Usa ka Laundry Bag sa Gugma
Paghulagway pinaagi ni John Kachik
Naglisud ang akong pamilya sa pagdawat sa akong desisyon nga mahimong Santos sa Ulahing mga Adlaw. Sa dihang akong gipahibalo nga moserbisyo ko og full-time mission nga walay sweldo, dili tanan ang nakasabut kon sa unsang paagi o gani nganong gusto nako nga magmisyon. Gusto sa akong mga ginikanan nga moambit sa akong kadasig, apan naglisud sila sa pagtan-aw kanako nga “miundang” sa relihiyon diin gipadako ko nila.
Sa dihang akong nadawat ang akong tawag ngadto sa Honduras Tegucigalpa Mission, gilakip sa sobre ang lista sa mga butang nga kinahanglan nakong dad-on. Nakabantay ang akong mama nga usa sa mga butang sa akong lista mao ang laundry bag. Usa kana ka butang nga makasabut siya! Dali siyang mipalit og baga nga asul nga maong ug mikinamot paghimo og yano, magamit nga laundry bag nga hinimo uban sa gugma. Usa kadto ka gasa nga magpabiling bililhon sa dugay nga panahon.
Kana nga laundry bag mikuyog kanako ngadto sa missionary training center ug dayon ngadto sa Honduras. Mibiyahe kini uban kanako gikan sa gamay nga balangay ngadto sa lain, sa hinay-hinay nagkadaan gikan sa asul kaayo ngadto sa dili na kaayo asul, sama sa paagi nga ang maong nga karsones nahimong paborito ug haum kaayo nga parisan sa karsones. Sa katapusan sa akong misyon, gihatag nako ang kadaghanan sa akong mga saput ngadto sa espesyal nga pamilya nga nakat-unan nako sa paghigugma, apan gipabilin nako ang laundry bag. Gihimo kadto sa akong mama alang gayud kanako bisan og wala siya makasabut sa kahulugan sa usa ka misyon.
Paglabay sa dul-an sa 30 ka tuig, ang among kinamagulangang anak nakadawat sa iyang tawag ngadto sa California Carlsbad Mission, uban sa listahan sa mga butang nga iyang gikinahanglan. Dungan namo kining gibasa, ug sa dihang miabut kami sa “laundry bag,” among gikuha ang bag nga gihimo ni mama alang kanako. Bisan og nauphag na kaayo kini nianang higayona, gidala kini niya ngadto sa California.
Paglabay sa pipila ka tuig, ang akong anak nga babaye gitawag sa pagserbisyo didto sa Ohio Cleveland Mission, ug ang laundry bag mikuyog kaniya didto. Sa iyang pag-uli, gidala niya kini sa balay nga mas daan na apan wala gihapon kaayoy kadaut ug gisi.
Ang bag mipahinumdom nako nga ang pipila ka mga butang, sama sa mga leksyon nga nakat-unan gikan sa pagserbisyo og misyon ug gikan sa pagpakita og gugma alang sa uban—sama sa gibuhat sa akong inahan alang kanako—pabalik-balik nga makapanalangin kanato. Nahimo kining parte sa tradisyon sa pamilya nga misyonaryo nga pagserbisyo nga manghinaut ko nga dili gayud maguba.