Sa Unsang Paagi ang Espiritu Makatabang (ug Motabang) Kanimo sa Pagpangalagad

Ang buluhaton sa pagkapari sa pagpangalagad, nga gihatag ngadto sa mga lalaki ug mga babaye, naglakip sa katungod sa pagdawat og pagpadayag.

Ang tawag sa pagpangalagad ug pagserbisyo ug bisan ang paghigugma sama sa gibuhat sa Manluluwas usahay mahimong lisud—ilabi na kon kini naglakip sa pagtabang niadtong tingali dili kaayo nato kaila. Tungod sa walay kinutubang paagi sa pagpangalagad, maghunahuna kita kon unsaon nato sa pagkahibalo sa pinakamaayong paagi sa pagtabang niadtong gisangun kanato.

Dili na kita angay nga maghunahuna og dugay tungod kay ang atong sinsero nga mga paningkamot mahimong magiyahan sa Espiritu Santo.

“Ang inyong sagradong tahas sa pagpangalagad naghatag kaninyo sa balaanong katungod sa pagdawat og inspirasyon,” miingon si Sister Bonnie H. Cordon, Kinatibuk-ang Presidente sa Young Women. “Makapangayo kamo niana nga inspirasyon nga adunay pagsalig.”¹

Kon magtinguha kita sa pagserbisyo sama sa gibuhat sa Manluluwas, mahimo kitang magiyahan sa sama nga Espiritu nga migiya Kaniya. Labi na kining tinuod kon nagserbisyo sa mga buluhaton, sama sa pagpangalagad, nga gihimo ubos sa awtoridad sa mga yawe sa pagkapari sa bishop. Ania ang unom ka sugyot alang sa pagpangalagad uban sa Espiritu.

Unsaon Nako sa Pagbaton sa Espiritu Samtang Mangalagad?

Imahe

man praying and man running

Litrato gikan sa Getty Images

Pangayo og Giya. Ang Langitnong Amahan gusto nga makigsulti kita Kaniya pinaagi sa pag-ampo. Ang pag-ampo dili lamang magtugot kanato nga mas mapaduol Kaniya, apan mosiguro usab kini “sa mga panalangin nga ang Dios andam sa paghatag, apan nga kita kinahanglan mangayo sa ingon aron makabaton.”² “Samtang kita mag-ampo ug magtinguha sa pagsabut sa ilang mga kasingkasing,” miingon si Sister Cordon, “ako mopamatuod nga ang Langitnong Amahan mogiya kanato ug ang Iyang Espiritu magauban kanato.”³
Ayaw Paghulat og Pag-aghat. Paglihok daan. “[Pag]matinguhaon nga moapil” (Doktrina ug mga Pakigsaad 58:27), ug imong makita nga ang imong mga paningkamot mahimong magiyahan ug mapalambo. “Usa ka importante nga paagi nga makasarang alang sa pagpadayag mao ang pagpadayon sa atong pagserbisyo ug pagbuhat,” miingon si Presidente Dallin H. Oaks, Unang Magtatambag sa Unang Kapangulohan. “Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabut kon sila naglihok, dili kay naglingkod lang diha sa ilang nahimutangan nga nagpaabut sa Ginoo sa pagsulti kanila sa unsay unang buhaton.”⁴

Unsaon Nako Pag-ila sa mga Pag-aghat nga Mangalagad?

Imahe

lightbulb and woman diving

Sunda ang Tambag ni Mormon. Dili kita angay nga mogahin og panahon nga mabalak-ong magpaabut kon ang usa ka hunahuna usa ba ka pag-aghat o dili. Dili kita angay nga mohimo niini tungod kay nasayud kita sa sayon nga solusyon ni Mormon unsaon pagkahibalo: Kon ikaw adunay hunahuna nga nag-aghat kanimo sa pagbuhat og maayo ug sa pagtuo o sa pagtabang sa uban nga motuo diha kang Kristo, mahibalo ka nga gikan kini sa Dios (tan-awa sa Moroni 7:16).
Ayaw Kabalaka mahitungod Niini. “Sugdi lang gayud dayon ang pag-apil,” miingon si Elder Jeffrey R. Holland sa Korum sa Napulog Duha ka mga Apostoles. “Ngadto niadtong nagkinahanglan. Ayaw pagsige og hinuktok kon unsang matang sa pag-alagad ang inyong ikahatag. Kon atong sundon ang sukaranang baruganan nga natudlo, mopahiuyon sa mga yawe sa pagkapari, ug magtinguha sa Espiritu Santo sa paggiya nato, dili gyud kita mapakyas.”⁵

Unsa ang Labing Maayong Paagi sa Pagsunod sa usa ka Pag-aghat?

Imahe

fist and man climbing mountain

Diha-diha dayon. Si Sister Susan Bednar (asawa ni Elder David A. Bednar sa Korum sa Napulog Duha ka mga Apostoles) maoy usa ka talagsaong ehemplo sa pagsunod sa mga pag-aghat. Human mag-ampo “nga makaila niadtong anaa sa panginahanglan”, motan-aw siya libut sa kongregasyon ug sa kanunay “mobati siya og espirituhanong pag-aghat sa pagbisita o sa pagtawag sa telepono sa usa ka partikular nga tawo,” mipaambit si Elder Bednar. “Ug kon si Sister Bednar makadawat sa maong pag-aghat, dali siyang motubag ug motuman. Mao kini kasagarang mahitabo nga sa higayon nga ang ‘amen’ gipamulong na diha sa panapos nga pag-ampo, makig-istorya siya sa usa ka tin-edyer o mogakos sa usa ka sister o, sa pag-uli sa balay, daling mokuha sa telepono ug motawag.”⁶
Maisugon. Ang kahadlok nga isalikway ug ang mga pagbati sa pagkamaulawon, pagkakulang, o isip makahasol makapugong kanato sa pagsunod sa usa ka aghat nga mangalagad. “Sa nagkadaiyang mga panahon ug mga pamaagi, mobati kita og kakulang, dili sigurado, tingali dili takus,” miingon si Elder Gerrit W. Gong sa Korum sa Napulog Duha ka mga Apostoles. “Apan sa atong matinud-anon nga mga paningkamot sa paghigugma sa Dios ug pagpangalagad sa atong mga silingan, ato tingaling bation ang gugma sa Dios ug gikinahanglan nga inspirasyon alang sa ila ug atong kinabuhi sa bag-o ug mas balaan nga mga paagi.”⁷

Usa ka igsoong lalaki mipaambit kon sa unsang paagi nagpanagana siya sa pagtabang sa bana sa usa ka babaye kinsa misulay sa paghikog. Apan sa katapusan gidapit niya ang bana sa pagpaniudto. “Sa dihang miingon ko, ‘Ang imong asawa misulay paghikog. Lisud tingali kadto alang kanimo. Gusto ba nimo nga maghisgot mahitungod niini?’ siya dayag nga mihilak,” mipaambit siya. “Emosyonal ug lawom kaayo ang among panag-istoryahanay ug mipalambo og usa ka talagsaong kasuod ug pagsalig sulod lang sa minutos.”⁸