Mga Hulagway sa Hugot nga Pagtuo
Debbie Cole
Leinster, Ireland
Si Debbie gidagmalan sa sekswal nga paagi niadtong 1989 sa edad nga 19. Determinado nga kini nga panghitabo dili makaguba sa iyang kinabuhi, si Debbie (gipakita uban sa iyang anak nga babaye) misalig sa iyang hugot nga pagtuo samtang mitrabaho siya isip usa ka bolunter nga nagtabang sa ubang mga biktima sa sekswal nga pagpangdagmal ug nangampanya alang sa mga balaod nga motabang sa pagpanalipod sa uban gikan sa mga madagmalon sa sekswal nga paagi.
Leslie Nilsson, tiglitrato
Sa adlaw human sa pagdagmal, ang pipila sa akong mga higala nangutana kon ganahan ba ko og ilimnong makahubog aron sa pagtabang kanako agi niana nga sitwasyon. Miyembro na ko niadto sa Simbahan og sobra og gamay sa usa ka tuig, ug dili ko aktibo nianang higayona. Apan nasayud ko nga kon moinom ako og bisan unsang gidaghanon sa alkohol, magpangita na ako niini.
Sa dihang nahapsay na ang akong panghunahuna human sa pipila ka adlaw, nakahukom ko nga kini nga pagpangdagmal mahimong parte sa akong kinabuhi, apan dili kini modaut sa akong kinabuhi. Mipasaka ko og kaso sa korte. Nahinumdom ko sa dayon na nga pagsentensya, nga ang mga tawo misulti nako nga ang lalaki nga midagmal kanako usa ka maayong tawo nga gikan sa respetadong pamilya ug nga kini nga pagpangdagmal dili gayud iyang kasagarang kinaiya. Miingon sila nga nakahimo siya og sayop tungod sa pag-inom og alkohol ug hilabihan ang iyang pagbasol nga naglisud siya sa pagdawat sa iyang kaugalingon tungod sa iyang nabuhat. Gikombinser ko nila sa paghangyo sa huwes nga magmaloloy-on kaniya.
Sa adlaw sa pagsentensya, mihatag ko sa akong pamahayag isip biktima ug misulti sa huwes nga nakahimo lang gayud og sayop ang lalaki samtang hubog ug naghunahuna ko nga angay siyang makakuha og psychiatric nga tabang kay sa panahon sulod sa bilanggoan. Gipasalamatan ko sa huwes ug, tungod sa akong pamahayag, gihukman niya ang lalaki og unom lamang ka tuig sa bilanggoan. Human niini, misulay ko sa pagpadayon sa akong kinabuhi. Naminyo ko ug nakabaton og mga anak.
Usa ka adlaw sa 1997 o 1998, nakadawat ko og tawag sa telepono nga nagpahibalo kanako nga ang lalaki gibalita sa mga pamantalaan. Nakagawas na siya sa bilanggoan ug midagmal og laing tulo ka babaye. Kini nga balita nakapahinumdom kanako sa tanan. Gibati nako nga daw responsable tungod kay midepensa ako kaniya.
Ang kahasol sa tanlag nga akong gibati miresulta sa depresyon. Lig-on pa ko nga miyembro sa Simbahan niadtong panahuna, apan lisud gihapon kadto. Naglibug ko pag-ayo nga dili ko kanunay makadungog sa hinay, hinagawhaw nga tingog. Ang mga panalangin sa pagkapari nakatabang nako tungod kay mas nakasabut ko unsay gusto sa Langitnong Amahan nga akong mahibaloan nianang higayuna. Nasayud ko nga nakalahutay ako niini tungod kay aduna akoy ebanghelyo sa akong kinabuhi.
Paglabay sa katuigan, sa dihang ang usa ka maayo nakong higala naghikog, nakahukom ko sa pagbuhat og pipila ka pagpangita og pundo alang sa usa ka grupo nga nagsuporta sa mga nagbangutan tungod sa paghikog [suicide bereavement group]. Usa ka adlaw nakadawat ko og tawag sa telepono gikan sa usa sa mga coordinator sa grupo. Miingon siya nga dihay laing oportunidad sa pagboluntaryo ug kanunay niyang mahunahunaan ang akong ngalan.
Nangutana siya kon interesado ba ko nga moboluntaryo isip tigsuporta nga trabahante alang sa usa ka sentro sa krisis sa pagpanglugos. Isip tigsuporta nga trabahante, makighimamat ako sa mga biktima, makigsulti kanila mahitungod sa unsay mahitabo, ug mosulti kanila sa kaimportante sa pagpakitambag. Mosuporta lang usab ako kanila ug sa ilang mga pamilya. Akong gisultihan ang babaye nga gibati nako nga ang rason nga ako ang kanunay niyang nahunahunaan mao ang tungod sa akong naagian. Nakadawat ko og pagbansay ug mitrabaho isip boluntaryo nga tigsuporta nga trabahante sulod sa duha ka tuig.
