Ang Hiyas sa Kalig-on

Akong sultihan ang among mga misyonaryo nga ang pagserbisyo og misyon susama sa pagkuha og taas nga matang sa mga klase sa kakugi ug pailub, lakip sa uban nga mga hiyas, nga makatabang sa pag-andam kanila alang sa ilang umaabut isip mga kapikas ug mga ginikanan.

Subo lang, ang ubang mga batan-on karon dili andam sa lisud nga mga leksyon sa kinabuhi. Kulang sila sa unsay akong gitawag nga “ang hiyas sa kalig-on.” Atong makita kana nga kakulang sa kalig-on tali sa mga freshmen sa kolehiyo, bag-o nga mga rekrut sa militar, ug bisan sa uban sa atong full-time nga mga misyonaryo.

Isip mga ginikanan, gimahal nato ang atong mga anak ug gusto ang labing maayo alang kanila. Gusto nato nga mahimong mas sayon ang ilang kinabuhi kay sa atoa. Apan kita—ug ang kultura nga atong gipuy-an—tingali nagbuhat og pipila ka butang nga moresulta sa wala damhang sangputanan sa pagkunhod sa ilang kalig-on.

Salamat na lang, adunay solusyon. Makita kini diha sa paggamit sa gamhanan nga mga baruganan sa ebanghelyo nga makatabang sa atong kabatan-onan nga mas mahisama sa Manluluwas (tan-awa sa Lucas 2:52). Samtang atong hangupon ug gamiton kini nga mga baruganan, nga akong gihisgutan sugod sa pahina 12, masaligon ko nga ang Ginoo mopanalangin kanato sa paglig-on sa batan-ong mga lalaki ug batan-ong mga babaye nga gitagana Niya sa pag-atubang ug pagbuntog sa mga hagit karon.

Elder Lynn G. Robbins

Sa Seventy