Mga Samarianhon sa Elevator
Paghulagway pinaagi ni Anna Godeassi
Sa dihang ang usa ka pamilya sa akong ward mibutang og mga litrato diha sa Facebook mahitungod sa ilang kasinatian nga natanggong sa elevator sulod sa duha ka oras, wala akoy gibati mahitungod niini. Mao kana, hangtud nga ako mismo ang natanggong sa elevator.
Nabiyaan nako ang akong cell phone sa balay, busa gidukdok nako ang pultahan sa elevator ug nangayo og tabang. Nag-ampo usab ko. Wala madugay, pipila ka batan-ong lalaki nakadungog kanako ug—sama sa maayo nga mga Samarianhon—mitawag sa mga serbisyo sa emerhensiya. Dayon miingon sila nga nagpuyo sila sa apartment numero 38 ug nangomedya nga kon makagawas na ko, mahimo ko nga modala og pagkaon ngadto sa ilang apartment isip pagpasalamat.
Mibiya sila, ug naglisud ko sa pagkalma. Unsaon na man lang kon dili moabut ang mga trabahante sa emerhensiya? Dugang ko nga nag-ampo. Nasayud ko nga hapit na mopauli ang akong bana gikan sa trabaho ug dili siya makahibalo kon asa na ko.
Misugod na usab ako sa pagdukdok. Sa kal-ang sa mga pultahan sa elevator, nakakita ko og mga tawo nga nangagi. Gitawag nako sila ug gihangyo kon mahimo ba nilang tawagon ang akong bana ug sultihan siya mahitungod sa akong sitwasyon. Gibuhat nila kini, ug nakahimo ko sa pagkalma. Nasayud na karon ang akong bana, ug siguradohon niya nga makagawas na ko.
Milingkod ko og mga usa ka oras sulod sa elevator. Sa katapusan, miabut ang usa ka trabahante sa maintenance ug mipagawas kanako. Miingon siya nga naungot ang elevator, mao nga kinahanglan siyang mokatkat sulod sa agianan sa elevator aron mapadagan pag-usab ang elevator. Gipasalamatan nako siya sa iyang tabang.
Wala madugay nianang adlawa, akong giadto ug gipasalamatan ang akong mga silingan diha sa apartment 38. Gidad-an nako sila og pipila ka pagkaon nga linuto sa balay. Miingon sila nga nangomedya lang sila mahitungod sa pagkaon, apan nalipay ko nga mopasalamat kanila. Samtang gihinumduman nako kini nga kasinatian, nahibalo na ako karon sa unsay naagian sa pamilya sa akong ward, ug mapasalamaton ko sa mga tawo nga wala lang molabay kanako apan mihunong ug mitabang.
Wala tingali sila masayud niini, apan gisunod nila ang ehemplo sa Manluluwas. Wala Siya molabay o mobiya kanato. Mihatag Siya sa Iyang kinabuhi aron maluwas kita gikan sa pisikal ug espiritwal nga kamatayon. Tungod niini, maningkamot ko nga mosunod sa Iyang ehemplo ug dili labyan ang problema sa ubang tawo. Mapasalamaton ko niining kasinatian nga wala damhang mihatag kanako og mas dakong pagdayeg Kaniya ug sa Iyang mga panalangin.