Kini nga kasinatian magantihon kaayo kanako. Matag higayon nga makadawat ko og tawag nga paadtoon sa crisis center, kanunay ko nga mag-ampo. Moingon ko, “Langitnong Amahan, nakaila Ka niining tawhana, nasayud Ka unsay iyang naagian, ug nasayud Ka unsay gikinahanglan niyang madungog. Palihug tuguti ko nga mahimong instrumento sa Imong mga kamot sa pagtabang kanila nga makadungog sa unsay kinahanglan nilang madunggan.”
Samtang mitabang ko sa mga biktima nga maningkamot padulong sa pagkaayo, sultihan nako sila nga aduna silay kapilian. Moingon ko, “Magpabilin ka ba nga biktima o mahimong usa ka survivor [tawo nga nakalahutay sa kalisdanan]? Sa ubang adlaw bation nimo nga ang gahum gikuha gikan kanimo, apan makuha nimo og balik ang gahum ug ang pagkontrol pinaagi sa dili pagtugot sa panumduman sa panghitabo nga molaglag kanimo. Kana ang paagi nga mahimo ka nga usa ka survivor.”
Usahay ang mga biktima dili andam nga magpatambag sulod sa dugayng panahon, apan kanunay nako silang awhagon ug sultihan nga importante kaayo nga magpatambag kon andam na sila. Naningkamot ko kanunay sa pagsiguro nga ang usa ka tawo kinsa misulod nga biktima mogawas nga usa ka survivor. Sa akong pagpauli sa balay, kanunay kong magpasalamat sa Langitnong Amahan sa pagtugot kanako nga makatabang og gagmay sa uban. Naghatag kini kanako og kalig-on nga mopadayon sa akong kaugalingong kinabuhi.
Paglabay sa panahon, nakadungog ko nga ang tawo nga midagmal kanako gibuhian na usab gikan sa bilanggoan ug midagmal og laing babaye. Naghunahuna ko, “Dili kini angay nga mahitabo.” Nakahukom ko nga mosulay sa pag-usab sa balaod aron dunay mas bug-at nga silot sa pabalik-balik nga madagmalon sa sekswal nga paagi. Mitanyag ko og usa ka plano nga ipa-implementar sa ministro sa kaangayan sa Ireland. Ang mga opisyal gikan sa buhatan sa ministro mibalibad sa akong tanyag. Miingon sila nga ang mga balaod niana nga panahon igo na.
Nakahukom ko nga mosugod og kampanya sa media aron makaangkon og suporta sa akong plano. Mapasalamaton ko sa milabay nga 30 ka tuig sa pagkamiyembro sa Simbahan tungod kay nakahatag ko og daghang pakigpulong ug mga leksyon, nga nakahatag kanako og mga kahanas sa pagpamulong sa publiko ug sa pagsalig nga mosulat og mga email, mohimo og mga tawag sa telepono, ug manuktok sa pultahan alang sa kampanya. Nakigtrabaho ko uban sa mga journalist sa telebisyon, radyo, ug mga mantalaan. Maayo kaayo sila. Gipaambit nila ang akong kasinatian ug makiangayong mirepresentar sa akong plano. Matinuuron sila sa pagsaysay sa akong kasinatian ug sa akong kampanya, ug nakuha ang pagtagad sa publiko kalabut sa isyu.
Nakigtrabaho usab ko sa usa ka lokal nga politiko kinsa mitabang kanako sa paghimo og laing plano nga nakahimo sa pag-angkon og igo nga suporta. Human sa daghang buluhaton, naipasar sa katapusan ang balaudnon niadtong Enero 16, 2019.
Samtang nangampanya alang niining bag-o nga balaod, kapuyon ko usahay sa emosyonal nga paagi. Kinahanglan nakong ipaambit ang akong kasinatian sa makadaghan ug mosulay sa pagpabiling kalma ug dili apektado panahon sa mga interbyu sa TV, radyo, ug pamantalaan. Nakapaluya kaayo kini kanako, ug bation nako usahay ang gibug-aton sa tanan nga miapekto kanako. Akong mabati ang matang sa kawalay paglaum libut kanako ug ang negatibo nga mga hunahuna misulod sa akong hunahuna. Gibati nako nga daw walay mahimong mahinungdanong epekto sa sitwasyon ug usahay nangutana ko sa akong kaugalingon nganong maningkamot pa ko. Niadto nga mga panahon, ang pag-ampo, pagbasa sa kasulatan, ug pagpangalagad sa uban hilabihan nga nakatabang kanako. Lig-on kaayo ang akong pagpamatuod nga epektibo ang pag-ampo. Kon dili pa tungod sa pag-ampo, dugay na siguro ko nga nagkaproblema sa pangisip. Miduol usab ko sa akong branch president alang sa mga panalangin sa pagkapari. Mapasalamaton ko sa Langitnong Amahan tungod sa paggiya og mga tawo ngari kanako nga makatabang kanako.
