyang mga anak nga babaye, mihukom si Addison sa pagbalik ngadto sa Estados Unidos. “Ang mahibalo sa kamatuoran, bisan kini ngil-ad,” misulti siya sa iyang kaugalingon, “mas maayo pa kay sa magpabilin nga nagduda ug nabalaka.”³⁵

Ang mga higala ni Addison nga si Nabota ug Telii, ang bana ug asawa kinsa nakaserbisyo uban kaniya sa Anaa, mihukom sa pagbalik ngadto sa Tubuai, diin si Telii gipangga isip usa ka espiritwal nga magtutudlo uban sa iyang isigka babaye sa Simbahan. Giplano ni Benjamin ang pagpabilin diha sa mga isla aron sa pagpangulo sa misyon.³⁶

Sa dihang nahibaloan sa mga Santos sa Pasipiko ang umaabut nga pagbiya ni Addison, giaghat nila siya sa pagbalik dayon ug sa pagdala og daghan pang mga misyonaryo uban kaniya. Tungod kay giplano na ni Addison ang pagbalik ngadto sa isla kauban ni Louisa ug sa iyang mga anak nga babaye, kon sila buhi pa, dali siya nga miuyon.³⁷

Samtang mas bugnaw nga panahon miabut sa tibuok Winter Quarters, kanunay nga nag-ampo si Brigham aron mahibalo kon unsaon pagpangandam sa Simbahan alang sa panaw lapas sa Rocky Mountains. Human sa kapin sa usa ka tuig diha sa dalan, nakat-unan niya nga ang pag-organisar ug ang pagsangkap sa mga Santos alang sa agianan sa unahan importante kaayo ngadto sa ilang kalampusan. Apan ang naglain-laing kapakyasan nagpakita usab kaniya kon unsa ka importante ang pagsalig diha sa Ginoo ug sa pagsunod sa Iyang direksyon. Sama sa mga panahon ni Joseph, ang Ginoo lamang ang makapangulo sa Iyang Simbahan.

Human dayon sa pagsugod sa bag-ong tuig, gibati ni Brigham nga giablihan ang iyang panghunahuna sa Ginoo ngadto sa usa ka bag-o nga kahayag ug kahibalo. Diha sa usa ka miting uban sa halangdong konseho ug sa Napulog Duha niadtong Enero 14, 1847, misugod siya sa pagrekord og pagpadayag gikan sa Ginoo ngadto sa mga Santos. Sa wala pa matulog si Brigham, mihatag ang Ginoo kaniya og dugang nga mga panudlo alang sa umaabut nga panaw. Nagkuha sa wala mahuman nga pagpadayag, mipadayon si Brigham sa pagrekord sa mga direksyon sa Ginoo alang sa mga Santos.³⁹

Sa pagkasunod adlaw, gipakita ni Brigham ang pagpadayag ngadto sa Napulog Duha. Gitawag og ang “Pulong ug Kabubut-on sa Ginoo,” kini mihatag og gibug-aton nga ma-organisar ang mga Santos ngadto sa mga panon ubos sa pagpangulo sa mga apostoles. Diha sa pagpadayag, mimando ang Ginoo sa mga Santos sa pagsangkap alang sa ilang kaugalingon nga mga panginahanglan ingon man sa pagtrabaho og dungan diha sa ilang panaw, pag-amuma sa mga biyuda, mga ilo, ug sa mga pamilya nga sakop sa Mormon Batalyon.