Nakakaplag ko og dakong kahupayan sa pagtambong sa templo ug sa pagkahimong ordinance worker. Nakatabang kini kanako nga mobati sa gugma nga bation sa atong Manluluwas alang sa Iyang mga Santos sa duha ka habig sa tabil. Sa milabayng walo ka tuig, nakat-unan usab nako nga kon makadawat ka og pag-aghat, dili ka magduhaduha sa pagsunod niini. Usa ka kasulatan nga nakatabang nako pag-ayo mao ang 1 Nephi 3:7: “Ako moadto ug mobuhat sa mga butang nga ang Ginoo nagsugo …” Hilabihang napanalanginan ang akong kinabuhi tungod sa pagsunod niini nga baruganan.
Ang kaaway mosulay sa pagkombinser kanato nga kita dili igo ka maayo o dili igo ka lantip ang salabutan, apan uban sa tabang sa atong mahigugmaong Amahan sa Langit ug sa atong Manluluwas, kita igo ka maayo, kita igo ka lantip ang salabutan. Nasayud ko nga bisan unsa ang akong atubangon, Sila dili gayud mobiya kanako nga magsagubang sa kalisud nga ako ra.
Lisud kaayo ang mosulay sa pagpasabut kon sama sa unsa ang pagsinati og kahasul sa pangisip [trauma] tungod sa sekswal nga pagpangdagmal ngadto sa tawo nga wala makasinati niana nga kalisud. Ang usa ka kasinatian sama niini kanunay nga magauban kanimo—dili gayud kini mawala. Adunay mga adlaw nga adunay makaugkat sa panumduman ug mobati ka nga ang imong gahum, ang imong pagsalig, ug ang imong kasiguroan gikuha gikan kanimo.
Niana nga mga panahon, ang bugtong nakong mabuhat mao ang pag-ampo ug pagpakig-istorya sa akong Langitnong Amahan. Nasayud ko sa walay pagduha-duha nga Siya maminaw ug motubag sa akong mga pag-ampo. Aduna akoy balaanong panulundon, ug naghatag kini kanako og kalig-on nga mopadayon kon magkalisud ang kinabuhi.
Usab, ang pagkasayud nga ang akong Manluluwas nahigugma kanako naghatag nako og paglaum ug tumong. Ganahan ko sa gisulti ni Elder Jeffrey R. Holland sa Korum sa Napulog Duha ka mga Apostoles: “Imposible nga ang mahangturong kahayag sa Pag-ula ni Kristo dili moabut kaninyo” (“Mga Mamumuo sa Ubasan,” Liahona, Mayo 2012, 33). Ang Manluluwas makatabang kanato bisan asa kita o unsa ang atong gisinati. Maghunahuna ako Kaniya alang sa ehemplo sa unsay buhaton panahon sa kalisdanan.
Nagkinahanglan og dakong paningkamot ang pagpadayon sa pag-uswag human sa makapa-trauma nga panghitabo, apan posible kini tungod ni Jesukristo. Mapasalamaton ako Kaniya ug sa Iyang ebanghelyo. Napanalanginan ang akong kinabuhi sa daghan kaayong paagi.
Si Debbie uban sa iyang anak, si Azaria. Nakakaplag si Debbie og kalig-on pinaagi sa pag-ampo. Nabati niya ang mahigugmaong suporta sa Langitnong Amahan diha sa iyang mga hagit ug mga paningkamot sa pagpalambo sa mga balaod sa Ireland.
Ang ebanghelyo mipanalangin sa kinabuhi ni Debbie sa daghang paagi. Mapasalamaton siya sa iyang mga oportunidad sa pagpaambit sa iyang pagpamatuod ngadto sa iyang pamilya. “Ang Manluluwas makatabang kanato bisan asa kita o unsa ang atong gisinati,” miingon si Debbie.
Pinaagi sa iyang relasyon sa iyang Amahan sa Langit ug sa Manluluwas, si Jesukristo, si Debbie nakakaplag og kalig-on nga mahimong dako nga suporta sa iyang pamilya, sa mga miyembro sa Mullingar Branch, ug sa daghang mga tawo sa iyang komunidad.