“Himoa nga ang matag tawo nga mogamit sa iyang tanan nga impluwensya ug katigayunan sa pagdala niini nga katawhan ngadto sa dapit diin ang Ginoo mopahimutang sa istaka sa Zion,” gimando sa pagpadayag. “Kon kamo mobuhat niini uban ang putli nga kasingkasing, sa tanan nga pagkamatinuoron, kamo mapanalanginan.”⁴⁰

Nagmando usab ang Ginoo sa Iyang katawhan sa paghinulsol ug sa pagpaubos sa ilang mga kaugalingon, pagtagad sa usag usa sa maloloy-on nga paagi, ug sa paghunong sa paghubog-hubog ug pagsulti og dautan. Ang Iyang mga pulong gipahayag isip usa ka pakigsaad, nagsugo sa mga Santos sa “paglakaw diha sa tanan nga mga ordinansa,” nagtuman sa mga saad nga gihimo sulod sa templo sa Nauvoo.⁴¹

“Ako mao ang Ginoo nga inyong Dios, gani ang Dios sa inyong mga amahan, ang Dios ni Abraham ug ni Isaac ug ni Jacob,” Siya mipahayag. “Ako mao siya kinsa nangulo sa mga anak sa Israel gikan sa yuta sa Ehipto; ug ang akong bukton ilugway sa katapusan nga adlaw.”

Sama sa karaang mga Israelinhon, ang mga Santos gikinahanglan nga modayeg sa Ginoo ug motawag sa iyang ngalan sa mga panahon sa kasakit. Sila gikinahanglan nga moawit ug mosayaw dala ang pag-ampo sa pasalamat diha sa ilang mga kasingkasing. Dili sila kinahanglan nga mahadlok sa umaabut apan mosalig diha Kaniya ug mopas-an sa ilang mga kasakit.

“Ang akong mga katawhan kinahanglan pagasulayan sa tanan nga mga butang, nga sila unta maandam sa pagdawat sa himaya nga Ako aduna alang kanila, gani ang himaya sa Zion.”⁴²

Sulod sa nahibilin sa tingtugnaw, mipadayon ang mga apostoles sa pagtinguha og pagpadayag samtang sila nangandam sa pagpadala og mga panon sa karomata agi sa Rocky Mountains. Ubos sa ilang pagpangulo, usa ka gamay nga mag-una nga panon mobiya sa Winter Quarters sa tingpamulak, motabok sa kabukiran, ug motukod sa bag-ong tigumanan nga dapit alang sa mga Santos. Aron sa pagsunod sa sugo sa Ginoo ug sa pagtuman sa panagna, sila mopataas og bandila ngadto sa mga kanasuran ug mosugod sa trabaho sa templo. Dagko nga mga panon, nga kalabanan gilangkuban og mga pamilya, sa dili madugay mosunod kanila, nagsunod sa Pulong ug Kabubut-on sa Ginoo diha sa ilang panaw.⁴⁸

Sa wala pa mobiya sa Nauvoo, ang Korum sa Napulog Duha ug ang Konseho sa Kalim-an naghunahuna sa pagpuyo diha sa Walog sa Salt Lake o sa Walog sa Bear River sa amihanan. Ang duha ka mga walog anaa sa layo nga bahin sa Rocky Mountains ug ang mga paghulagway niini kalauman.⁴⁹ Nakita ni Brigham sa usa ka panan-awon ang dapit diin ang mga Santos mopuyo, apan siya dihay kinatibuk-an lamang nga paghunahuna kon asa kini makit-an. Sa gihapon, nag-ampo siya nga ang Dios mogiya kaniya ug ang nag-una nga panon ngadto sa husto nga tigumanan nga dapit alang sa Simbahan.⁵⁰

Sa hapon sa Abril 16, 1847, ang nag-una nga panon misugod sa ilang panaw ubos sa bugnaw ug dag-umon nga kalangitan. “Tuyo namo ang pag-abli sa dalan alang sa kaluwasan sa matinuoron og kasingkasing gikan sa tanang kanasuran, o isakripisyo ang tanan nga anaa sa atong pagkatinugyanan,” mipahayag ang mga apostoles diha sa usa ka sulat nga panamilit ngadto sa mga Santos sa Winter Quarters. “Diha sa ngalan sa Dios sa Israel, among tuyo ang pagbuntog o pagpakamatay nga naningkamot.”⁵³